Leviticus 9

Makhuwa VMK (Emakhuwa Bible)

← Chapter 8 Jump to: Chapter 10 →

1Vanihukuni nanaathannamararu Moisesi aamwiitthana Aharoni ni anamwane asilopwana nitho asitokweene a aYixrayeli.

2Aamweerela Aharoni: “Munkuxe mwaamombe mulopwana wa yooveleelela yoottheka ni napunci wa yooveleela yoohisa, ooweeli oohirakala, muruuheke vamaithoni wa Yave.

3Vahoolowaya mwaaleele aYixrayeli: ‘Munruuhe napunci wa yooveleelela yoottheka, mwaamombe ni eputtiputthi, soopiili iyo sa eyaakha emoha ni soohirakala wa sooveleela soohisa,

4ni emombe ni napunci wa yooveleelela murettele weera mveleele vamaithoni wa Yave vamoha ni yooveleela ya irooro sooweetheiwa ni makhura. Niwoko olelo Yave onimwiixoonihera wa nyuwo.’”

5Awosa yaaruuha itthu Moisesi aalamulenlaawe ohoolo wa Eheema ya Muthukumano* ni muloko wootheene waakhuveela, oneemela ohoolo wa Yave.

6Vano Moisesi aaheerela: “Ti seiya Yave oolamulenlaaweni opaka weera ovuwa wa Yave wiixoonihere wa nyuwo.”

7Moisesi aamweerela Aharoni: “Murweeke valtaarini*, mwapakele yooveleelelaanyu yoottheka ni yooveleelaanyu yoohisa, mwiirehererele wiiwanana ni Yave, mwareherereletho muloko; mwapakele yooveleela muloko ni mwarehererele wiiwanana ni Yave, ntoko Owo aamulamulenlaawe Moisesi.”

8Vano Aharoni aarowa valtaarini*, anamwiiva mwaamombe ntoko yooveleelela yootthekaawe.

9Anamwanaawe yaamuruuhela ephome ni owo aaxuweyamo ekathaawe, anahinga manyaka a valtaarini*; ephome yaahanle eyo aayeehera vathi valtaarini*.

10Owo aahisa valtaarini* makhura, miso, makhura aninghuruwela hapa a yooveleelela yoottheka, ntoko Yave aamulamulenlaawe Moisesi.

11Wa soothesene etthai ni exapala aahisera okhwipi wa okonelingwe.

12Vanonto aahiiva yooveleela yoohisa. Anamwanaawe yaamwinnyerera ephome ni owo aayeehera mukhwipi wa altaari*.

13Woottharelana yaamwinnyerera yooveleela yoohisa intthuri intthuri vamoha ni muru, anahisera seiyo valtaarini*.

14Aarapiha marupo ni nyetto, anahisera vasulu wa yooveleela yoohisa valtaarini*.

15Vahoolowaya Aharoni aarongha yooveleela wa muloko. Aamukuxa napunci a yooveleelela yoottheka ya muloko, anamwiiva, anamveleelela soottheka ntoko aapankaawe ni yoopacera.

16Aakuxa yooveleela yoohisa, anaveleela yeeyo attharaka soonyesererihiwa sa sooveleela.

17Aaruuhatho yooveleela ya irooro, ananyottola, anahisera valtaarini*, ohiya sa sooveleela soohisa sa oxeexelo.

18Aahiiva emombe ni napunci ntoko yooveleelela murettele wa muloko. Anamwanaawe yaamuruuhela ephome ni owo aayeehera mukhwipi wa altaari*.

19Vaheera mipatta sa makhura a emombe ni napunci –mwiila wooneneva, makhura anghuruwela marupo, miso ni hapa –

20seiye yaahiikaathi vahoceni, ni vano Aharoni aahisa iyo valtaarini*.

21Aharoni ahiinainihera ihoce ni vatakhwini yoolopwana vamaithoni wa Yave ntoko yooveleela yoowiinainiheriwa, ntoko Moisesi aalamulenlaawe.

22Vahoolowaya Aharoni aaheemexera matata muloko, anareeliha. Amalihaleene opaka yooveleelela yoottheka, yooveleela yoohisa ni yooveleelela murettele, aakhuruwa.

23Moisesi ni Aharoni yaavolowa Muheemani ya Muthukumano*. Ekhumakaru, yaareeliha muloko ni ovuwa wa Yave waahiixoonihera wa muloko wootheene.

24Yave aarumiha mooro onahisa yooveleela yoohisa ni mipatta sa makhura valtaarini*. Muloko wootheene woonakaru yeeyo, waakhuwela ni ohakalala, onuuramihela vathi ekhovaaya.

← Chapter 8 Jump to: Chapter 10 →