Jude 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to:

1𠊎係耶穌基督个僕人，雅各个兄弟猶大。𠊎寫信仔給蒙上帝選召、生活在阿爸上帝个痛惜中、又蒙耶穌基督保守个人。

2願上帝豐豐富富賜你等憐憫、平安，㧯慈愛。

3親愛个朋友，𠊎盡早就想愛寫信仔㧯你等談論同𠊎等大家攏總有關係个救恩問題；總係，𠊎感覺有需要即時寫信仔勸勉你等，愛繼續為上帝一擺就完全傳給聖徒个信仰盡力打拚。

4因為，有兜無敬虔个人偷偷入來𠊎等个中間，曲解上帝恩典个道理來遮蓋自家腐敗个行為。佢等拒絕惟一个主宰 — 𠊎等个主耶穌基督。盡早以前，聖經已經預言佢等一定愛受刑罰。

5這一切，雖然你等全部清楚，𠊎還係愛提醒你等：主樣般拯救以色列人脫離埃及，然後消滅該兜毋信个人。

6毋好毋記得該兜毋守本份、離開本位个天使，佢等被永遠解毋開个鎖鍊鎖在烏暗个深淵肚；上帝將佢等關在該位，等候審判个大日仔。

7還有住在所多瑪、蛾摩拉、㧯附近城市个人民，像該兜天使共樣，佢等行淫亂，放縱違反自然个性慾，所以落在該永遠不滅个火底背受刑罰。這個事可以做大家个鑑戒。

8這兜無敬虔个人也共樣。佢等屙糟个妄想害佢等犯罪，打垃圾自家个身體；佢等藐視上帝个權柄，褻瀆天頂該兜有尊榮个。

9就係天使長米迦勒，為到摩西个身屍同魔鬼辯論个時，也毋敢用譭謗个話來責備，只有講：「主責備你！」

10總係，這兜人竟然譭謗一切佢等毋了解个事；像禽獸恁樣，佢等順本性个唆慫去做該兜敗壞自家个事。

11這兜人慘了！佢等同該隱行共條路。為到錢財，佢等陷入巴蘭所犯个錯誤中。佢等像可拉恁樣悖逆，也像恁樣滅亡。

12這兜人同你等共下食愛个筵席，毋知見笑，只顧自家盡啉，成做筵席个污點。佢等像毋會落雨个雲，被風吹來吹去；又像秋天毋會結果子个樹，連根被人挷出來，完全死掉。

13佢等个行為毋知見笑，像海肚个大浪，激出屙糟个水泡。佢等像星仔遊蕩，跌落上帝永遠為佢等保留該烏暗个深淵。

14亞當个第七代孫仔以諾對這兜人早就預言；佢講：「看啊，主帶等千萬个聖天使共下來。

15佢愛審判所有个人，刑罰所有無敬虔个罪人；因為佢等个行為無敬虔，又用無敬虔个話冒犯上帝！」

16這兜人常常埋怨別人，怪怨別人；佢等順自家邪惡个情慾，講肨風个話，為到自家个利益巴結別人。

17總講，親愛个朋友啊，毋好毋記得𠊎等主耶穌基督个使徒講過个話。

18佢等對你等講：「在歷史个末期有人會出來，照自家邪惡㧯無敬虔个慾念㩢耍你等。」

19這兜人無聖靈；佢等順從本性个教唆，製造紛爭。

20總係你等呢，親愛个朋友啊，你等應當一直在至聖个信仰上造就自家，在聖靈个底背祈禱，

21常常生活在上帝个痛惜底背，仰望𠊎等个主耶穌基督憐憫你等，賜你等永遠个生命。

22對該兜疑狐無辦法決裁个人，你等愛憐憫佢等。

23有兜人，你等愛對火个當中搶救佢等。另外有兜人，你等愛憐憫佢等，總係愛細膩；連佢等膏到情慾个衫褲也毋好摸到。

24願該能保守你等毋會跌倒，使你等無缺點、有好歡歡喜喜來到佢榮光个面前个，

25𠊎等个救主，獨一無二个上帝，通過𠊎等个主耶穌基督，得到榮光、威嚴、能力、㧯權柄，對萬世以前，到這下，直到永永遠遠！阿愐。

Jump to: