James 2

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 1 Jump to: Chapter 3 →

1𠊎个兄弟姊妹啊，你等既然係𠊎等榮光个主耶穌基督个信徒，就做毋得照人个外表用無共樣个態度來對待人。

2假使有一個有錢人，戴金禁指，著靚衫，入去你等个會堂，同時有一個著爛衫个窮苦人也入去；

3若係你等看重該著靚衫个人，對佢講：「請你坐上位」，總係對該窮苦人講：「企到該片去」，抑係講：「坐在𠊎个腳下」，

4恁樣，你等敢毋係偏心，用壞意來品相人嗎？

5𠊎親愛个兄弟姊妹啊，你等愛聽清楚噢！上帝敢毋係揀選世間个窮苦人，使佢等在信仰上富足，來承受佢所應許給該兜敬愛佢个人个國嗎？

6總係，你等竟然侮辱窮苦人！事實上，欺壓你等，拉你等上官廳个，敢毋係該兜有錢人嗎？

7譭謗你等所領受該尊貴个名，敢毋係佢等嗎？

8你等若確實遵守聖經所記載，該至高無上个教示：「惜別人像自家」，就著了！

9總係，你等若照人个外表來對待人，就係犯罪；法律愛定你等做犯法个人。

10無論麼人違背法律中个一條誡命，就係違背全部法律。

11因為該命令講「做毋得犯姦淫」个，也講「做毋得㓾人」。你若係㓾人，雖然無犯姦淫，你還係違背法律。

12既然你等愛照該使人得到自由个教示受審判，你等个言行就愛合它个標準。

13因為，上帝審判个時，毋會憐憫該兜毋憐憫人个。憐憫會贏過審判。

14𠊎个兄弟姊妹啊，假使有人講佢有信心，總係無用行為證明，有麼介用呢？該種信心會救佢麼？

15假使有兄弟抑係姊妹，無好著又無好食，

16你等中間有人對佢等講：「做你等平安轉去！願你等著得燒，食得飽！」總係無給佢等身體所需要个，有麼介用呢？

17像恁樣，信心若無行為就係死个。

18總係，有人會講：「你有信心；𠊎有行為。」總係，𠊎愛講：「給𠊎看你無行為个信心；𠊎就會用𠊎个行為給你看𠊎个信心。」

19你信上帝只有一個，盡好！邪靈乜恁樣相信，總係佢等驚到愊愊掣。

20戇仔啊！你想愛知無行為个信心係樣般無用嗎？

21𠊎等个祖先亞伯拉罕係樣般被上帝稱做義人呢？敢毋係因為佢將厥孻仔以撒獻在祭壇頂這個行為嗎？

22可見，佢个信心㧯行為係平平進行个；通過行為佢个信心正達到完全。

23聖經講：「亞伯拉罕信上帝，因為佢个信，上帝就算佢做義人。」這個話實現了；所以，佢稱做上帝个朋友。

24可見，人被上帝稱做義人係通過行為，毋係單單靠信心。

25妓女喇合个情形也係恁樣。姖被上帝稱做義人係因為行為；姖接待猶太人个使者，又幫助佢等對另外一條路逃走。

26所以，像身體無透氣係死个，信心無行為也係死个。

← Chapter 1 Jump to: Chapter 3 →

推荐阅读

注释 James 注释书 → 灵修 James 灵修指南 → 购买此圣经 Bible TNV (Traditional) (客語聖經 – 現代臺灣客語譯本，新舊約全書客語聖經 – 漢字版) 研读本圣经 →