bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kangri
/
kangri
/
1 Corinthians 10
1 Corinthians 10
kangri
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 11 →
1
हे मेरे प्यारे साथी बसुआसियो, मैं नीं चांह़दा ऐ, कि तुहां इसा गल्ला ते अणजाण रेह्आ कि परमात्मे अहां दे पूर्वजां दी अगुआई इक्की बदल़े जो घल्लणे दे जरिये कित्ती, जेह्ड़ा तिन्हां गांह-गांह चलदा था, कने तिन्हीं तिन्हां जो तिस लाल समुंदरे दे पांणिये ते सही-सलामत पार पज्जाया।
2
जिंआं कि तिन्हां सारेयां बदल़े च कने समुंदरे च बपतिस्मा लेआ, एह़ इसा गल्ला दे बारे दस्सदा ऐ, कि सैह़ मूसा दे पचांह़ चलणे आल़े थे।
3
कने तिन्हां सारेयां रोटी खादी जेह्ड़ी परमात्मैं तिन्हां जो सुअर्गे ते दित्ती।
4
कने तिन्हां सारेयां पाणी भी पीता, जेह्ड़ा परमात्मैं तिन्हां जो चट्टाना ते दित्या था, जेह्ड़ी तिन्हां सौगी-सौगी चलदी थी, कने सैह़ चट्टान मसीह था।
5
अपर परमात्मा तिन्हां च मतेआं ते खुस नीं था, इसतांई सैह़ सुनसाण जगाह च ई इस संसारे जो छड्डी करी चली गै।
6
एह़ सारियां गल्लां अहां तांई इक्क चतौणियां दियां हन, कि जिंआं तिन्हां लालच कित्ता, तिंआं अहां बुरिआं चीज्जां दा लालच नीं करन।
7
कने ना तुहां मूर्तिपूजक बणा, जिंआं कि तिन्हां च कितणे बणी गियो थे, जिंआं पवित्रशास्त्रे च लिख्या ऐ, “सैह़ लोक बैठे तां खाणे पीणे तांई, अपर खड़ोते तां नचणे तांई।”
8
कने ना अहां ब्यभिचार करन, जिंआं तिन्हां च कितणेयां लोकां कित्ता; कने नतीजा एह़ होएया कि इक्की दिने च त्रैई हज़ार लोक मरी गै।
9
कने ना अहां प्रभु यीशु मसीह जो परखन, जिंआं तिन्हां च कितणेयां लोकां परखेया, कने सर्पां दे डसणे दे जरिये मारी दित्ते गै।
10
कने ना तुहां बुड़बुड़ा, जिस तरीके नैं तिन्हां च कितणे लोक बुड़बुड़ाये थे, कने इक्की दूते दे जरिये सैह़ लोक मारी दित्ते गै, जिसियो परमात्मैं घल्लेया था।
11
अपर एह़ सारियां गल्लां, जेह्ड़ियां तिन्हां पर होईयां, इक्क चतौणियां साइआं थियां; कने सैह़ अहां जो चतौणी दैणे तांई लिखियां हन, जेह्ड़े इस संसारे दे आखरी बग्ते च रैंह्दे हन।
12
इसतांई जेह्ड़ा कोई समझदा ऐ, कि “मैं बसुआसे च मजबूत ऐ,” सैह़ चौकन्ना रैंह्, कि कुत्थी बसुआसे ते भटकी नीं जां।
13
तुहां कुसी ऐदई परीक्षा च नीं पै, जेह्ड़ी माणुये दे झेलणे ते बाहर ऐ। परमात्मा सच्चा ऐ कने सैह़ तुहां जो सामर्थ ते बाहर परीक्षा च नीं पोणा दिंगा, अपर परीक्षा ते बाहर निकल़णे दा रस्ता कड्डगा कि तुहां झेली सकन।
14
इसा बज़ाह ते, हे मेरे प्यारे साथी बसुआसियो, मूर्तिपूजा करणे ते बची रेह्आ।
15
मैं तुहां जो मसीह च अक्लमंद समझी नैं ग्लांदा ऐ, जेह्ड़ा मैं ग्लांदा ऐ, तिसदे बारे च जरा सोचा, सैह़ ठीक ऐ कि नीं।
16
जाह़लू अहां इक्की कटोरे ते अंगूरा दा रस पींदे हन, जेह्ड़ा अहां प्रभु भोज च इस्तेमाल करदे हन, जिस तांई अहां परमात्मे दा धन्यावाद करदे हन, अहां सच्च-बिच्च मसीह दे खूने च साझी हुंदे हन। कने अहां खाणे तांई रोटी तोड़दे हन, तां अहां सच्च-बिच्च मसीह दे सरीरे च साझी हुंदे हन।
17
क्जोकि इक्क ई रोटी ऐ तां अहां भी जेह्ड़े मत्ते हन, इक्क सरीर हन क्जोकि अहां सारे तिसा इक्की रोटिया च साझी हुंदे हन।
18
इस्राएली लोकां दे बारे च जरा सोचा, जेह्ड़े वेदिया पर चढ़ाईया बल़िया खांदे हन, क्या इसदे जरिये सैह़ साझी नीं हन?
