Zephaniah 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1下背係亞們个孻仔約西亞做猶大王个時代，上主啟示給西番雅个信息。西番雅係古示个孻仔，基大利个孫仔，亞瑪利雅个曾孫，希西家王个玄孫。

2上主講：「𠊎愛徹底對地上除滅萬物。

3𠊎愛除滅人類㧯走獸，空中个鳥仔㧯海肚个魚。𠊎愛使壞人橫掉；𠊎愛將人類對地上剪除。𠊎 — 上主恁樣宣佈了。

4「𠊎愛伸手責罰住在耶路撒冷㧯猶大个百姓。𠊎愛剪除該地方拜巴力个情況，無人會記得該兜事奉巴力个祭司。

5𠊎愛消滅該兜上到屋頂去拜日、月、星辰个人。𠊎也愛消滅該兜敬拜𠊎、向𠊎發誓，又向米勒公發誓个人。

6𠊎愛消滅該兜斡頭無愛再跈𠊎、㧯該兜毋尋𠊎、毋求𠊎个人。」

7愛在至高个上主面前恬靜，因為上主審判个日仔會到了。上主準備牲儀，將佢个人客分別為聖了。

8上主講：「在𠊎拿自家个子民來獻祭該日，𠊎愛責罰領袖、王子，㧯一切學外邦風俗个人。

9在該日，𠊎愛責罰該兜敬畏假神、入神廟毋敢踏門檻个人；佢等想愛將強暴㧯詭詐搶來个東西堆滿佢等个神廟。」

10上主講：「在該日，你等會聽到在耶路撒冷个魚門有哀噭个聲，在城个新區有盡嘶个噭聲，山岡頂有崩山个大響聲。

11住在低窩地區个人啊，愛大聲噭！因為迦南个生理人攏總會滅亡，用銀仔做買賣个全部受剪除。

12「該時，𠊎愛用燈火搜查耶路撒冷。𠊎會責罰該兜自滿、像清酒留在沈底个酒渣頂个人；佢等心肚想：『上主毋會賜福，也毋會降禍。』

13佢等个財寶會被人搶走，佢等个屋被人拆掉；佢等永遠無法度住自家所起个屋，啉毋到自家葡萄園出產个酒。」

14上主个大日仔會到了，盡遽就會到！該日係悲慘个一日。該時，連最勇敢个戰士也會痛苦到喊阿姆𡟓噢！

15該日係發譴个日仔，係急難痛苦个日仔，係荒廢滅亡个日仔，係烏天暗地个日仔，係烏雲遮滿大地个日仔。

16該日會充滿相㓾个聲，係攻擊堅固城㧯高塔个日仔。

17上主講：「𠊎愛降這兜災難在人个身項，使佢等像瞙目个人尋無路好行共樣。佢等得罪𠊎，所以佢等个血會像垃圾水被人倒掉，佢等个身屍會像糞被人㧒掉。」

18在上主發譴个日仔，佢等个金銀救佢等毋到。佢熱情个火愛盡遽燒掉全世界，徹底消滅世間人。

Jump to: Chapter 2 →