1 Peter 5

Chinese TTVH 2021 (現代台語譯本漢字版)

← Chapter 4 Jump to:

1我作長老，閣作基督受苦的見證人，有份佇伊啲欲顯現的榮光，我給恁中間平平啲作長老的人苦勸。

2著牧養上帝交代恁的羊群，給𪜶眷顧，毋是勉強，是照上帝的旨意甘心樂意；毋是為著貪財，是自願熱心來做。

3交代互恁的羊群，毋通用權威管轄，著做𪜶的模樣。

4按呢，恁佇大牧者顯現的時會得著永遠𣍐失去光彩榮光的花冠。

5像款，恁少年人著順服長輩。恁大家著謙卑相對待；因為聖經有記載：上帝敵對驕傲的人，施恩互謙卑的人。

6所以，恁著佇上帝大氣力的手下謙卑，伊到時就會給恁高升。

7恁著將一切的掛慮交互上帝，因為伊關心恁。

8著謹慎，著警醒，因為恁的對敵魔鬼親像啲哮的獅，四界行啲尋通吞食的人。

9著靠堅定的信心來抵當伊，因為恁知全世界的眾兄弟姊妹攏啲經歷像款的苦難。

10賜一切恩典的上帝，就是通過基督來呼召恁進入永遠的榮光彼位，佇恁暫時受苦以後，一定會親身給恁重新建立，賜恁氣力，互恁堅固，徛在。

11願權能歸互伊，直到永遠。阿們！

12通過忠實的兄弟西拉，我寫此張短短的批互恁，來勉勵恁，閣見證這是上帝真實的恩典。著佇此個恩典頂面徛在。

13𫢶佇巴比倫及恁平平受揀召的教會給恁請安。我的子馬可嘛給恁請安。

14著親切互相請安。願平安歸佇恁所有屬基督的人！

← Chapter 4 Jump to: