1 John 5

Makhuwa 2021 (Nleehano Nonaanano Imeetto; Moçambique)

← Chapter 4 Jump to:

1Ntthu nokupali wiira Yesu phiri Kristu yariye ni Nluku, ni ntthu naafenta Athumwane annyanre, ciicammo naanfenta ule nnyanryaya.

2Hi ninaacuwela wiira ninawaafenta asaana a Nluku nanfentaka Nluku n'uttharihelela malamulo awe.

3Kontha nna phi nifento na Nluku, wiira nittharihelele malamulo awe. Ni malamulo awe khahimwena oolemela.

4Kontha ntthu yariye ni Nluku naatthema ittuniya; utthema ittuniya phiri ukupali wihu.

5Tupani notthema ittuniya? Nari hikhanle ule nokupali wiira Yesu ri Mwana a Nluku.

6Yesu Kristu ph'ule wile ni maasi ni iphome. Kahi paahi ni maasi, nanso ciicammo maasi ni iphome. Nnepa Nttakattifu phinvaha usaahiti, kontha uyo Nnepa uyo uri ikhweli.

7Kontha ahaawo araru anvaha usaahiti:

8Nnepa, maasi ni iphome, ni ala araru ala anawiiwanana.

9Nakupaliki usaahiti wa atthu, nicuwele wiira usaahiti wa Nluku phiri muulupale, kontha Nluku phinvaha usaahiti wa Mwanawe.

10Ntthu nonkupali Mwana a Nluku haana mwa yooyo usaahiti. Ule hinonkupali Nluku naamwiirela Nluku namootha, kontha khankupali usaahiti unvahawe Nluku mwa Mwanawe.

11Usaahiti uyo ph'ula, wiira Nluku honivaha ukumi woohimala, ni ula ukumi ula uri mwa Mwanawe.

12Ntthu rina Mwana a Nluku haana ukumi; ule hirina Mwana a Nluku kharina ukumi.

13Nnya citthu nnya kiwantikhenleni wiira ncuwele wiira nhaana ukumi woohimala ni wiira nkupali ncina na Mwana a Nluku.

14Ula phi nkhuluvelo urinehu ni uyo, wiira navekelaka itthu n'utthuna wawe, uyo naaniiwa.

15Ni nacuwelaka wiira uyo naaniiwa yothene inonvekelehu, ninaacuwela wiira nihaakhela ivekenlehu.

16Ntthu amoonaka munnawe apankaka itampi ihinonrweeha wukhwani, avekele, ni Nluku naahala unvaha ukumi ule kosile. Akinaaca itampi yonrweeha wukhwani. Ihaawo itampi inrweeha wukhwani. Yeeyo akineera avekeleliye.

17Yoonanara yothene iri itampi, ni ihaawo itampi ihinrweeha wukhwani.

18Nihocuwela wiira ntthu yariye ni Nluku, khampanka itampi, nanso ule yariye ni Nluku naansunka, ni Ntakhali khanonkwanya.

19Nihocuwela wiira niri a Nluku, ni ittuniya yothene ihothawaliya ni Ntakhali.

20Ciicammo nihocuwela wiira Mwana a Nluku howa ni honivaha ankhili wiira nincuwele yooyo ri eekhweli. Ni hi niri mwa Yesu Kristu, yooyo ri Mwanawe eekhweli. Ula phi Nluku eekhweli ni ukumi woohimala.

21Paahi, asaanaka, mwiinemecere mwa anluku oohikhweli.

← Chapter 4 Jump to: