Zephaniah 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Ḳhudáwand ká kalám jo sháh i Yahúdáh Yúsiyáh bin Amún ke aiyám meṉ Safaniyáh bin Kúshí, bin Jadaliyáh, bin Amariyáh, bin Hizqiyáh par názil húá.

2Ḳhudáwand farmátá hai, Maiṉ rú e zamín se sab kuchh bi’lkull nest karúṉgá;

3insán aur haiwán ko nest karúṉgá; hawá ke parandoṉ, aur samundar kí machliyoṉ ko, aur sharíroṉ aur un ke butoṉ ko nest karúṉgá; aur insán ko rú e zamín se faná karúṉgá, Ḳhudáwand farmátá hai.

4Maiṉ Yahúdáh par, aur Yarúshalem ke sab báshindoṉ par háth chaláúṉgá, aur is makán meṉ se Ba‘l ke baqiye ko, aur Kamárím ke nám ko pujáriyoṉ samet nest karúṉgá;

5aur un ko bhí jo koṭhoṉ par chaṛhkar ajrám i falak kí parastish karte haiṉ, aur un ko jo Ḳhudáwand kí ‘ibádat ká ‘ahd karte haiṉ lekin Milkúm kí qasam kháte haiṉ;

6aur un ko bhí jo Ḳhudáwand se bargashta hokar na us ke tálib húe, aur na unhon ne us se mashwarat lí.

7Tum Ḳhudáwand Ḳhudá ke huzúr ḳhámosh raho: kyúṉki Ḳhudáwand ká din nazdík hai: aur us ne zabíha taiyár kiyá hai, aur apne mihmánoṉ ko maḳhsús kiyá hai.

8Aur Ḳhudáwand ke zabíhe ke din yúṉ hogá, ki maiṉ umará aur sháhzádoṉ ko, aur un sab ko jo ajnabíoṉ kí poshák pahinte haiṉ, sazá dúṉgá.

9Maiṉ usí roz un sab ko jo logoṉ ke gharoṉ meṉ ghuskar apne áqá ke ghar ko lúṭ aur makr se bharte haiṉ sazá dúṉgá.

10Aur Ḳhudáwand farmátá hai, Usí roz machhlí pháṭak se rone kí áwáz, aur Mishnah se mátam kí, aur ṭíloṉ par se baṛe g̣aug̣á kí sadá uṭhegí.

11Ai Maktís ke rahnewálo, mátam karo; kyúṉki sab saudágar máre gaye; jo chándí se lade the, sab halák húe.

12Phir maiṉ chirág̣ lekar Yarúshalem meṉ talásh karúṉgá, aur jitne apní talchhaṭ par jam gaye haiṉ, aur dil meṉ kahte haiṉ, ki Ḳhudáwand sazá o jazá na degá, un ko sazá dúṉgá.

13Tab un ká mál luṭ jáegá, aur un ke ghar ujaṛ jáeṉge; ghar to banáeṉge, par un meṉ búd o básh na kareṉge; aur tákistán lagáeṉge, par un kí mai na píeṉge.

14Ḳhudáwand ká roz i ‘azím qaríb hai, háṉ, wuh nazdík á gayá; wuh á pahuṉchá: suno; Ḳhudáwand ke din ká shor; zabardast ádmí phúṭ phúṭkar roegá.

15Wuh din qahr ká din hai, dukh aur ranj ká din, wírání aur ḳharábí ká din, táríkí aur udásí ká din, abr aur tíragí ká din,

16hasín shahroṉ, aur úṉche burjoṉ ke ḳhiláf narsinge aur jangí lalkár ká din.

17Aur maiṉ baní Ádam par musíbat láúṉgá, yaháṉ tak ki wuh andhoṉ kí mánind chaleṉge, kyúṉki wuh Ḳhudáwand ke gunahgár húe; un ká ḳhún dhúl kí tarah giráyá jáegá, aur un ká gosht najásat kí mánind.

18Ḳhudáwand ke qahr ke din un ká soná chándí un ko bachá na sakegá; balki tamám mulk ko us kí g̣airat kí ág khá jáegí; kyúṉki wuh yaklaḳht mulk ke sab báshindoṉ ko tamám kar ḍálegá.

Jump to: Chapter 2 →