2 Timothy 4

Adilabad Gondi (ఆదిలాబాద్ గోండి పూన నియమ్)

← Chapter 3 Jump to:

1ఉందుంది జోక వాసి తన్వ రాజ్ తాకుస్వల్ అని సాతుర్కున్ అని పిసి మన్వలిర్‌కున్ తస్వ కియ్వల్ యేసు కిరిస్తున నదుడున్ మునె, అని బగవంతన నదుడున్ మునె గిర్, నీకున్ వెహ్వల్ బతల్ ఇత్తెకె, బగవంతన కబుడున్ పచర్ కియ్లె, హర్ గట్క తయర్ మన్. గల్తిన్ సుద్రి కీమ్, దమ్కి సీమ్ అని గటి-దీర్య సీసెర్ వోర్చి, వూర్కున్ కరుసెర్ మన్.

3బారితెకె పర్జ చొకొట్న బోదతున్ కేంజ్వక్‌నె మన్వల్ వకత్ వాంత. వూర్ తమ్వ ఇచ మత్త తీర్ కీంతెర్. సిరిప్ తమకున్ కేంజ వస్తంగ్ అవ్ బోదంగ్ వెహ్వలిర్ గురుర్కునె తమ్వ సిర్ముట్ మీరి కీంతెర్.

4వూర్ సతున్ కేంజ్వక్‌నె లంగ్ దాంతెర్ అని బని కీసి వెహ్వలికున్ కేంజ్లె కరుమ్ వాంతెర్.

5బతి నిమె హర్ వకత్నె మన్దున్ జరబ్నె ఇర. తక్‌లిబ్ బోగె మాయ్లె తయర్ మన్. చొకొట్న కబుడున్ పచర్ కియ్లె కాయ-కస్టమ్ కీమ్. నీవ సేవత కామ్నగ జిమెదారి యేత.

6నావ పూరొ జిన్గనితున్ అర్పనతున్ మోడి సీతొన్. నావ జీవ సుటి కీసి సొన్వల్ గట్క కరుమ్ యెవ్త.

7యేసున్ పొరొ ఇర్త బరొసత పోటితగ, నన బెయ్ చొకొట్ విత్తొన్. బరొసతల్ బహ్కె మాయ్వక్‌నె విత్వల్ పూరి కీతొన్.

8ఇంకె నా సాటి నియత్న కిరిట్ తయర్ మంత. నియత్నె తస్వ కియ్వల్ పర్బు తన మల్సి వాయ్వల్ దినమున్ నేటి, నాకున్ అద్ కిరిట్ ఇనమ్ సీంతొర్. నాకునె ఆయ్వ, పర్బున మల్సి వాయ్వల్ దినమున్ సాటి, బెయ్ ఆసతె సూడ్వలిర్ సమ్దిర్‌కున్ అద్ ఇనమ్ పుటంత.

9నహ్గ వెయ్నె వాయన్ సాటి కోసిద్ కీమ్.

10బారితెకె దేమల్ ఇద్ దునియతంగ్ ఆసన్ పొరొ అర్సి, నాకున్ సుటి కీసి తెసలోనిక నగుడె సొత్తొర్. కెరస్కల్ గలతియ యేరియతె సొత్తొర్. తీతు దల్మతియ యేరియతె సొత్తొర్.

11సిరిప్ లూకలె నా సంగ మంతొర్. మార్కు బగ మంతొరొ కరి కీసి, నీ సంగ పియ్సి వర. వోర్ ఇద్ సేవత కామ్నగ నాకున్ చొకొట్ సాత్ సీంతొర్.

12నన తుకికున్ ఎపెస్ నగుడె సారి కీతొన్.

13త్రోయ నగుడె కర్పస్ ఇన్వన రోన్ నావ గర్మి కోట్ అని పుస్తక్ గిర్ ఇర్సి వాతొన్. తిమొతి నిమె వానెకె, అవెన్ పియ్సి వర. ముకె బతల్ ఇత్తెకె, తోల్దె తయర్ కీతంగ్ కాగుత్కున్ మరుంగ్వక్‌నె తర.

14అలెగ్‌జాండర్ ఇన్వల్ కాతి నాకున్ వెలె తక్‌లిబ్ సీతొర్. అహన్ సీత తక్‌లిబున్ పియ్సి, పర్బు వోన్ బరొబర్ సిక్స వాటంతొర్.

15మరట్ వెహ్వల్ బోదతున్ బెయ్ బయ్మన్ వడ్క్‌తొర్. అదెన్ సాటి వోన్ బారెతె నిమె గిర్ వెలె దిహన్తె మన్.

16నాకున్ మొదొల్ జోక తస్వ కియ్వలిర్ అదికారిర్ మునె తత్తెర్ అస్కె, బోరె మదత్ కియ్మకి. నాకున్ వొరొనె సుటి కీసి, సమ్దిరె సొడితెర్. బగవంతల్ వూర్కున్ మాపి కియిర్.

17నా హిందల్ సమ్దొ యూదుల్క్ ఆయుర్ వూర్ సమ్దిర్‌కున్, ఇద్ చొకొట్న కబుర్ బర్పుర్ పచర్ ఆయన ఇంజెరెన్, పర్బు నా బగ్ల నిల్సి, నాకున్ సక్తి సీతొర్. మరన్తల్ గిర్ నాకున్ బచి కీతొర్.

18వాయ్వల్ హర్ సంకట్నల్ పర్బు నాకున్ బచి కీసి, స్వర్గ్‌నగ మన్వల్ తన్వ రాజ్నగ చొకొటె వోంతొర్. వోర్ పర్బున్ బర్పుర్ మయ్మ పిడినంగ్-పిడింగ్ వాయి! ఆమెన్.

19పిరిస్కిల బాయిన్, అకుల దాదన్, వొనేసిపోరన్ అని వోన కుటుంబతుర్కున్ నావ దండొస్ వెహ.

20కొరంతి నగుడగన్ ఎరస్తు రెహె మాతొర్. తొర్పిమ్ ఇన్వల్ బేమరితె మత్త కాడ్కి, వోన్ మిలెతు చహర్తె సుటి కియ్వల్ ఆత.

21పీని-గాలుమ్ వాయ్వక్ మునెన్ నిమె ఇగె వాయ్లె కోసిద్ కీమ్. యుబూలు, పుదెన్స్, లినస్, కలవ్‌దియ అని మెయ్తుర్ సమ్దిర్ దాదలిర్-బాయిక్ నీకున్ దండొస్ వెహ్చెర్ మంతెర్.

22పర్బు నీవ ఆత్మతున్ సంగ మనిర్ అని వోన పెర్మత-దయ మీ పొరొ మని.

← Chapter 3 Jump to: