Genesis 32

Makhuwa VMK (Emakhuwa Bible)

← Chapter 31 Jump to: Chapter 33 →

1Vanonto, Yakobe aapwaherera ni mukwaahaawe, anaakumanano andyelo a Muluku.

2Yakobe awoonakaru, aakhuwela: “Ala ti anakhotto a Muluku!” Tivawo aattenghaawe nipuro nne Manayimi.

3Yakobe aahaarumiha anamitthenga ohoolowawe, wa munneiye Esawu, aari muttetthe wa oSeyiri, mweelaponi ya wEdomi.

4Vano aahaalamulela: “Nyuwosa mweere ha wa pwiiyaaka Esawu: ‘Murumeiyaanyu, Yakobe, oneera ha: ‘Kookhala vaate wa Labani ni yoowo kilekelaka mpaka vaanaanova”

5Kookhalano imombe, abuuru, ikhondoolo, ipuri ni arumeiyi asithiyana nitho asilopwana. Vano kinrumiha mutthenga ola wa pwiiyaaka weera mukaakhelele nnenesene.’”

6Anamitthenga yaahokoleenlaaya wa Yakobe, yaamweerela: “Noophiya waamunnawaanyu Esawu. Awo eneera ewaaka vamoha ni asilopwana macira maxexe weera yoociceereni.”

7Yakobe aasareya woova vancipale ni aatthukuruma. Aahaakawanyiha mikuttula miili ootheene aaraaweno, hiihotho ikhondoolo, imombe, ipuri ni ikamelu*.

8Vano uupuwenle ha: “Esawu awanano mukuttula mmoha, mukina onimoopowa.”

9Yakobe aavekela: “Ii! Muluku a apwiyaaka Abrahaamu ni a atithaka Isaki, Yave mukeerenle: ‘Muhokoleele elapwaanyu ni wa amusaanyu ni Miyo nkiweettihereni sootheene nnenesene,’

10vano miyo koosuwela weera nkiphwanenle onnene wootheene, ni ororomeleya mumpakenlaanyu murumeiyaanyu. Kaamulapuwaaka mooloko Yordanu, kaarino ekopowaaka paahi, mene vano kookhalano sooreela ni asinama ancipale.

11Dyoontte, mukoopole mmatatani mwa amunnawaaka Esawu. Kinoova weera animoowa okiwanano miyo, asimaayi, anamwane, asithiyana, nitho anamwane.

12Nyuwo moororomeliha weera munookeettihera nnenesene sootheene, nitho ekhapiraaka enimwaandyeerereya, ntoko muhaava wa mphareiya, ohinaalikeleya.”

13Evirihakaru ohiyu wootheene aathanla mmuhuwonimwawe yoowaavaha amunnawaawe Esawu inama iya:

14Ipuri ithiyana macira meeli, anapunsi miloko miili, ikhondoolo ithiyana macira meeli ni ilopwana miloko miili,

15Ikamelu* ithiyana miloko miraru ni axaanaaya, imombe ithiyana miloko mixexe, imombe ilopwana muloko, abuuru athiyana miloko miili, ni alopwana muloko.

16Khula muhuwo aamvaherera murumeiyaawe amweerelaka: “Muroweke ohoolowaka, murakamelaneke mukina ni mukhwaawe.

17Wa yoole aahoolenle aamweerela ha: “Waakumanano amunnawaaka Esawu ni yookoha weera nyuwo awani, munkela woowi, ni muhuwo wootheene ola wawani, vano weyo wawaakhule ha:

18‘Iya ti sa murumeiyaanyu Yakobe. Ti yoowaavaha apwiyaaka Esawu. Yakobe oneera awaaka ottuliwahu.’”

19Wa anaaveeli, anaararu ni ootheene yaahoola mihuwo, aahaalamulelatho: “Mwaaleeleketho masweene yaawo mwaakumanano Esawu.

20Mwaweereleketho: ‘Murumeiyaanyu Yakobe oneera awaaka ottuliwahu.’” Yakobe uupuwela ha: “Miyo kintthuna oriiriha murima wa amunnawaaka ni soovaha iya kinrumihaaka miyo kihinaaye. Kapena kaawaaka ekaakhele.”

21Hiiho soovaha sa Yakobe saahoolela, mene owo muneenaawe aaviriha ohiyu waakonelingwe.

22Ohiyuweene yoole, Yakobe aavenya aakuxaka axaariye eeli, arumeiyaawe eeli ni anamwanaawe muloko nimmoha weera elapuwe nxaapwa Yaboke.

23Aalapuxakaru ootheene nxaapwa, aalapuxatho itthu sootheene aarinaawe.

24Yakobe aahanle meekhaawe ni aahoowa mulopwana mmoha, anamukhittaanano mpaka oxa.

25Oonaka mulopwana ole weera nkingwera ongwina, aamuttiindanyiha ommela mwetto wa Yakobe ekhittaanaka.

26Mulopwana ole aamweerela: “Mukihiye kirowe, niwoko wohooxa.” Yakobe aamwaakhula: “Nkinoohiyani murowaka muhinaaye okireeliha”

27Mulopwana ole aamukoha: “Nsinananyu taani?” Yakobe aamwaakhula: “Yakobe.”

28Vano mulopwana ole aaheera: “Nsinananyu khanirwa niitthaniwatho Yakobe, mene Yixrayeli, niwoko nyuwo moowana ni Muluku, nitho atthu, munawina,”

29Yakobe aapwaherera: “Dyoontte mukileele nsinananyu.” Vaheera Owo aamwaakhula: “Munkohera heeni nsinanaka?” Ni vaavaale aamureeliha.

30Yakobe aatteha nipuro nne Peniyeli, eeraka: “Koomoona Muluku ttunda ttunda, Wa soothesene, okumaaka wohuureleya.”

31Nikhumaka nsuwa, aalapuwa oPeniyeli atuthunyaka mwaha wa ottiindanyihiwa.

32Tivawo, mpaka olelo va, aYixrayeli ahinkhuuraaya musemba onkumana omenlaayawo mwetto, niwoko ti musembeene yoowo Yakobe aattiindanyihingwaawe.

← Chapter 31 Jump to: Chapter 33 →

Recommended Reading

Commentary Genesis Commentaries → Devotional Genesis Devotional Guide → Get This Bible Makhuwa VMK (Emakhuwa Bible) Study Bible →