Job 5

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 4 Jump to: Chapter 6 →

1約伯啊，做你盡喊，看有麼人應你呢；你會向㖠個天使求幫助呢？

2發閼會害死戇檔人；嫉妒會使無知个人無命。

3𠊎看過戇檔人打拚愛安居樂業，總係災難忽然間臨到佢个屋下；

4佢个子女無麼介安全，在法庭被人欺負，無人代佢等講話。

5佢个收成被肚飢个人搶去食，連該兜竻藪肚个也摘去食淨淨；佢个財產被饑渴个人吞掉。

6災禍毋會對泥塥肚生出來；苦難也毋係對泥下爆出來。

7人一出世就會有苦難，就像火花對火飛出來。

8若係𠊎，𠊎愛尋求上帝，向佢申訴𠊎个問題。

9佢所做个大事𠊎等毋了解；佢奇妙个作為算毋出恁多。

10佢落雨在地面；佢送水到田肚。

11上帝使卑微个人高升起來，將哀傷个人帶到安穩所在。

12佢破壞搞怪人个計謀，使佢等手所做个毋會成功。

13佢使聰明人陷入自家个詭計，佢使狡猾人个陰謀全部失敗。

14佢等日時頭堵到烏暗，當晝頭像暗晡時摸來摸去。

15上帝拯救窮苦人脫離強暴人个統治。

16佢使窮苦人有盼望，俾邪惡个人無話講。

17上帝所管教个人有福氣；全能者个責備毋好看輕。

18上帝傷到人，也會㧯人包好；佢打傷人，佢个手也會醫好。

19佢時時刻刻愛拯救你；佢會一直救你離開災難。

20飢荒个時，佢愛救你脫離死亡；戰爭个時，佢會救你離開刀劍。

21佢會保護你，使你毋會受譭謗，災禍臨到个時，你也毋使著驚。

22飢荒、暴亂中，你還係滿面笑容；野獸个傷害，你也完全毋使驚。

23你耕種个田地毋會有石頭；野地个畜牲也毋會傷害你。

24該時你會知，住在若帳篷肚有平安；你查看你个羊群，連一隻也無失掉。

25你會看到若子孫興旺，像草坪个青草恁茂盛。

26你會盡長壽滿足正歸土，像麥仔成熟照時好收成。

27約伯啊，這係𠊎等所查考个真理；為到你个好處，你應該愛聽。

← Chapter 4 Jump to: Chapter 6 →