John 21

Umbundu Bible (Embimbiliya - Bíblia Sagrada em Umbundu)

← Chapter 20 Jump to:

1Kovaso yovina evi Yesu wa limolehisa vali kolondonge viaye kokalunga ka Tibéria. Wa limolehisa ndomo:

2Simono Petulu la Tomasi wa tukuiwa Njamba, la Nataneli u Kana ko vo Galilea, lomãla va Sebedeo, kuenda olondonge viaye vikuavo vivali via kala pamosi.

3Simono Petulu wa popia lavo hati, Ngenda ha pipa. Va popia laye vati, Etu tuendavo love. Va tunda kuenje va wila vowato, uteke waco puãi ka va kuatele cimue.

4Eci kua ca Yesu wa talama kongongo, olondonge puãi ka via kũlĩhile okuti Yesu.

5Yesu wa va pula hati, Ene amãla, vu kuete okambelela? Vo kumbulula vati, Ndati.

6Eye wa popia lavo hati, Imbili owanda kondio yowato, kuenje vu kuata. Haico vo wimba, yu ka va tẽlele oku u koka, momo olosi via lua.

7Oco ondonge yina Yesu a sole ya popia la Petulu hati, O-o, Ñala. Eci Simono Petulu a yeva okuti Ñala, oco wa wala okapote momo wa kaile ño ndoto, kuenje wa limba vokalunga.

8Puãi olondonge vikuavo vieya lowato oku koka owanda wolosi, momo ka via kaile ocipãla longongo, te ca soka ño ndocita colo-metro.

9Oco, eci veya kongongo, va muilako akãla ondalu, kuenje kakãla aco kua kala olusi lombolo.

10Yesu wa popia lavo hati, Nenipo olosi wa kuati ndopo.

11Oco Simono Petulu wa wila vowato, kuenje wa kokela owanda kongongo. Owanda we yuka olosi vinene, ocita kakui atãlo kolosi, kolosi, vitatu. Kuenje ndaño via lua ndomo, haimo owanda ka wa tepele.

12Yesu wa popia lavo hati, Enjui, ndo li ongau. Layimue ondonge ya lukuta oku u pula hati, Ove elie? Va kũlĩha ale okuti Ñala.

13Yesu weya, wa nyañula ombolo yu wa va iha, lolosi haico.

14Eyi oyo onjanja yatatu Yesu a limolehisa kolondonge, eci a pinduka ku vakuavilangu.

15Eci va lia ongau Yesu wa pula Simono Petulu hati, A Simono, amõla a Yoano, ame o sole ca lua, okuti evindeti ci sule? Eye wa kumbulula hati, Oco, a Ñala, o ci okuti hu sole. Yesu wa popia laye hati, Lisa otumeme tuange.

16Yesu wo pula vali onjanja yavali hati, A Simono, amõla a Yoano, ame o sole? Petulu wa kumbulula hati, Oco, a Ñala, o ci okuti hu sole. Yesu wa popia laye hati, Lava olomeme viange.

17Yesu wo pula vali onjanja yatatu, hati, A Simono, amõla a Yoano, ame o sole? Petulu wa sumua omo o pula onjanja yatatu hati, O sole? Oco wa popia laye hati, A Ñala, ove wa kũlĩha ovina viosi, o ci okuti hu sole. Yesu wa popia laye hati, Lisa olomeme viange.

18Mopia love siti, Ocili, ocili, kumalehe wove wa liñaiña uvia ove muẽle, kuenje wa enda enda kuosi wa panga, puãi kukulu wove o nyanyumula ovoko ove kuenje umue wiñi o ku iña, loku enda love oko kua pangele.

19Oco wa ci popela oku lekisa olufa a laika oku pandiya laluo Suku. Kuenje eci a ci popia oco wa popia laye hati, Ñuame.

20Petulu wa ñualapo, kuenje wa mola ondonge yina Yesu a sola okuti ya kala oku va kuama, haiyo ondonge yina ya liyekele konete ya Yesu kokulia, yu ya pulile, yiti, A Ñala, helie o ku pakula?

21Oco Petulu, eci o mola, wa pula Yesu hati, A Ñala, u o lingiwa ndati?

22Yesu wo kumbulula hati, Nda nda panga okuti o siala toke njiya, cu ku linga nye? Ove, ñuame.

23Oco ondaka eyi ya yevala pokati ka vakuetavo okuti ondonge yaco ka yi fi. Puãi Yesu ka popele hati, Ka fi, te hati, Nda nda panga okuti o siala toke njiya, cu ku linga nye?

24Eyi, oyo ondonge yi kasi loku imbila ovina evi uvangi, haeye ya soneha ovina evi, kuenje tu ci okuti uvangi wayo wocili.

25Kulivo ovina via lua vikuavo Yesu a linga. Nda viosi via sonehiwile, nda soka siti, voluali, alivulu aco a sonehiwa, nda ka a suimo.

← Chapter 20 Jump to: