Philemon 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to:

1𠊎係保羅；𠊎為到基督耶穌个緣故成做囚犯。𠊎㧯提摩太兄弟寫信仔給你 — 𠊎等所親愛个同工腓利門，

2㧯在若屋下聚會个教會，並亞腓亞姊妹，還有同𠊎等共下為主做兵个亞基布。

3願𠊎等个阿爸上帝㧯主耶穌基督賜恩典、平安給你等！

4親愛个腓利門啊，𠊎逐擺祈禱个時就提到你，常常為你感謝𠊎个上帝；

5因為𠊎聽講你對眾聖徒盡有愛心，對主耶穌盡有信心。

6𠊎求上帝通過你對信仰所表現个團契，使𠊎等深知同基督結連个一切好處。

7親愛个兄弟啊，你个愛心給𠊎極大个歡喜㧯安慰；因為眾聖徒个心已經對你得到爽快。

8既然𠊎係你在基督底背个兄弟，𠊎本來做得大膽吩咐你行應該行个事；

9總係，𠊎甘願用愛心來求你。雖然𠊎 — 保羅係基督耶穌个大使，這下又因為佢个緣故成做囚犯，𠊎還係甘願恁樣行。

10𠊎對你个請求係為到阿尼西謀。佢係𠊎在基督底背个孻仔；𠊎在監獄肚个時成做佢靈性个阿爸。

11頭擺佢對你無麼介用，這下佢無論對你、對𠊎，攏總盡有用。

12𠊎這下送佢倒轉你該位去，像係送𠊎个心肝去一樣。

13𠊎本來想愛留佢在𠊎身邊，喊佢在𠊎為福音坐監个時節代你服事𠊎；

14總係，無你个同意，𠊎莫恁樣做較好，俾你所做个好事毋係勉強，係甘心樂意个。

15阿尼西謀暫時離開你，或者係愛俾你永遠得到佢。

16這下，佢無再係一個奴隸，已經超過奴隸个身份，係在基督底背親愛个兄弟。對𠊎來講，佢確實係恁樣，對你還較係！因為佢係你个僕人，又係主內个兄弟！

17所以，你若係看𠊎做親密个朋友，請你接納佢轉去，像係接納𠊎。

18若係佢識做對毋起你个事，抑係虧欠你麼介，全部算𠊎个額。

19𠊎在這位親筆寫下來：𠊎 — 保羅負責還。𠊎無講，你乜知，你欠𠊎个係你个生命！

20所以，兄弟啊，為到主个緣故，求你給𠊎這個人情！𠊎在基督底背个兄弟啊，求你使𠊎个心得到爽快！

21𠊎寫這封信仔給你，因為𠊎深信你會聽從𠊎。其實，𠊎知你所行个會超過𠊎所要求个。

22同時，請代𠊎準備一隻間房；𠊎希望上帝會聽你等个祈禱，俾𠊎轉到你等該位去。

23為到基督耶穌同𠊎共下坐監个以巴弗對你請安。

24𠊎个同工馬可、亞里達古、底馬、㧯路加也對你請安。

25願主耶穌基督个恩典常在你等个心中！

Jump to: