bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Chinese
/
Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)
/
Daniel 6
Daniel 6
Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 7 →
1
大流士 王決定派一百二十個省長治理全帝國。
2
另外，佢又指派 但以理 㧯其他兩個人監督這群省長，來維護王个權利。
3
但以理 當遽就表現出佢比其他監督抑係省長還較會管理。因為 但以理 優秀个才能，王想愛設立佢治理歸隻帝國。
4
所以，其他个監督㧯省長想盡辦法在佢處理个國政上尋過失，總係全部尋毋到，因為 但以理 誠實可靠，無半點錯誤。
5
佢等就大家參詳講：「除了對這 但以理 个宗教信仰下手，𠊎等一定尋毋出任何控告佢个理由。」
6
所以，佢等湊等去見王，對佢講：「 大流士 王萬歲！
7
𠊎這兜監督、省長、副省長，㧯所有个官員全部同意請國王宣佈一條禁令，無論麼人，在三十日內做毋得向任何个神明祈禱，抑係向一切个人求麼介，單淨做得向國王一儕祈求。麼人違犯這禁令，麼人就愛被人㧹入獅仔窟。
8
請國王頒佈這條禁令，並加頓王印，使它有效。照 米底亞 㧯 波斯 个法律，恁樣个命令係做毋得改變个。」
9
所以 大流士 王在這聖旨面頂加頓王印。
10
但以理 聽到這命令已經加頓王印，就轉屋下去。佢个樓頂有一個房間，窗門面向 耶路撒冷 。 但以理 在開等个窗仔前跪下去，照佢平常个習慣，逐日三擺向上帝獻上感謝㧯祈禱。
11
但以理 个敵人湊等去，看到佢向上帝祈禱，
12
就共下到王該位告佢。佢等對王講：「國王啊，你識宣佈一條禁令，規定無論麼人，在三十日內做毋得向任何个神明祈禱，抑係向一切个人求麼介，單淨做得向國王一儕祈求。麼人違犯這禁令，麼人就愛被人㧹入獅仔窟。」 王講：「無毋著；這係一條聖旨；照 米底亞 㧯 波斯 个法律，做毋得改變。」
13
所以佢等對王講：「對 猶大 捉來个 但以理 ，佢毋尊重國王，毋服從國王宣佈个命令，還係照常一日祈禱三擺。」
14
王聽這話，心肝非常艱苦，決心愛救 但以理 ，歸日想辦法，直到臨暗仔。
15
後來該兜人又湊等來向王講：「國王知，照 米底亞 㧯 波斯 个法律，王所發出个聖旨係做毋得改變个。」
16
所以，王下令，人就將 但以理 捉起來，㧹入獅仔窟。王對 但以理 講：「願你所忠心事奉个上帝救你。」
17
窟口用一垤大石頭揜等；王用王印㧯該兜大臣个印仔加封，表示處罰 但以理 个事做毋得改變。
18
王轉到王宮，歸夜食毋落，睡毋掉，也無愛一切个娛樂。
19
天一光，王就䟘起來，趕緊走到獅仔窟堘。
20
王一到窟堘，就哀傷盡喊：「 但以理 ，永生上帝个僕人啊！你忠心事奉个上帝有救你離開該兜獅仔麼？」
21
但以理 應講：「願王萬歲！
22
𠊎个上帝派天使來封等這兜獅仔个嘴，使牠兜無辦法傷害𠊎。上帝恁樣做，因為佢知𠊎無罪，𠊎也無做麼介得罪國王个事。」
23
王非常歡喜，命令僕人將 但以理 救出來。因為恁樣，佢等將 但以理 對窟底拉上來，看到佢一些仔也無受傷，因為佢信靠上帝。
24
後來，王命令將所有告 但以理 个人捉起來，將佢等㧯佢等个𡜵娘、子女全部㧹入獅仔窟肚。佢等還吂落到窟底，獅仔就遽遽猋上去、咬碎佢等个骨頭。
25
事後， 大流士 王通告世界逐國、逐族、講逐種話个人民講： 「願你等大享平安！
26
𠊎這下命令，𠊎治理个帝國人民，全部愛敬畏、尊崇 但以理 个上帝！ 佢係永生个上帝； 佢个統治永遠無停。 佢个主權永遠長存； 佢个權柄直到萬代。
27
佢解救人、幫助人， 在天頂㧯地面行神蹟奇事。 佢拯救 但以理 離開獅仔个嘴。」
28
對恁樣， 但以理 在 大流士 㧯 波斯 王 塞魯士 在位个時凡事順利。
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 7 →
All chapters:
1
2
3
4
5
6
7
8
9
10
11
12