1 Samuel 24

Chinese TTVH 2021 (現代台語譯本漢字版)

← Chapter 23 Jump to: Chapter 25 →

1掃羅追趇非利士人倒來的時，有人給伊講：「大闢𫢶佇隱‧基底的曠野。」

2掃羅就對以色列中導特選的兵三千，去野山羊山巖遐尋大闢及跟隨伊的人。

3掃羅來到路邊羊椆附近的山洞，入去欲大便。大闢及跟隨伊的人匿佇洞內較深的所在。

4跟隨大闢的人對伊講：「上主曾給你講：『我欲將你的對敵交佇你的手，你通照家己的意思對待伊。』今機會來啦。」大闢就恬恬仔爬去割掃羅外衫的衫仔裾。

5後來，大闢因為割掃羅的衫仔裾心內不安，

6對跟隨伊的人講：「伊是上主所抹油的王；我絕對毋敢對我的主人，就是上主所抹油的，做此款代誌傷害伊。」

7大闢用諸個話阻擋跟隨伊的人，不准𪜶攻擊掃羅。掃羅𬦰起來，對洞內出去，繼續行伊的路。

8大闢嘛對洞內出去，隨佇掃羅的後面，喝講：「我的主，我的王！」掃羅越頭看；大闢就仆佇土腳拜伊。

9大闢對掃羅講：「王啊，你是按怎聽人的話，講『大闢想欲害你』？

10今仔日你有親目看著，你佇洞內的時，上主將你交佇我的手。有人叫我刣你，毋拘我不忍心；我講：『我無欲出手害我的主，因為伊是上主所抹油的。』

11我的父啊，你看咧，你外衫的衫仔裾佇我的手裡；我只有割你的衫仔裾，無給你刣。按呢，你會當看出我的手無做什麼背逆你的歹代誌。我毋曾得罪你，毋拘你追趇我，欲揲我的性命。

12願上主佇你我的中間裁決。願上主因為你的所做替我報復；我𣍐出手害你。

13古早人按呢講：『歹代對歹人出。』我𣍐出手害你。

14以色列王出來欲掠啥人，欲追趇啥人？欲尋死狗，掠虼蚤噢？

15願上主做判官，佇你我的中間裁決。願伊監察，為著我的案件辯護，救我脫離你的手。」

16大闢對掃羅講諸個話了後，掃羅講：「我的子大闢，這是你的聲噢？」掃羅就大聲啼哭。

17伊給大闢講：「你比我較正，因為你對我真好，我煞顛倒用歹報你。

18今仔日你的所做表明你用好對待我，因為上主有將我交佇你的手，毋拘你無給我刣死。

19人若尋著伊的對敵，豈會放伊走？願上主因為今仔日你對我的所做用好報你。

20今我知你一定會作王，以色列國一定會佇你的統治下堅立。

21所以你著指上主對我咒誓，你𣍐剿滅我的後代，𣍐將我的名對阮的家族擦消。」

22大闢就對掃羅咒誓。然後，掃羅倒去伊住的所在；大闢及跟隨伊的人上去山區的要塞。

← Chapter 23 Jump to: Chapter 25 →