Hosea 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1上主啟示備利个孻仔何西阿該站期間，烏西雅、約坦、亞哈斯、希西家接等做猶大國个王；以色列國係約華施个孻仔耶羅波安二世做王。下背个記載係上主向何西阿講个話。

2上主第一擺通過何西阿向以色列人講話个時，佢對何西阿講：「你去結婚啊！你討个𡜵娘會對你無守貞節；你等个子女也會像姖恁樣對你無忠實。照樣，以色列全國上下㧯該淫婦共樣，盡行淫亂，離開𠊎 — 上主。」

3所以，何西阿去㧯滴拉音个妹仔歌蜜結婚。姖有身項，㧯何西阿𫱔一個孻仔。

4上主對何西阿講：「㧯佢安到耶斯列；因為無幾久𠊎就愛責罰耶戶个王室，討佢等祖先在耶斯列㓾人个血債。𠊎愛結束以色列王國。

5該日，𠊎一定愛在耶斯列山壢毀滅以色列个軍隊。」

6歌蜜又有身項，𫱔一個妹仔。上主㧯何西阿講：「㧯姖安到羅‧露哈瑪；因為𠊎絕對無愛再憐憫以色列這一家，無愛再赦免佢等。

7總係，𠊎愛痛惜猶大這一家。𠊎係上主，係佢等个上帝；𠊎愛拯救佢等；總係𠊎毋係用戰爭、弓箭、刀劍、軍馬、騎兵拯救佢等。」

8歌蜜在厥妹仔羅‧露哈瑪斷乳後，又有身項，𫱔一個孻仔。

9上主㧯何西阿講：「㧯佢安到羅‧阿米；因為以色列人毋係𠊎个子民，𠊎也毋係佢等个上帝。」

10總係，以色列个人數愛增加，像海沙共樣無法度算，無法度量。原旦上帝在㖠位對佢等講：「你等毋係𠊎个子民」；有一日，佢也愛在該位對佢等講：「你等係永生上帝个子女。」

11猶大家㧯以色列家會聯合起來，為自家推選一個領袖。佢等會轉到自家个土地重新繁榮起來。耶斯列个日仔確實會成做一個大日。

Jump to: Chapter 2 →