19
भिरी मैं क्या ग्लादा ऐ, क्या मूर्तिया सच्चे ईश्वर हन, जिन्हां जो एह़ बलिदान चढ़ाया जांदा ऐ कने एह़ बलिदान कुच्छ खास हन?
20
नीं कदी भी नीं। अपर एह़ कि होरनी जातिआं दे लोक जेह्ड़े बलिदान करदे हन; सैह़ परमात्मे तांई नीं अपर दुष्टआत्मां तांई बलिदान करदे हन कने मैं नीं चांह़दा कि तुहां दुष्टआत्मां दे साझी बणन।
21
तुहां प्रभु दे कटोरे कने दुष्टआत्मां दे कटोरे दून्नी ते नीं पी सकदे। तुहां प्रभु दे भोज कने दुष्टआत्मां दे भोज दून्नी दे साझी नीं होई सकदे।
22
क्या अहां प्रभु जो गुस्सा दुआंदे हन? क्या अहां तिसते ताकतवर हन?
23
तुहां च कुच्छ एह़ ग्लांगे, कि सारियां चीज्जां मिन्जो तांई ठीक हन, क्जोकि मैं इक्क बसुआसी ऐ, अपर सारियां चीज्जां फायदे दियां नीं हन; सारियां चीज्जां मिन्जो तांई ठीक हन, अपर सारियां चीज्जां तरक्की तांई नीं।
24
तुहां च हर इक्क अपणिया भलाईया दे बारे च नीं अपर दूयेयां दिया भलाईया दे बारे च भी सोचैं।
25
जाह़लू तुहां बजारां च जाई नैं मीट खरीद दे हन, तां तिसियो खाई लेआ, अपर एह़ मत पुछा कि एह़ मूर्तियां जो चढ़ाया कि नीं चढ़ाया ऐ, कने इआं करणे नैं तुहां दी अन्तर आत्मा परेसान नीं हुंगी।
26
क्जोकि पवित्रशास्त्र ग्लांदा ऐ, कि “धरती कने धरतिया च जेह्ड़ा कुच्छ भी ऐ सैह़ प्रभु दा ई ऐ।”
27
जेह्ड़े लोक बसुआसी नीं हन, जे सैह़ तुहां जो खाणे तांई सदन कने तुहां जाणा चान, जे कुच्छ तुहां दे सामणै खाणे तांई रखेया जां, तां अपणिया अन्तर आत्मा दिया भलाईया तांई, बगैर कोई सवाल कित्ते सैह़ खाई लेआ।
28
अपर जे कोई तुहां नैं ग्लां, “एह़ तां मूर्तियां जो बल़ि कित्तियो चीज्ज ऐ,” तां तिस दस्सणे आल़े दिया कने अन्तर आत्मा दिया भलाईया तांई मत खा।
29
मेरा मतलब, तेरिया अन्तर आत्मा ते नीं, अपर तिस दूये माणुये दिया अन्तर आत्मा ते ऐ, मेरी अजादी भला दूये दिया अन्तर आत्मा दे जरिये क्जो परखी जां?
30
जे मैं धन्यावाद करी नैं खांदा ऐ, तां जिस पर मैं धन्यावाद करदा ऐ तिसदिया बज़ाह ते मिन्जो पर दोस क्जो लगदा ऐ?
31
मेरा ग्लाणे दा मतलब एह़ ऐ, तुहां चाहे खा, चाहे पीआ, चाहे जेह्ड़ा कुच्छ करा, सब कुच्छ परमात्मे दिया महिमा तांई करा।
32
तुहां ना यहूदी लोकां, ना यूनानी लोकां कने ना परमात्मे दी कलीसिया तांई ठोकरा दी बज़ाह बणा।
33
जिंआं मैं भी सारियां गल्लां च सबना जो खुस रखदा ऐ, कने मैं अपणिया नीं अपर दूयेयां दिया भलाईया दे बारे च सोचदा ऐ तांजे सैह़ उद्धार पान।
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 11 →
All chapters:
1
2
3
4
5
6
7
8
9
10
11
12
13
14
15
16