Ephesians 2

Adilabad Gondi (ఆదిలాబాద్ గోండి పూన నియమ్)

← Chapter 1 Jump to: Chapter 3 →

1ఇదెన్ మునె మిరట్ కసుక్నగ అని పాప్నగ కోండె మాసి, బావ్-బక్తితగ సాతపినయ్ మత్తిట్. అస్కె బగవంతల్ సియ్వల్ కరల్ జిన్గని మీకున్ పుట్లెకె మత్త.

2మొదొల్ మిరట్ దునియతుర్ తాక్త తీర్ తాక్తిట్ అని బూత్క్‌నొర్ అదికారి వెహ్త తీర్ పిసెర్ మత్తిట్. వేర్ అదికారి బగవంతన్ ఉల్ట పిస్వలిర్ రొపొ మంజి, తాకుసెర్ మంతొర్.

3మరట్ గిర్ కరెబలిక్ ఆసన్ పియ్సి, మాయ్నన సాదరన్ గున్తల్ పుట్వలిక్ ఆసన్ పియ్సి, మావంగ్ సోంచ్-విచర్కున్ పియ్సి, వూర్ మోడి పిసెర్ మత్తట్. అహన్ మా పొరొ గిర్ బగవంతల్ తన్వ సోంగ్ తొహ్నల్ పిస్తట్.

4బతి బగవంతల్, మాకున్ వెలె పెర్మ కీత కాడ్కి, వోన్ మా పొరొ బెయ్ కివుల్ లాగ్త.

5తె మరట్ పాప్క్‌నె బావ్-బక్తితగ సాతపినయ్ మనెకె గిర్, బగవంతల్ మాకున్ కిరిస్తున్ సంగ నేండుస్తొర్. ఇద్ బచె మాయ్వల్ కామ్ సిరిప్ వోన పెర్మత-దయతెన్ ఆయ పర్త.

6అచొరె ఆయ్వ, యేసు కిరిస్తునగ మరట్ యెకి ఆసి మత్త కాడ్కి, వోన్ బరొబర్ స్వర్గ్‌నగ రాజ్ తాకుస్లె, బగవంతల్ మాకున్ కిరిస్తున్ సంగ నేండుస్తొర్.

7బారితెకె, యేసు కిరిస్తున్ హిందల్ తన్వ లెక కియ పరుర్ అచొర్ పెర్మత-దయతున్ అని చొకొట్-పాన్దున్ వాయ్వలిక్ పిడినగ మా పొరొ తొహన ఇంజెరెన్ బగవంతల్ అహన్ కీతొర్.

8మిరట్ బరొసతున్ హిందల్ పెర్మత-దయతెన్ బచె మాతిట్. ఇద్ మీవ కెయ్దె జర్గ్‌మకి, బతి బగవంతన వరమ్నెన్ జర్గ్‌త.

9కామ్ కియ్వడున్ హిందల్, అద్ బచె మాయ్వల్ కామ్ జర్గ్‌వ కాడ్కి, బోరె పోక్డ కీసెర్ వెహ్లె మోక సెలె.

10బారితెకె, బగవంతలె మాకున్ గడి కీతొర్ ఆందుర్. మరట్ యేసు కిరిస్తున్ హిందల్ చొకొట్నంగ్ కామ్క్ కియన్ సాటి గడి కీతొర్. అవ్ బవ్ కామ్క్ ఇన్వల్ మునెనె నేమి కీతొర్.

11దాదలిర్-బాయిక్నిట్! బగవంతల్ మీకున్ బచి కియన్ మునె, మిరట్ యూదుల్క్ ఆయుర్ వూర్ ఆసి బహన్ మందిటొ, అదెన్ మరుంగ్మట్. అస్కె తోల్ కత్రి కియుస్తుర్ మీకున్ చుడుర్-పాన్దె సూడ్సెర్, “తోల్ కత్రి కియుస్మకి వూర్” ఇంజెర్ కేయ్న్‌దిర్. అద్ కార్య సిరిప్ మేందొడగ కెయ్దె కియుసీందిర్ బతి, ఆత్మతె జర్గ్‌త కార్య ఆయొ.

12అద్ గట్కతె మిరట్ కిరిస్తున్ కరి కియ్వ కాడ్కి, బగవంతనల్ లంగ్ మంజి పిస్తిట్. బగవంతల్ నేమి కీతుర్ వూర్ ఇజ్రయేల్ లోకుర లెకతగ మిరట్ వాయ్మకి. బగవంతల్ వూర్కున్ సీత నియమ్నగ మన్వలిక్ బవె వాగ్దన్‌క్నగ ఈసదార్క్ ఆయ్వక్ మిరట్ మత్తిట్. బహన్ ఇత్తెకె, బచె మాంతట్ ఇన్వల్ ఆస సెల్వక్‌నె, ఇద్ దునియతగ బగవంతన్ కరి కియ్మకి వూర్ మోడి మిరట్ పిస్తిట్.

13బతి మొదొల్ బగవంతనల్ లంగ్ మన్వలిర్ మిరట్, యూదుల్క్ ఆయ్వలిర్ మా మోడి, ఇంకె యేసు కిరిస్తునగ యెకి ఆతతున్ హిందల్ అని వోర్ సీత అర్పనత నెతుడున్ హిందల్, బగవంతన్ కరుమ్ ఆతిట్.

14బారితెకె, సిరిప్ కిరిస్తుయె యూదుల్క్ ఆయ్వలిర్ మాకున్ అని యూదుల్క్ ఆయ్విట్ వూర్ మీకున్ బగవంతన్ సంగ మీరి కీసి, సాంతి సియ్వల్ ఆందుర్. వోర్ తన్వ మేందొడ అర్పన కియ్వడున్ హిందల్, మా నడ్డుమ్ మన్వల్ పగ ఇన్వల్ గోడతున్ ఉల్టి కీతొర్. బహన్ కీతొర్ ఇత్తెకె, యూదుల్క్‌న దర్మత కానున్తగ మన్వలిక్ ఆగెన్ తన్వ అర్పనతున్ హిందల్ అగట్కె ఆపుస్తొర్. అదెన్ సాటినె, మమొట్ అని మిరట్ సాంతితగ యెకి ఆయ పర్తట్. వోన్ హిందల్, మరట్ సమ్దిర్ ఉంది పూన వర్గతుర్ ఆయన ఇంజెరెన్ కిరిస్తు అహన్ కీతొర్.

16ఇద్ తీర్దె, కిరిస్తు తన్వ పరన్ మొద్నగ సియ్వడున్ హిందల్, మా నడ్డుమ్ మన్వల్ పగతున్ తెండ్సి వాడ్తొర్ అని రండ్ వర్గనుర్ ఆయ్వలిర్ మాకున్ ఉంది మేందొడున్ మోడి యెకి కీసి, బగవంతన్ సంగ మీరి కీతొర్.

17కిరిస్తు ఇద్ దునియతగ వాసి, బగవంతనల్ లంగ్ మన్వలిర్ మీకున్ అని కరుమ్ మన్వలిర్ మాకున్ సాంతిత చొకొట్న కబుర్ వెహ్తొర్.

18వోన్ హిందలె, రండ్ వర్గనుర్ ఆయ్వలిర్ మరట్ ఉందియ్ ఆత్మతున్ హిందల్, బాబొ బగవంతన చర్నతె సొన్లె, మోక పుడ్త.

19అదెన్ సాటి, మిరట్ ఉండె గిర్ దుస్రొక్ జాతినుర్ అని ముసపరిర్ ఆయ్విట్. బతి యేసునగ బరొస ఇర్వల్ పర్జత గురుప్నగ ఉంది ఆసి, బగవంతన రోతుర్ ఆతిట్.

20ఉంది రోతున్ మోడి మిరట్ బునదిత్ పొరొ నివ్డె మాతిట్. అద్ బునది కిరిస్తునుర్ అపొస్‌తుల్క్ అని పర్‌వక్తలిర్ వెహ్త బోదయ్ ఆంద్. ఇద్ బునదిత్ ఆదర్ ఆయ్వల్ మూలత ముకె బండ యేసు కిరిస్తు ఆందుర్.

21వోర్ కిరిస్తున్ హిందల్, దొహ్వల్ హర్ ఉంది బాగమ్ కటుసి, పర్బున పవిత్ర మందిర్ బెయ్ చొకొట్ నివ్డె మాసెర్ మంత.

22వోన్గ మిరట్ గిర్ ఆత్మతున్ హిందల్ యెకి ఆసి, బగవంతల్ మనల్ అద్ మందిర్తున్ మోడి నివ్డె మాసెర్ మంతిట్.

← Chapter 1 Jump to: Chapter 3 →