Numbers 24

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 23 Jump to: Chapter 25 →

1巴蘭已經看出上主愛佢祝福以色列人，所以佢這擺無像以前恁樣去求兆頭。佢个面轉向曠野，

2看到以色列人逐支族安營在該位。上帝个靈臨到佢，

3佢就講出以下个預言：「比珥个孻仔巴蘭个預言，該看盡清楚个人講：

4𠊎聽到上帝所講个話，𠊎看到該對全能者來个異象，𠊎就伏下去，目珠打開。

5雅各啊，你个帳篷盡靚！以色列啊，你个營帳也當好看！

6它兜像一排一排个棕樹，像河壩滣个花園，像上主親手種个沉香樹，也像水滣个香柏樹。

7水會對佢等个桶流出來；佢等个種子會委在溼潤个田肚。佢等个王會比亞甲偉大；佢个國會向四方發展。

8上帝𢱋佢等出埃及，佢打退埃及，就像野牛恁有力。佢等會吞滅仇敵，磧碎佢等个骨頭，拗斷佢等个箭。

9這個國家像公獅伏等；像母獅睡等，無人敢吵到牠。祝福以色列个，一定有福氣；咒詛以色列个，一定有災難。」

10巴勒大發譴揢等拳頭，對巴蘭講：「𠊎喊你來咒詛𠊎个仇敵，你顛倒三擺祝福佢等。

11你轉去！𠊎想愛大大答謝你，總係上主毋俾你得到。」

12巴蘭應講：「𠊎敢毋係對你派來个使者講：

13『就算巴勒將王宮所有个金銀給𠊎，𠊎也做毋得照自家个意思來違背上主个命令。𠊎單淨做得講上主愛𠊎講个話。』」

14巴蘭對巴勒講：「𠊎這下愛轉到𠊎同胞該位去。離開以前，𠊎愛警告你，俾你知將來以色列人愛樣般對待你个人民。」

15所以巴蘭講出以下个預言：「比珥个孻仔巴蘭个預言，該看盡清楚个人講：

16𠊎聽到上帝所講个話，得到對至高者來个知識；𠊎看到該對全能者來个異象，𠊎就伏下去，目珠打開。

17𠊎看遠遠个將來；𠊎看到一儕人。有一粒星仔愛對雅各出來；有一個君王愛對以色列興起。佢愛打碎摩押个領袖，毀滅所有个西珥人。

18佢愛征服以東，佔領西珥、這仇敵个土地。以色列會常常得勝。

19有一儕愛對雅各出來掌權，將城肚賸到个人除淨淨。」

20後來，巴蘭在異象中看到亞瑪力人，就講出以下个預言：「亞瑪力本係最強大个國家，總係最後一定會滅亡。」

21巴蘭在異象中看到基尼人，就講出以下个預言：「你住个所在本來係安全，像做在巖石壁頂个竇。

22總係你等基尼人會消滅；亞述人會將你等捉走。」

23巴蘭又講預言：「噯！上帝行這兜事，麼人會生下去呢？

24對基提有侵略者坐船來；佢等會征服亞述㧯希伯，總係佢等也一定會消滅。」

25然後，巴蘭就轉屋下，巴勒也轉去。

← Chapter 23 Jump to: Chapter 25 →