Ruth 4

Umbundu Bible (Embimbiliya - Bíblia Sagrada em Umbundu)

← Chapter 3 Jump to:

1Boasi wa lamanẽla kepandavelo, wa tumãla, kuenje tala, ukuositue waco, una a tukuile, wa vinjuka. Oco Boasi wo pañinya hati, Ove okuetu, pambuka, ndo tumãle kulo; yu wa pambuka, wa tumãla.

2Oco Boasi wa pañinya ekui lialume, akulu vakuimbo liaco, wa popia lavo hati, Tumãli kulo. Kuenje va tumãla.

3Noke wa popia la una ukuositue waco, hati, Naomi, una wa tiuka kofeka ya Moavi, o yongola oku landisa epia lina lia kaile lia manjetu Elimeleke.

4Oco nda sima siti, ciwa oku ku sapuila loku ku vetiya okuti o li landa. Li landela muẽle kovaso ava va tumãla kulo, okuti kovaso akulu vomanu vange. Nda o yongola oku li yovola, li yovola. Puãi nda ku yongola oku li yovola, sapuileko okuti ndi ci kulĩha. Omo ka ku li ukuavo o li yovola te ove; kuenda ame hu kuãi vonyima. Kuenje eye wa kumbulula hati, Ndi li yovola.

5Oco Boasi wa popia hati, Eteke o landa epia liaco peka lia Naomi, hailio eteke o landavo Ruti u Moavi, ukãi wukuakuenda, hu pinduila kocipiñalo cukuakuenda onduko yaye.

6Oco ukuositue waco hati, Oku li yovola si ci tẽla, sanga ci sengisa ocipiñalo cange. Ove muẽle nda ku iha omoko yoku li yovola, omo ame oku li yovola si ci tẽla.

7Ombilo yosimbu yovofeka ya Isareli poku yovola loku fũla ya kala ndomo: Oku malusula ondando yimue, omunu o lula oluhaku, o lu eca kukuavo. Oco ca kaile omemba vi Isareli.

8Oco eci ukuositue waco a popia la Boasi hati, Li landa ño ove muẽle, wa lula oluhaku luaye.

9Oco Boasi wa popia lakulu lomanu vosi hati, Ene, etaili lilo, ene wa lingi olombangi okuti nda landa ale peka lia Naomi cosi ca tiamẽlẽle ku Elimeleke kuenda cosi ca tiamẽlẽle ku Kiliyone la Maheloni.

10Nda landavo Ruti u Moavi, ukãi wukuakuenda Mahilona, ha lingi ukãi wange, okuti onduko yukuakuenda ka yivaliwa la vamanjaye pamue la vakuakuviala vimbo liavo. Ene muẽle wa lingi olombangi viaco etaili.

11Kuenje omanu vosi va kala vepandavelo, kumosi lakulu, vati, Tulombangi. Lukãi waco iñila vonjo yove Yehova o sokise la Rahele kuenda Lea, vana vavali va tunga ocili onjo ya Isareli. Lovevo amamako koku kala ciwa ve Efarata. Kemãla vo Beteleme.

12Onjo yove yi linge ndonjo ya Peresi una Tamare a cita la Yuda, mekonda liomãla Yehova o ku muisa lukãi u.

13Oco Boasi wa tambula Ruti, kuenje eye wa linga ukãi waye. Oco wa enda kokuaye kuenje Yehova wa tava okuti o mina, yu wa cita omõla ulume.

14Oco akãi va popia la Naomi vati, Yehova a sivayiwe, omo etaili lilo ka ku sile ño omo, omõla lakamue. Onduko yaye yi kemãle vo Isareli.

15Kokuove o linga ukuakupindula omuenyo wove haeye o ku tekula eci o kula. Omo ndatembo yove, una o ku sole haeye wa velapo kokuove okuti, omãla epanduvali valume va sule, eye wo cita.

16Naomi yu wa tambula omõlaco, kuenje wo pakata vonete, wa linga uleli waye.

17Oco akãi va lisungue laye vo sapa onduko vati, Ku Naomi kua citiwa omõla ulume. Kuenje vo luka onduko vati, Ovede. Eye isia ya Jese, isia ya Daviti.

18Kaliye ovitumbulukila via va Peresi vievi: Peresi wa cita Hecirone,

19Hecirone wa cita Ramu, Ramu wa cita Aminadava;

20Aminadava wa cita Nasione, Nasione wa cita Salomone;

21Salomone wa cita Boasi; Boasi wa cita Ovede;

22Kuenje Ovede wa cita Jese; Jese wa cita Daviti.

← Chapter 3 Jump to: