Philippians 4

Umbundu Bible (Embimbiliya - Bíblia Sagrada em Umbundu)

← Chapter 3 Jump to:

1Oco, a vamanji wa soliwi, haene ndu kueteli ongeva, ene vusanju liange, haene vukolowa liange, kolisiko vu Ñala, a vakuacisola cange.

2Ndungula Euodia, ndungulavo Suntuke, siti, Lisunguluisili vu Ñala.

3Lovevo, okuetu wa kolelua kupange, nda ku pinga okuti o kuatisa akãi vaco, momo va lingila kumuamue lame la Clemente lolondingupange vietu vikuavo, upange wondaka yiwa. Olonduko viavo vi kasi velivulu liomuenyo.

4Sanjukili vu Ñala olonjanja viosi. Mopia vali siti, Sanjuki.

5Esunguluko liene li limbukiwe lomanu vosi. Ñala o kasi ocipepi.

6Lacimue ko ka ci kuateli ohele, puãi kovina viosi apingilo ene a sapuiwe ku Suku lolopandu volohutililo viene lalombelo ene.

7Kuenje ombembua ya Suku, yina ya piãla olondunge viosi, yi lava ovitima viene lovisimilo viene vu Kristu Yesu.

8Oku sulila akuetu, mopia siti, cosi cocili, cosi ca sumbiwa, cosi cesunga, cosi ca pua evĩho, cosi ca posoka, cosi ci sivayaiwa, nda kuli esunga, kuenda nda kuli eci ci sesamela oku sivayiwa, sokololi ovina evi.

9Eci wa lilongisi, leci wa tambuli, leci wa yevi, kuenda eci wa moli kokuange, oco ci lingi. Kuenje Suku yombembua o kala lene.

10Nda sanjukila ca lua vu Ñala oku mola ndomo wa fetiki vali oku njivaluka. Oku njivaluka lalimue eteke kuo kambeli. Evelo lioku ñuatisa olio lika lio kambeleli.

11Si lisiõsũila usuke, momo nda likisa okuti kuosi ñasi eci ñuete ci nela.

12Oku suka ndi ci. Oku kala lelau ndi ci. Kuoha ñasi kovina viosi nda kũlĩha oku kuta loku kala lonjala, oku kala lelau loku suka.

13Nẽla ovina viosi vu Kristu u o ñolaisa.

14Haimo lumue wa lingi muẽle oku ñuatisa kohali yange.

15Ene a va Filipoi, vu ci cokuti, kefetikilo lioku longisa ondaka yiwa, eci nda tunda ko Makedonia, lalimue vali ekongelo lia njivaluka loku sokolola eci va tambula leci ca va sesamela oku eca te ene lika.

16Ndaño eci nda kaile vo Tesalonike wa numisi luvali olombongo vioku ñuatisa.

17Ka ci kasi okuti ndavoka ombanjaile. Eci ndavoka ceci okuti, mola kokuene epako li lova kekonda liasumũlũho ene.

18Ame nda tambula cosi kuenje ca supoka. Nde kuta. Nda tambula peka lia Epafrodito olombanjaile wa tumi. Kokuange via kala ndocilumba ci kuete elemba li pepa. Ocilumba caco Suku o ci panduila loku ci sanjukila.

19Kuenje Suku yange upa kukuasi wulamba waye una u molehela vu Kristu Yesu oku tẽlisa cosi wa suki.

20Kaliye ku Suku, haeye Isietu, ku kale ulamba oloneke vi enda ño-o hũ. Amene.

21Lamipo olosandu viosi vu Kristu Yesu. Vamanjetu va kasi lame vo lami.

22Olosandu viosi vio lami, ca piãla vakuanjo ya Kaisare.

23Ocali ca Ñala Yesu Kristu ci kale lovitima viene. Amene.

← Chapter 3 Jump to: