Nehemiah 2

Umbundu Bible (Embimbiliya - Bíblia Sagrada em Umbundu)

← Chapter 1 Jump to: Chapter 3 →

1Kosãi ya Nisana, kulima wakui avali wa Soma Aretasesete, eci vo kapela ovinyu oco ame nda yelula ovinyu, nda vi eca ku Soma. Ocili sia la sumua kovaso aye.

2Kuenje Soma wa mula hati, Ocipala cove ca sumuĩla nye, ku vela pua? Ca lomboloka okuti utima wove wa sumua. Oco nda kuata usumba wa lua.

3Nda popia la Soma siti, Soma a kale ño hũ lomuenyo! Ocipala cange ka ci sumua ndati osimbu imbo liayambo olosekulu viange lia linga elunda, lolombundi viaco via pia londalu?

4Soma yu wa mula hati, Nye o yongola puãi? Oco nda likutilila ku Suku yokilu.

5Yu nda kumbulula Soma siti, Nda ca sunguluka ku Soma, kuenda nda ukuenje wove wa sanga ohenda kovaso ove, nda pinga okuti o ngeca si endi ko Yuda, kimbo liayambo olosekulu viange, okuti ndi li tunga vali.

6Inakulu yu wa tumãla la Soma. Soma wa mula hati, Ungende wove u pesela olosãi viñami? Otembo yipi o tiuka? Soma yu wa tava oku ngeca. Kuenje nda tukula otembo ndeyi nda sima.

7Nda popia vali la Soma siti, Nda ca sunguluka ku Soma, va nyihe ovikanda vioku eca kolonguluvulu viokesinya lia Ferati, oco vi mitise toke mitila ko Yuda.

8Va nyĩhe vali ukanda woku eca ku Asafe, ondavululi yovisenge via Soma, oco a nyĩhe oviti vioku tunga olomimbiliko violombundi viombonge yonembele, levi vioku tunga ovimbaka vimbo, levi vionjo yange muẽle omu ha kala. Kuenje Soma yu wa nyiha eci ndo pinga momo esumũlũho lia Suku yange lia mbuila.

9Oco nda pitila kolonguluvulu viokesinya Ferati. Nda eca kokuavo ovikanda via Soma. Kuenda vali Soma wa nyihile vakesongo vamue volohoka viaye kuenda vamue va endela kotuvalu.

10Sambalata puãi una u Horoni, kuenda ukuenje Toviya u Amoni eci va ci yeva, va ci suvuka ca lua, okuti umue weya oku kuatisa va Isareli.

11Oco nda pitila ko Yerusalãi kuenje nda kalako oloneke vitatu.

12Noke nda votoka pokati kuteke, lame lalume vamue va kala lame. Sia sapuilile umue eci Suku a ñapa vutima oku linga ko Yerusalãi. Ka kua kaile ocinyama cikuavo te eci lika ame nda endela.

13Uteke nda tundila pombundi yokekungu, nda loña kono ya Mbulu lokombundi yokeyala. Nda vanja ovimbaka via Yerusalãi ndomo via teka, lolombundi viaco ndomo via pia londalu.

14Noke nda pita vali kombundi yokono lokociva ca Soma, puãi ka kua kaile apa pa pita ocinyama cange.

15Oco nda vamba konele yokalui, nda tala ocimbaka. Noke nda tiukila, nda iñilila kombundi yokekungu.

16Olondavululi ka via kũlĩhile eci ñasi loku linga, ndaño apa nda ile. Sia sapuilile handi va Yuda pamue ovitunda lomanu vanene lasongui lolondingupange vikuavo.

17Nda popia lavo siti, Wu lete ndomo tu kasi cĩvi cĩvi, lomo Yerusalãi ya nyolẽha, lolombundi viaco ndomo via pia londalu. Tu endi, tu ka tungi vali ocimbaka ca Yerusalãi oco ka tu ka yoliwe vali epembe.

18Yu nda va sapuila ohenda Suku a ñuatela, lolondaka Soma a popia lame. Oco va kumbulula vati, Tu katuki muẽle ha tu tungi. Oco va kolisila ovaka avo upange waco u kola.

19Haimo Sambalata u Horoni, la Toviya, upika u Amoni, la Geseme u Arabia, eci va ci yeva, va tu fuanguila loku tu yola epembe. Va pula vati, Nye eci wu kasi loku linga? Anga wu ñualelapo Soma?

20Puãi nda tambulula siti, Suku yokilu eye o tu kuatisa, oco etu tuakuenje vaye tu fetika oku tunga. Ene puãi ka wu kuete cimue, pamue omoko yimue, ndaño onjivaluko, vo Yerusalãi.

← Chapter 1 Jump to: Chapter 3 →

Recommended Reading

Commentary Nehemiah Commentaries → Devotional Nehemiah Devotional Guide → Get This Bible Umbundu Bible (Embimbiliya - Bíblia Sagrada em Umbundu) Study Bible →