1 Peter 5

Makhuwa VMK (Emakhuwa Bible)

← Chapter 4 Jump to:

1Ntoko mutokweene mukina, kingwooperera asitokweene ari variyariwanyu, kireene namoona a ohaawa wa Kristu, ni woonaka weera nkikhale mpatta wa ovuwa oneera wooniheriwe.

2Mukukhule muhuwo wa Muluku ori wa olamulawanyu. Mweettiheke yoowo, ohikhanle moonyesereriwani, mene ni murima wootheene, ntoko Muluku ontthunaawe; ohikhanle niwoko na milili, mene ni soohaawela sa orumeela;

3ohikhanle, ntoko atthu anaalamula yaawo muvahereriwaanyu, mene ntoko ethoonyero wa muhuwo.

4Iixooniheraka Mukukhuli Mutokweene, nyuwo mmwaakhele ecireemba yoohiriheya ya ovuwa.

5Mooteene yoowo, amiravo, ngwiiwelele asitokweene. Mukhale ootheene oowiiyeviha mukina ni mukhwaawe, niwoko “Muluku ti Mwiittana a oowiixoona, mene onaavaha mahala oowiiyeviha.”

6Tivawo, mwiiyevihe vathi va ntata na ikuru sootheene na Muluku, weera Owo oovuwiheni ehuhu yootthuneya.

7Mumvaherere Yoowo sooweeteteela sootheene, niwoko Owo onookosoopani nyuwo.

8Muhule maithwaanyu a mmunepani ni muwehawehe, niwoko mwiittanaanyu, Diyabu*, oneetta oorukureerakani, ntoko mwatto oniipa, amwaasaka taani aneeraawe angwere omukhuura.

9Munkhootte, mukhalaka oolipa munroromeloni, musuwelaka weera axunninyu a mweelaponi yootheene anghaawa ni soohaawasene seiyo.

10Vahoolo woohaawa ehuhu vakhaani, Muluku a mahala ootheene, mwa Yoowo owiitthanenleni ovuwawawe woohimala mwa Kristu Yeesu, anookwaneliheni, anookhaliheni, anoolipiheni ni anaaweemexeni.

11Wa Yoowo sikhale ikuru soohimala. Ame*.

12Kohoolepelani nyuwo ni ekhavihero ya Silvano, mwa yoowo miyo kimmoonaaka weera ori munna oororomeleya, weera koolipiheni, nitho kikhalele onamoona weera ala ti mahala a ekhaikhai a Muluku. Mwa yaawo, mupwaherere oolipeene!

13Ekerexa ya oBabiloniya, yeeyo eritho yoothanliwa, enimoovahani isalaama, nitho mwanaka Marku.

14Muulumihaneke mukina ni mukhwaawe ni ebeecu ya osivela. Murettele okhale wa nyuwo ootheene muri mwa Kristu.

← Chapter 4 Jump to: