Jude 1

Xhosa 2024 (ITestamente Entsha)

Jump to:

1uYuda, umkhonzi kaYesu Kristu, umzalwana kaYakobi, ubhalela abangcwalisiweyo nguThixo uYise, nabagcinelwe uYesu Kristu, ababiziweyo;

2Makwandiswe kuni inceba, noxolo, nothando.

3Zintanda, ndikukhuthalele ngenyameko yonke nje ukunibhalela ngalo usindiso esidlelana ngalo, kwafuneka ukuba ndinibhalele, ndinivuselele, ukuba niluzamele ukholo abalunikelwayo kwakanye abangcwele.

4Kuba kuthwethwe bantu bathile; abo babebalulelwe ngenxa engaphambili kolo lugwebo, abangahloneli Thixo, belujikela eburheletyweni ubabalo lukaThixo wethu, bemkhanyela okuphela koMnini-nto-zonke, uThixo wethu, iNkosi yethu uYesu Kristu.

5Ndithanda ukunikhumbuza, nangona nikwazi oku kakade, ukuba iNkosi, yakuba ibasindisile abantu emhlabeni waseYiputa, yathi ngokwesibini yabatshabalalisa abo bangakholwanga.

6Kananjalo izithunywa zezulu, ezo zazingalugcinanga ulawulo lwazo, zesuka zalishiya ikhaya lazo, izigcinele umgwebo womhla omkhulu ngemixokelelwane engunaphakade, phantsi kwesithokothoko.

7Njengokuba iSodom neGomora, nayo imizi engakuyo, yenza kakhulu umbulo ngohlobo olufana nolwazo ezo, imka ilandela nyama yimbi, ibekwe ekuhleni ukuba ibe ngumqondiso, iviswa ubetho lomlilo ongunaphakade.

8Kwangokunjalo nabo aba baphuphayo badyobha inyama, batshitshise ubukhosi, banyelise izikhakhamela.

9Kodwa uMikayeli, isiphatha-zithunywa zezulu, oko babebambene naye uMtyholi, bebangisana ngawo umzimba kaMoses, akabanga nabuganga bakumzisela mgwebo wakunyelisa; wesuka wathi, iNkosi mayikukhalimele.

10Ke bona aba banyelisa izinto abangazaziyo; kodwa izinto abazaziyo kakuhle ngemvelo, njengezinto eziphilileyo ezingenangqondo, bayazonakalisa ngazo ezo.

11Yeha ke bona! Kuba bahamba ngendlela kaKayin; bakhukuliswa lulahlekiso lukaBhileham ngenxa yomvuzo; batshabalala ephikeni likaKora.

12Aba zizixhobo zamatye aselwandle ezidlweni zenu zothando, bezingxala ukudla nani, bezidlisa okwabo ngokungenakoyika. Bangamafu angenamanzi, aqhutywaqhutywa yimimoya; yimithi ebunayo, engenasiqhamo, efe kabini, enyothulwe iingcambu;

13Ngamaza alatyuzayo olwandle, ebila ephuphuma ihlazo lawo; iinkwenkwezi ezibhadulayo, ezigcinelwe ubumnyama bobumnyama ngonaphakade.

14NoEnoki, ongowesixhenxe kuAdam, waprofeta ngabo, esithi, Yabonani, iNkosi iyeza enamawaka alishumi abangcwele bayo,

15ukuba ibagwebe bonke, ibohlwaye bonke abangahloneli Thixo kubo, ngenxa yemisebenzi yabo yonke yokungahloneli Thixo, abayenze bengahloneli Thixo, nangenxa yazo zonke izinto ezilukhuni, ababezithethile ngaye aboni abangahloneli Thixo.

16Aba ngabakrokri abasolayo, behamba ngokweenkanuko zabo; umlomo wabo uthetha iindumbisa zamazwi, bencoma ubuso bomntu ngenxa yenzuzo.

17Ke nina, zintanda, wakhumbuleni amazwi abethethwe ngenxa engaphambili ngabapostile beNkosi yethu uYesu Kristu;

18Ngokuba babesithi kuni, Kuya kubakho abagxeki ngexesha lokugqibela, behamba ngokwezabo iinkanuko zokungahloneli Thixo.

19Aba ngabazahlulayo, bengabenyama, abangenaye uMoya.

20Ke nina, zintanda, zakheni elukholweni lwenu olungcwele kanye, nithandaza nikuMoya oyiNgcwele;

21Hlalani nihleli eluthandweni lukaThixo, niyilinde inceba yeNkosi yethu uYesu Kristu, kuse ebomini obungunaphakade.

22Inxenye ke yibani novelwano, nicalula;

23kodwa inxenye yisindiseni nizoyika, nibakhupha emlilweni; niyithiya nengubo edyojiweyo yinyama.

24Ke kaloku, kulowo unako ukunigcina ningakhubeka, nokunimisa phambi kobuqaqawuli bakhe ningenabala, ninovuyo olugqithileyo:

25kuThixo olumke yedwa, uMsindisi wethu, makubekho uzuko nobukhulu, amandla negunya, nangoku, kude kuse ephakadeni. Amen.

Jump to: