Malachi 1

Umbundu Bible (Embimbiliya - Bíblia Sagrada em Umbundu)

Jump to: Chapter 2 →

1Owanji wondaka ya Yehova weya ku Isareli lomẽla wa Malakiya.

2Yehova wa popia hati, Ndo soli. Ene puãi wo puli hoti, Wa tu sola ndati? Yehova wa kumbulula hati, Esau hẽ, siti huva a Yakoba? Haimo nda sola Yakoba,

3puãi nda suvuka Esau kuenje nda nyõla olomunda viaye, locipiñalo caye nda ceca kovinyama viovekalasoko.

4Nda Edome o popia, hati, Tua nyõlẽha tupu, haimo tu tunga vali alunda etu, Yehova Ukualohoka o popia hati, Ci tava. Va tunge, puãi ame nungulula toke va va tukula vati, Omanu vaco vakuevĩho, haivo omanu Yehova a temẽla otembo yosi.

5Ovaso ene a ci mõla muẽle, kuenje wu popia hoti, Yehova ukuonene volofeka viosi, ha vo Isareliko lika.

6Omõla o sumbila so yaye, haico ukuenje cime caye. Oco, nda ndinjali esumbilo liaco li kasi pi? Nda ndicime usumba va ñuetele u kasi pi? Oco Yehova Ukualohoka a popia lene, avitunda, haene wa pembuli onduko yange. Ene wu pula hoti, Tua pembula ndati onduko yove?

7Omo wa lumbili kutala wange ombolo ya vĩha. Wu pula hoti, Tua yi vĩhĩsa ndati? Omo wa simi okuti ka ci lingi cimue oku pembula omesa ya Yehova.

8Nda wu lumbi ovinyama violomeke, hacĩvĩko hẽ? Eci wu lumbi ovinyama viovilema pamue evi vi vela, hacĩvĩko hẽ? Handi ka vi eci ku Soma yene! Nda eye o vi sanjukila, pamue nda o vu tava! Oco ca popia Yehova Ukualohoka.

9Cilo, likutilili ku Suku okuti o tu linga ohenda. Locilumba ndoco hẽ u lingi ohenda? Oco ca popia Yehova Ukualohoka.

10Nda pokati kene pa kaile umue o kuata utoi oku yila apito ange, okuti ko siakãli vali olivova ondalu yokutala wange, nda hĩse! Sio sanjukilili, kuenje si tambula povaka ene ocilumba. Oco ca popia Yehova Ukualohoka.

11Momo, tunde kutundilo wekumbi toke kutakelo walio onduko yange yi kemãlã pokati kolofeka. Vofeka yosi insensu yi timĩhĩwila onduko yange, locilumba ci ndumbiwila ci yela, momo onduko yange yi kemãlã pokati kolofeka. Oco ca popia Yehova Ukualohoka.

12Ene puãi wu yi sepuisa, omo vu popia hoti, Omesa ya Yehova ya vĩhĩsua, kuenda okulia kuaco ci tava oku ku pembula.

13Wu popiavo hoti, Hekavoko he! kuenje wu njola epembe. Oco ca popia Yehova Ukualohoka. Wa neni eci ca iviwa leci ca lemãla leci ci vela. Ovio muẽle vu nena ndocilumba cene. Ndi ci tava hẽ? Oco ca popia Yehova Ukualohoka.

14Yi siñalĩwe ohembi yi kuete ocinyama culume vocunda caye, kuenje yi ci likuminya, puãi haimo yi lumba ku Yehova cimue ci kuete atondelo. Momo ame ndi Soma yinene, kuenje onduko yange ya sumbiwa pokati kolofeka. Oco ca popia Yehova Ukualohoka.

Jump to: Chapter 2 →