2 Chronicles 11

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 10 Jump to: Chapter 12 →

1羅波安一到耶路撒冷就召集猶大㧯便雅憫支族最優秀个軍隊十八萬人，愛去攻打以色列，搶轉佢對北部支族个控制。

2總係上主㧯神人示瑪雅講：

3「你去對所羅門个孻仔猶大王羅波安㧯所有住在猶大、便雅憫地區个以色列人講：

4『上主恁樣講：毋好去攻打你等个兄弟。你等全部轉去！這擺所發生个事係出於𠊎。』」佢等就聽從上主个命令，無去攻打耶羅波安。

5羅波安住在耶路撒冷；佢修理猶大㧯便雅憫个城做保護。

6這兜城有：伯利恆、以坦、提哥亞、

7伯‧夙、梭哥、亞杜蘭、

8迦特、瑪利沙、西弗、

9亞多萊音、拉吉、亞西加、

10瑣拉、亞雅崙㧯希伯崙。

11佢為這兜城整堅固个城堡，為逐座城派指揮官，並供給糧食、橄欖油㧯酒。

12佢也為逐座城準備盾牌㧯槍，使它兜盡堅固。恁樣，羅波安控制猶大㧯便雅憫。

13以色列全地个祭司㧯利未人全部對四方來歸順羅波安。

14利未人㧒掉佢等个牧場㧯其他土地，徙到猶大㧯耶路撒冷去，因為以色列王耶羅波安㧯佢个繼承者拒絕佢等，毋准佢等做上主个祭司。

15耶羅波安指派佢自家个人做祭司，在山岡个神廟事奉，拜山羊鬼㧯佢自家鑄造个牛。

16以色列逐支族所有誠心敬拜上主 — 以色列上帝个人民全部跈利未人到耶路撒冷去，獻牲儀給上主 — 佢等祖先个上帝。

17這件事加強猶大國个地位，三年久，人民支持所羅門个孻仔羅波安，因為佢等个生活像在大衛王㧯所羅門王統治个時共樣。

18羅波安討瑪哈拉做𡜵娘；瑪哈拉个阿爸係大衛个孻仔耶利摩，阿姆係耶西个孫女，以利押个妹仔亞比孩。

19佢等𫱔三個孻仔 — 耶烏斯、示瑪利雅、撒罕。

20後來羅波安又討押沙龍个妹仔瑪迦；佢等𫱔四個孻仔 — 亞比雅、亞太、細撒、示羅密。

21羅波安一共有十八個𡜵娘，六十個細姐，二十八個孻仔，㧯六十個妹仔。在所有𡜵娘細姐中，羅波安最惜押沙龍个妹仔瑪迦，

22所以也最惜瑪迦个孻仔亞比雅，想愛設立佢繼承王位。

23羅波安盡聰明，將責任分給佢該兜孻仔，派佢等在猶大㧯便雅憫逐個防衛城。佢供給佢等所需要个一切，也為佢等討盡多𡜵娘細姐。

← Chapter 10 Jump to: Chapter 12 →