Hebrews 4

Adilabad Gondi (ఆదిలాబాద్ గోండి పూన నియమ్)

← Chapter 3 Jump to: Chapter 5 →

1బగవంతన ఆరమ్న జాగతగ సొన్వల్ వాగ్దన్, ఇంకె ఉండె గిర్ అహ్నె మంత. ఇదెన్ హిందల్ అగ సొన్వల్ మోకతున్ మిహ్గటల్ బోరె సుటి కియ్వక్‌నె, మందన ఇంజెర్ వెరెతె అని దిహన్తె మంద్కట్.

2మరట్ చొకొట్న కబుడున్ బారెతె కేంజ్తపినయ్, వూర్ తొత్తుర్ గిర్ అద్ ఆరమ్ యేత్వడ గొస్టితున్ బారెతె కేంజ్తెర్. బతి అద్ గొస్టితున్ పొరొ బరొస ఇర్మకి. అదెన్ సాటి వూర్కున్ అద్ గొస్టి బతయ్ కామి సియ్మకి.

3ఆరమ్న జాగత చొకొట్న కబుడున్ పొరొ, బరొస ఇర్వలిర్ మరట్, తప్వక్ బగవంతనగ సొంద పరంతట్. బతి బరొస ఇరుర్, “‘వూర్కున్ నావ ఆరమ్న జాగతగ బస్కెన్ వాయ సియొన్’ ఇంజి సోంగ్నె ఆడ వాడ్తొన్” ఇంజెర్ బగవంతల్ ఇత్తొర్. బతి ఇద్ ఇంకె, మన్వల్ ఆరమ్న జాగ కలి గడె మాత అగటలె మంత ఇంజెర్ మాకున్ టావ.

4బతి ఆరమ్న దివొసున్ బారెతె, “బగవంతల్ కలి గడి కియ్వల్ మహ్త పెజె, యేడుంగ్ రోజ్క్‌నె ఆరమ్ యేత్తొర్” ఇంజెర్ లిహి కీసి మంత.

5ఉండె ఉంది జోక, “వూర్కున్ నావ ఆరమ్న జాగతగ బస్కెన్ వాయ సియొన్” ఇంజెర్ వెహ్తొర్.

6ఇదెన్ మునె, మా తొత్తుర్ చొకొట్న కబుడున్ పొరొ బరొస ఇర్వ సొంజి, వూర్కున్ అద్ ఆరమ్న జాగతగ సొన్లె మోక పుట్మకి. బతి కహి లోకుర్కున్, అద్ ఆరమ్న జాగతగ సొందన్ సాటి, ఉండె గిర్ మోక మంత.

7అదెన్ సాటినె, బగవంతల్ ఉండె ఉంది దివొసున్ నేమి కీసి ఇర్తొర్. అదెనె ‘నేట దివొస్’ ఇంతొర్. నన మీకున్ మునె లిహి కీతపినయ్ వెలె సాల్క్ ఆత పెజె, “మిరట్ నేట దివొస్నె బగవంతన గొస్టి కేంజ్కిట్‌తె, మీవంగ్ దిల్క్‌నగ మూజొర్క్ ఆయ్మట్” ఇంజెర్ దావిద్న కెయ్దె వడ్కుసీతొర్.

8యెహోసువల్ వూర్కున్ ఆరమ్ సియ్మడ్ ఇత్తెకె, బగవంతల్ ఉండె ఉంది దివొసున్ బారెతె వెహ్వక్ మందుర్.

9అదెన్ హిందలె, బగవంతల్ యేడవ దివొస్నె ఆరమ్ యేత్తపె, తన్వుర్ బక్తలిర్‌కున్ అద్ ఆరమ్న దివొస్ నిల్సి మంత.

10బగవంతల్ తన్వ కామ్నల్ ఆరమ్ యేత్తపె, వోనుర్ బక్తలిర్ గిర్ ఆరమ్న జాగతగ సొత్త పెజె, వూర కామ్ మార్సి దాంత.

11బగవంతల్ వెహ్త తీర్ తాకొర్ వోర్, తొత్తుర్ ఇజ్రయేల్ పర్జతున్ దాత్, హుకుమ్ పియ్సి తాకొర్ వోర్ ఆంతొర్. అదెన్ సాటి, అద్ స్వర్గ్‌న ఆరమ్న జాగతగ సొందన ఇంజెర్ మరట్ సమ్దిర్ వెరిసెర్ ఉయ్సర్‌తె కోసిద్ కీకట్.

12బారితెకె బగవంతన వచన్ జీవ వాలె అని సక్తి వాలె ఆంద్. అద్ వచన్ రండ్ కాకున్ దార్ మన్వల్ తల్వర్‌తున్ తెర్, అదిక్ దార్ వాలె ఆంద్. అద్ తల్వర్ కీల్చన్ అని మూల్గెన్ బహన్తె చీరి కీంతయొ, అహ్నె మాయ్నన ఆత్మ అని పరన్తున్ రొపొడంగ్ విచర్కున్ గిర్ బహ్రి వాట్సి, తస్వ కీంత.

13ఇద్ కలితగ మన్వల్ బదె వస్తు గిర్, వోర్ బగవంతన నదుడల్ తపుస పరొ. కడ్కున్ మునె వోడ్తపినయ్, సమ్దితున్ తాత్కర్ సూడ పరంతొర్. అహన్ సూడ్వల్ బగవంతన్, మరట్ మా బారెతె లెక వెహ లాగర్.

14స్వర్గ్‌నగ సొత్తొర్ వోర్ యేసు బగవంతనొర్ మరి ఆందుర్. వోరె మా సమ్దిరొర్ పెర్సొర్ కటొడల్ ఆందుర్. అదెన్ సాటి, మరట్ బరొస ఇర్సి, సమ్దిర్ మునె వొప్త అదెన్, సుటి కియ్వక్‌నె గట్ మంద్కట్.

15మావొర్ పెర్సొర్ కటొడల్ మావ కమ్జొర్ పాన్క్ కరి కీసి, మా పొరొ వోన దిల్ నోంత. బారితెకె వోర్ యేసు, మా దాతె హరియేక్ పరిక్సన్ బోగె మాతొర్, బతి బదె పాప్ కియ్మకి.

16అదెన్ సాటి గటి-దీర్య కీసి, బగవంతన్ కరుమ్ దాకట్. అహన్ సొత్తెకెన్, బస్కె పహ్జె మత్తెకె అస్కె, వోర్ బగవంతన కివుల్ అని పెర్మత-దయ మాకున్ పుటంతంగ్.

← Chapter 3 Jump to: Chapter 5 →