Judges 13

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 12 Jump to: Chapter 14 →

1以色列人又行上主看做邪惡个事，所以上主將佢等交在非利士人手中四十年。

2該時，有一個但支族个人，名安到瑪挪亞，住在瑣拉城。佢个𡜵娘毋會𫱔，無細人仔。

3上主个天使向厥𡜵娘顯現，講：「你毋會𫱔，無細人仔，總係過無幾久你會有身，𫱔一個孻仔。

4你愛細膩，淡酒㧯釅酒全部做毋得啉，也做毋得食禮儀上定做無淨浰个東西，

5因為你愛𫱔一個孻仔。細人仔出世以後，毋好剃佢个頭那毛，因為佢一出世就愛獻給上帝做離俗人。佢會帶頭拯救以色列人脫離非利士人个手。」

6這婦人家去㧯老公講：「有一個神人向𠊎顯現；佢个面像上帝个天使，盡得人驚。𠊎無問佢對㖠位來；佢也無㧯𠊎講佢安到麼介名。

7總係佢對𠊎講，𠊎會有身，𫱔一個孻仔。佢喊𠊎做毋得啉淡酒㧯釅酒，也做毋得食禮儀上定做無淨浰个東西；因為細人仔一出世就愛獻給上帝，一生人做離俗人。」

8所以，瑪挪亞向上主祈求：「上主啊，求你俾你派來該神人倒轉𠊎等這位來，教𠊎等愛樣般對待將會出世个細孻仔。」

9上帝聽到瑪挪亞个祈禱。該婦人家在田項个時，上帝个天使倒轉姖面前。該時，厥老公瑪挪亞無在該位；

10姖趕緊走去㧯厥老公講：「你看！該日來尋𠊎个人又向𠊎顯現了！」

11瑪挪亞䟘起來跈厥𡜵娘去，到該人面前，問佢：「㧯𠊎𡜵娘講過話个人，係你麼？」該人應講：「係啊！」

12瑪挪亞講：「你講个話實現以後，𠊎等應該樣般教這細人仔呢？佢愛過樣般个生活呢？」

13上主个天使應瑪挪亞講：「你个𡜵娘一定愛遵守所有𠊎㧯姖講過个話。

14姖做毋得食葡萄做个東西，做毋得啉淡酒㧯釅酒，也做毋得食禮儀上定做無淨浰个東西。𠊎吩咐姖个一切，姖全部愛遵守。」

15瑪挪亞毋知佢係上主个天使，就對佢講：「請毋好走！𠊎等預備一隻細山羊給你食。」上主个天使應瑪挪亞講：「就算留下來，𠊎也毋食你个食物。若係你愛準備，就將它做燒化祭獻給上主啊！」

17瑪挪亞講：「請問大名？你个話實現以後，𠊎等好對你表示尊敬。」

18上主个天使應講：「你樣愛問𠊎个名呢？𠊎个名係奇妙个名。」

19所以，瑪挪亞帶等一隻細山羊㧯素祭，放在石頭个祭壇頂，獻給行奇事个上主。

20火焰對祭壇衝上去个時，瑪挪亞㧯厥𡜵娘看到上主个天使在火焰中升天。瑪挪亞這時正知該人原來係上主个天使；佢㧯佢个𡜵娘就伏在地上。後來上主个天使無再向佢等顯現。

22瑪挪亞對厥𡜵娘講：「𠊎等一定會死，因為𠊎等看到上帝了！」

23總係厥𡜵娘應講：「若係上主愛㓾𠊎等，佢毋會接受𠊎等个燒化祭㧯素祭，毋會向𠊎等顯明這兜事，也毋會在這時節㧯𠊎等講這所有个話。」

24瑪挪亞个𡜵娘𫱔一個孻仔，將佢安名參孫。這細人仔漸漸長大；上主賜福給佢。

25當佢在瑣拉㧯以實陶中間、但營个所在，上主个靈開始感動佢。

← Chapter 12 Jump to: Chapter 14 →