bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Chinese
/
Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)
/
Hebrews 11
Hebrews 11
Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 12 →
1
信心就係對所盼望个事有把扼，對看毋到个事能確定。
2
古時代个人得到上帝个褒獎，就係因為佢等有信心。
3
因為信心，𠊎等知宇宙係通過上帝个話造成个；恁樣，看得到个係對看毋到个造出來个。
4
因為信心， 亞伯 獻比 該隱 較好个祭物給上帝。因為佢个信心，上帝褒獎佢，稱佢做義人，因為上帝歡喜接納佢个禮物。佢雖然死掉，還係通過這個信心講話。
5
因為信心， 以諾 毋使經歷死。佢受接到上帝該位去；無人尋得到佢，因為上帝將佢接走。聖經講，佢受接以前，已經得到上帝个歡喜。
6
人無信心，就毋會得到上帝个歡喜。到上帝面前來个人，一定愛信上帝个存在，還愛信佢會報賞尋求佢个人。
7
因為信心， 挪亞 在還吂看到个事情上，聽上帝个警告，存敬畏个心，造一隻大船，來救佢㧯佢全家。對恁樣，佢定該世代个罪，自家也對上帝領受因信所得个義。
8
因為信心， 亞伯拉罕 順服上帝个呼召，去上帝應許愛賜給佢个所在。佢離開本國个時，並毋知愛去㖠位。
9
通過信心，佢住在上帝所應許个所在，異鄉做旅客；佢㧯領受上帝共樣應許个 以撒 㧯 雅各 共下住在帳篷肚。
10
因為 亞伯拉罕 盼望該座根基永遠企在个城，就係上帝所設計、所建造个城。
11
因為信心，雖然 亞伯拉罕 已經老了， 莎拉 生育个年齡也已經過掉，佢還能做阿爸，因為佢 相信上帝會對佢个應許守信用。
12
雖然 亞伯拉罕 親像已經死掉，總係，對佢一個人還傳下像天頂个星仔恁多，像海滣个沙仔算毋盡个子孫來！
13
這兜人係到死還有信心个人。佢等並無領受到上帝所應許个；總係，佢等對遠遠看到，歡喜等候。佢等承認自家在世間係外鄉人㧯流浪个旅客。
14
講這種話个人，明明表示佢等係為自家尋一個家鄉。
15
佢等並無懷念所離開个地方，若毋係恁樣，佢等還有倒轉去个機會。
16
顛倒，佢等欣慕一個較靚个家鄉，就係在天頂个；所以，上帝無因為稱做佢等个上帝感覺見笑，因為佢已經為佢等準備一座城。
17
因為信心， 亞伯拉罕 在上帝考驗佢个時，將 以撒 獻做祭物。 亞伯拉罕 係領受應許个人，總係佢還係甘願將佢个單丁子獻做祭物。
18
上帝識對佢講：「你愛對 以撒 得到𠊎所應許个子孫。」
19
佢認為上帝能使人對死復活。事實上，也做得講， 亞伯拉罕 係將 以撒 對死接倒轉來。
20
因為信心， 以撒 為到將來个事情祝福 雅各 㧯 以掃 。
21
因為信心， 雅各 臨終个時，為 約瑟 兩個孻仔祝福；佢拄等柺棍仔敬拜上帝。
22
因為信心， 約瑟 臨終个時，提起 以色列 族將來愛出 埃及 个事，並吩咐愛樣般處理佢个遺體。
23
因為信心， 摩西 出世後，佢个爺𡟓看到孲𤘅仔盡靚，就將佢囥三個月，並毋驚王个命令。
24
因為信心， 摩西 成人以後，毋肯人稱佢做 埃及 公主个孻仔。
25
佢甘願同上帝个子民共下受苦，無愛在罪惡中暫時享樂。
26
在佢看來，為到受膏者 被人侮辱，比 埃及 所有个財寶還較寶貴，因為佢看重將來个獎賞。
27
因為信心， 摩西 離開 埃及 ，毋驚 埃及 王發譴；佢堅持到底，一直向前，就像看到目珠所看毋到个上帝。
28
因為信心，佢設立𨃟過節，並吩咐將血拂在門頂高，免得執行毀滅个天使殺害 以色列 人个長子。
29
因為信心， 以色列 人行過 紅海 ，像行燥地； 埃及 人也想愛跈等過，就被水浸死。
30
因為信心， 以色列 人𫟧等 耶利哥 城行七日，然後城牆就橫掉。
31
因為信心，妓女 喇合 毋使同該兜毋服從上帝个人共下滅亡，因為姖好款待該兜探仔。
32
𠊎敢還需要講下去？𠊎無恁多時間好講起 基甸 、 巴拉 、 參孫 、 耶弗他 、 大衛 、 撒母耳 ，㧯眾先知个事。
33
通過信心，佢等制伏列國，執行正義，領受上帝个應許；佢等塞等獅仔个嘴，
34
滅掉烈火个威力，閃開刀劍个殺害；佢等對軟弱變做剛強，在戰場中盡勇敢，打退敵人个軍隊。
35
有兜婦女將該兜對死復活个親人接倒轉來。 總係，有兜人拒絕被人釋放，甘願死在惡毒个刑罰之下，為到愛得到較靚復活个生命。
36
又有人忍受㩢耍㧯鞭打，甚至被人捆起來，關在監獄肚。
37
還有人被石頭㧹死，被鋸仔鋸斷，被刀劍㓾死。也有人披等綿羊抑係山羊个皮閃來閃去，忍受窮苦、迫害，㧯苦毒。
38
這世間堪毋得有這兜人！佢等像難民恁樣，在曠野㧯山嶺間流浪，住在山洞㧯地窿內肚。
39
這兜人，因為信心，攏總有得到上帝个褒獎；總係佢等並無領受到上帝所應許个。
40
因為上帝為到𠊎等有還較好个安排；佢个旨意就係：佢等愛同𠊎等共下正能達到完全。
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 12 →
All chapters:
1
2
3
4
5
6
7
8
9
10
11
12
13