Acts 21

kangri

1जाह़लू अहां तिन्हां ते विदा होई करी समुंदरी जाह्जे पर चली पै, तां सिध्धे रस्ते ते कोस टापूये च आये, कने दूये दिने रुदुसे च, कने भिरी तित्थु ते पतरा टापू च पुज्जे।

2तित्थु इक्क समुंदरी जाह्ज फीनीके प्रदेसे जो चलेया मिल्ला, कने अहां तिस समुंदरी जाह्जे पर बेई करी चली पै।

3जाह़लू साइप्रस सैहर दुस्सेया, तां अहां समुंदरी जाह्जे जो सज्जे पास्से मोड़ी करी कने सीरिया प्रदेसे जो चली करी सूर सैहरे च जाई रैह्; क्जोकि तित्थु समुंदरी जाह्जे दा समान लुआणा था।

4चेलेयां सौगी मिल्ली करी अहां तित्थु सत दिन रैह्। तिन्हां पवित्र आत्मा दे सखाऐयो पौलुसे नैं यरूशलेम सैहरे च नीं जाणे दी विणती करदे रैह्।

5सत दिन बाद जाह़लू तित्थु ते अहां दे जाणे दा बग्त आया, तां अहां तित्थु ते चली पै; कने सबना जणासा कने जागतां समेत अहां जो सैहरे दे बाहर तिकर छड्डेया; कने अहां कनारे पर गोड्डे दे भार बेई करी प्रार्थना कित्ती,

6ताह़लू इक्की दूये ते लग्ग होई करी, अहां तां समुंदरी जाह्जे पर बैठे कने सैह़ अपणे -अपणे घरेयो चली गै।

7ताह़लू अहां सूरे सैहरे ते जलयात्रा पूरी करी नैं पतुलिमयिस सैहरे च पुज्जे, कने बसुआसी भाऊआं जो नमस्कार करी नैं तिन्हां सौगी इक्क दिन रैह्।

8दूये दिने अहां तित्थु ते चली पै कने कैसरिया सैहरे च आये, कने फिलिप्पुस सुसमाचार प्रचारके दे घरैं जाई करी तिस अल्ल रैह्, जेह्ड़ा सतां च इक्क था।

9तिसदियां चार कुआरियां कुड़ियां थियां, जेह्ड़ियां भविष्यवाणी करदियां थियां।

10जाह़लू अहां तित्थु मते दिन रैह्, तां अगबुस नांऐ दा इक्क भविष्यवक्ता यहूदिया प्रदेसे च आया।

11तिन्हीं अहां अल्ल आई करी पौलुसे दा लक्के बन्नणे आल़ा पटका लेई लेआ, कने अपणे हत्थ पैर बन्नी करी ग्लाणा लग्गा, “पवित्र आत्मा एह़ ग्लांदा ऐ कि जिस माणुये दा एह़ पटका ऐ, तिसियो यरूशलेम सैहरे च यहूदी इस तरीके नैं बन्नणा, कने होरनी जातिआं दे हत्थ दैणा।”

12जाह़लू अहां एह़ गल्लां सुणियां, तां अहां कने तित्थु देयां लोकां पौलुसे नैं विणती कित्ती कि यरूशलेम सैहरे जो मत जांदे।

13अपर पौलुसैं जवाब दित्ता, “तुहां क्या करदे हन, कि रौई-रौई करी मेरे मने तोड़दे हन? मैं तां प्रभु यीशुये दे नांऐ तांई यरूशलेम सैहरे च सिर्फ ना बन्धे जाणे तांई अपर मरने तांई भी त्यार ऐ।”

14जाह़लू सैह़ नीं मन्नेया तां अहां एह़ ग्लाई करी चुप होई गै, “प्रभु दी इच्छा पूरी होयैं।”

15कुच्छ दिनां दे बाद अहां त्यारी कित्ती कने यरूशलेम सैहरे जो चली पै।

16कैसरिया सैहरे ते कुच्छ चेले अहां सौगी चली पै, सैह़ अहां जो साइप्रस सैहरे दे मनासोन नांऐ दे इक्क माणुये दे घर लेई गै, जेह्ड़ा इक्क पराणा चेला था। अहां जो तिस अल्ल रैहणा था।

