Nehemiah 2

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 1 Jump to: Chapter 3 →

1四隻月以後，亞達薛西做皇帝第二十年尼散月，有一日，𠊎為佢斟酒。佢毋識看到𠊎滿面憂愁，

2皇帝問𠊎：「你又無發病，做麼介面色恁毋好看？一定有麼介事正會使你恁憂愁！」𠊎非常著驚，

3總係應講：「皇帝萬歲！𠊎祖先埋葬个城荒掉，城門被火燒掉，𠊎樣毋會憂愁呢？」

4皇帝問𠊎：「你愛麼介？」𠊎就向天頂个上帝祈禱，

5然後𠊎㧯皇帝講：「若係皇帝開恩，准僕人个懇求，請俾𠊎轉到猶大地，到𠊎祖先埋葬个城去，恁樣，𠊎愛重建該城。」

6該時，皇后坐在佢个堘頭。皇帝問𠊎愛去幾久？幾時轉來？𠊎回答後，佢歡喜派𠊎去；𠊎就定日期。

7𠊎又求皇帝開恩賜給𠊎詔書，通知河西省該兜省長准𠊎經過，直到猶大。

8𠊎也要求一份詔書給管理皇家樹林个亞薩，命令佢給𠊎樹料，來修建聖殿堘城堡个門㧯城牆、還有𠊎愛住个屋仔。因為𠊎个上帝施恩幫助，𠊎所要求个，皇帝全部賜給𠊎。

9皇帝派軍官㧯騎兵保護𠊎，𠊎就出發到河西省。在該位，𠊎將皇帝个詔書交給該兜省長。

10和倫城个參巴拉㧯亞捫省个官長多比雅，聽到有人來為以色列人爭取利益，就當無歡喜。

11𠊎到耶路撒冷，在該位住三日，

12無將上帝愛𠊎為耶路撒冷做个事㧯人講。第三日半夜，𠊎䟘起來，帶等幾個人共下出去。除了𠊎騎个驢仔，無別个頭牲。

13𠊎在半夜出城，經過西片个谷門，向南經過龍泉，來到垃圾門。𠊎緊行，緊看耶路撒冷橫掉个城牆㧯被火燒掉个城門。

14在城个東片，𠊎向北行，到泉水門㧯王池。在該位，因為𠊎騎个驢仔尋毋到路過去，

15𠊎就下到汲淪溪，順山壢騎等上，巡查城牆，然後倒轉原來个路，經過谷門轉到城肚。

16無一個官長知𠊎去過麼介所在，做麼介事。直到該時，𠊎全無㧯猶太同胞講起；無論係祭司、領袖、官長，抑係可能參加這工作个人，𠊎全部無講。

17後來𠊎對佢等講：「𠊎等所堵到个困難就係耶路撒冷荒掉，城門被火燒掉，你等全部看到了。𠊎等來重建耶路撒冷个城牆，免得𠊎等再受侮辱！」

18𠊎又講，𠊎个上帝樣般施恩幫助𠊎，又㧯佢等講皇帝對𠊎講个話。佢等講：「𠊎等開始來重建！」所以佢等準備好勢，開始這好个工作。

19總係和倫城个參巴拉、亞捫省个官長多比雅，㧯一個喊做基善个阿拉伯人，一聽到𠊎等愛做个事，就笑𠊎等，藐視𠊎等。佢等講：「你等愛做麼介啊？你等想愛悖逆皇帝係麼？」

20𠊎應佢等講：「天頂个上帝會使𠊎等成功。𠊎等係佢个僕人；𠊎等愛開始來起。你等反轉在耶路撒冷無份、無權利、無人紀念。」

← Chapter 1 Jump to: Chapter 3 →