Proverbs 1

Umbundu Bible (Embimbiliya - Bíblia Sagrada em Umbundu)

Jump to: Chapter 2 →

1Olosapo via Salomone, omõla a Daviti, haeye Soma ya va Isareli, vievi:

2Okuti omanu va kũlĩha olondunge loku longiwa, va yeva olondaka viuloño,

3va pindisua levi via sunguluka, levi viesunga locili, levi via suñama,

4okuti olondunge vi eciwa ku vakuanumbi, lukũlĩhiso lesuluviko kamalẽhe.

5Ukualondunge layevo o tẽla oku yeva loku amamako kukũlĩhiso, lu wa lunguka o tẽla oku liupilako uloño

6woku yeva olusapo locisetahai, kuenda olondaka violonoño lalupolo avio.

7Oku sumbila Yehova oko efetikilo liolondunge. Aveke va tomba tomba uloño loku longiwa.

8Amõlãnge, tava kalungulo aso, ku ka sinile okulonga kua nyoho.

9Momo ovio via linga ocifuto ca posoka kutue wove, kuenda olomota posingo yove.

10Amõlange, nda olondingaĩvi vi ku tamba ku ka tave.

11Nda va linga vati, Enju tu ende, tu ka lavekele osonde, tu ka seselele omãla vamãle olivova,

12tu va ine ño lomuenyo ndeci ongehena, pamue olungunge ndeci eyambo;

13oco tu mõla ukuasi wosi wa posoka, tu yukisa olonjo vietu levi tu punda;

14litokeka yapa letu; tu kali lonjeke yimosi pokati ketu.—

15Amõlange, ku ka endaende lavo. Yuwisa olomãi viove kalila avo.

16Momo olomãi viavo vi loña kũvi, va yayuila oku pesela osonde.

17Momo onjanjo yi petuiwa omangonya nda onjila yi yi lete ale.

18Ovo puãi, osonde yavo muẽle va yi lavekela; lovimuenyo viavo muẽle va vi seselela.

19Olio efulilo lia vosi va sanga ukuasi poku punda. Ava va ci linga va liwa ovo muẽle.

20Ndunge o vilakayaila volokololo, o kalokaila vovitanda.

21O vilakayaila povila; o kundaila kolombundi vimbo, hati,

22Ene, a vakuanumbi, toke eteke lipi vu sola onumbi yene? Lene, alomembuli, toke eteke lipi vu sanjukila okupembula kuene? Lene, aveke, toke eteke lipi vu suvuka olondunge?

23Yevi okutembula kuange. Ndu situluili utima wange. Ndu sapuili olondaka viange.

24Omo ndo kovongi kuenje wa likali, ndo payuli kuenje lomue wa tava,

25puãi wa pukuli alungulo ange osi, kuenda ka wa taveli kokulemẽla kuange,

26oco njola epembe ohali yene, ndu laluli eteke usumba wu kuati,

27eteke usumba wu kuati ndehunguhungu, kuenda olohali viu veti ndocipepe, lelamba longuele viu wili.

28Oco va mbilikiya, puãi si tava, va sandiliya, puãi ka va sangi.

29Omo va suvuka olondunge, kuenje ka va nolẽle oku sumbila Yehova,

30ka va yonguile alungulo ange, kuenje va lavisa okulonga kuange kuosi,

31oco va lia epako liovituwa viavo, ve kuta enene ovisimilo viavo muẽle.

32Ocili umbinde wa vakuanumbi u va fisa, eveli liaveke li va nyõla.

33U o njeva puãi o kala ciwa, utima u tula, usumba wevĩho mbu.

Jump to: Chapter 2 →