17जाह़लू अहां यरूशलेम सैहरे च पुज्जे, तां बसुआसी भाऊ बड़े खुस होई करी अहां नैं मिल्ले।

18दूये दिने पौलुस अहां जो याकूबे अल्ल लेई गेआ, जित्थु सारे स्याणे किठ्ठे थे।

19ताह़लू तिन्हीं तिन्हां जो नमस्कार करी नैं जेह्ड़े-जेह्ड़े कम्म परमात्मैं तिसदिया सेवा दे जरिये होरनी जातिआं च कित्यो थे, इक्क -इक्क करी नैं सारे दस्से।

20तिन्हां एह़ सुणी करी परमात्मे दी महिमा कित्ती, भिरी तिस नैं ग्लाया, “हे भाऊ, तू जाणदा ऐ कि यहूदियां च मतेआं हज़ारां लोकां बसुआस कित्ता ऐ; कने तिन्हां सारेयां मूसा दिया व्यबस्था जो बड़े बसुआसे नैं पालण कित्ता।

21कने बसुआसी यहूदी लोकां जो तेरे बारे च सखाया ऐ, कि तू होरनी जातिआं च रैहणे आल़े यहूदी लोकां जो एह़ सखांदा ऐ, कि मूसा दिया व्यबस्था जो छड्डी देआ, कने ग्लांदा ऐ, कि ना अपणे बच्चेयां दा खतणा करा कने ना ई यहूदियां दे रीति-रिवाजां पर चला।

22तां भिरी क्या कित्ता जां? माणुआं जरूर सुणना कि तू आया ऐ।

23इसतांई जेह्ड़ा अहां तिज्जो नैं ग्लांदे हन, तू सैई कर। अहां अल्ल चार माणु हन, जिन्हां जो सैह़ वादा पूरा करणा जरूरी ऐ, जेह्ड़ा तिन्हां परमात्मे नैं कित्या ऐ।

24तिन्हां जो लेई करी तिन्हां सौगी अपणे आप्पे जो सुद्ध करणे दिया रीतिया जो पूरा कर; कने तिन्हां तांई खर्चा दे, कि सैह़ सिरे दे बाल़ां कटवान। ताह़लू सबना जो पता लग्गी जांगा कि जेह्ड़ियां तिन्हां जो गल्लां तेरे बारे च दस्सियां, तिन्हां च कोई सच्चाई नीं अपर तू अप्पु भी व्यबस्था जो मन्नी करी तिन्हां मताबक चलदा ऐ।

25अपर तिन्हां होरनी जातिआं दे बारे च जिन्हां बसुआस कित्ता ऐ, अहां एह़ फैसला करी नैं लिखी घल्लेया ऐ कि सैह़ मूर्तियां दे सामणै चढ़ाईयां चीज्जां ते, ब्यभिचार, गल़ा घोटी करी मारेयो जानवरां दे मासे ते कने खूने ते बची रैह़न।।

26ताह़लू पौलुस तिन्हां माणुआं जो लेई करी कने दूये दिने तिन्हां सौगी सुद्ध होई करी मंदरे च गेआ, कने तित्थु दस्सी दित्ता कि सुद्ध होणे दे दिन, मतलब तिन्हां च हर इक्की तांई चढ़ावा चढ़ाणे दे दिन कधैड़ी पूरे होणे।”

27जाह़लू सैह़ सत दिन पूरे होणे आल़े थे, तां आसिया प्रदेसे देयां यहूदियां पौलुसे जो मंदरे च दिक्खी करी सारेयां लोकां जो भड़काया, कने पौलुसे जो पकड़ी लेआ, भिरी जोरे नैं डड्डी-डड्डी करी ग्लाणा लग्गे,

28“हे इस्राएली लोको, मदत करा; एह़ सैई माणु ऐ, जेह्ड़ा लोकां दे, कने व्यबस्था दे, कने इसा जगाह दे बरोधे च हर जगाह सारेयां लोकां जो सखांदा ऐ, ऐत्थु तिकर कि यूनानी माणुआं जो भी मंदरे च अंणी करी तिन्हीं इसा सुद्ध जगाह जो असुद्ध कित्ता ऐ।”

29तिन्हां एह़ तां ग्लाया, क्जोकि तिन्हां तां इसते पैहल्लैं इफिसुस सैहरे दे रैहणे आल़े त्रुफिमुसे जो पौलुसे सौगी सैहरे च दिख्या था, कने समझी बैठे थे कि पौलुस तिसियो मंदरे च लेई आया ऐ

30ताह़लू सारे सैहरे च रौल़ा पेई गेआ, कने लोक दौड़ी करी किठ्ठे होई गै, कने पौलुसे जो घसीटी करी मंदरे बाहर लेई आये कने झट दवार बंद करी दित्ते।

31जाह़लू सैह़ तिसियो मारी दैणा चांह़दे थे, तां सपाईयां दे सरदारे जो खबर घल्ली कि यरूशलेम सैहरे च मते लोकां खलल पाया ऐ।

32ताह़लू सैह़ झट सपाईयां कने सूबेदारां जो लेई करी तिन्हां अल्ल दौड़ी आये; कने भीड़ा दे लोकां सपाईयां दे सरदारे जो कने सपाईयां जो दिक्खी करी पौलुसे जो मारणा-कुटणा बंद करी दित्ता।

33ताह़लू सपाईयां दे सरदारे पौलुसे अल्ल आई करी तिसियो पकड़ी लेआ; कने दूँ सगल़ां नैं बन्नणे दी सलाह देई करी पुछणा लग्गा, “एह़ कुण ऐ कने इन्हीं क्या कित्या ऐ।”

34अपर भीड़ा च कोई कुच्छ होर कोई कुच्छ होर बकदा रेह्आ। जाह़लू हुल्लड़े दिया बज़ाह ते सैह़ ठीक सच्चाई नीं जाणी सके, तां तिसियो गढ़े च लेई जाणे दा हुक्म दित्ता।

35जाह़लू सैह़ पैड़ियां पर पुज्जा, तां एह़ होएया कि भीड़ा दे दबाबे नैं जुआना जो तिसियो चुक्की करी लेई जाणा पेआ।

36क्जोकि लोकां दी भीड़ एह़ डड्डदी-डड्डदी तिस पचांह़ चली पियो थी, “ तिसियो खत्म करी देआ।”

37जाह़लू सैह़ पौलुसे जो गढ़े जो लेई जाणे आल़े थे, तां तिन्हीं सपाईयां दे सरदारे नैं ग्लाया, “क्या मिन्जो इजाजत ऐ कि तुहां नैं कुच्छ ग्लां?” तिन्हीं ग्लाया, “क्या तू यूनानी भासा जाणदा ऐ?”

38“क्या तू सैह़ मिस्र देसे दा नीं ऐ, जिन्हीं कुच्छ बग्त पैहल्लैं सरकारा दे खलाफ बगाबत कित्तियो थी, कने सुनसाण जगाह च चार हज़ार हत्यारे लोकां दी अगुआई करा दा था।”

39पौलुसैं ग्लाया, नीं “मैं तां तरसुस सैहरे दा यहूदी माणु ऐ। किलिकिया प्रदेसे दे प्रसिद्ध सैहर तरसुसे दा निवासी ऐ। मैं तिज्जो नैं विणती करदा ऐ कि मिन्जो लोकां नैं गल्लां करणा दे।”

40जाह़लू तिन्हीं हुक्म दित्ता, तां पौलुसैं पैड़ियां पर खड़ोई करी लोकां जो हत्थे नैं इसारा करी सांत कित्ता। जाह़लू सैह़ चुप होई गै तां सैह़ इब्रानी भासा च ग्लाणा लग्गा;

← Chapter 20 Jump to: Chapter 22 →