2 Samuel 23

Chinese TTVH 2021 (現代台語譯本漢字版)

← Chapter 22 Jump to: Chapter 24 →

1下面是大闢的遺言。耶西的子大闢，就是得著高升，雅各的上帝所選立，以色列人人意愛的詩人講：

2上主的神通過我傳達，伊的話佇我的嘴。

3以色列的上帝有講，以色列的石磐對我講：用公義治理，用敬畏上帝來治理的人，

4會親像無雲的清早抵仔出的日光，落雨了後大地青草反射的光彩。

5我的家佇上帝面前豈毋是按呢？伊有及我立永遠的約，逐項安排齊全閣穩固。我所有的拯救及所有的願望，伊攏給我成全。

6毋拘匪類攏會親像互人㧒确的刺仔，人毋敢用手提；

7欲磕𪜶的人，著用鐵器及槍柄；佇遐刺仔一定互火燒滅。

8大闢的勇士的名單記佇下面：哈革摩尼人約設‧巴設，嘛叫做伊斯尼人亞底挪，是三個勇士的首領，曾一遍拍死八百個人。

9第二個是亞何亞人朵多的子以利亞撒，伊是隨大闢三個勇士的一個。有一遍，非利士人聚集來攻擊以色列人，以色列人撤退，毋拘此三個勇士對非利士人嗆聲。

10以利亞撒起來拍非利士人，拍到手痠，手黏佇刀柄。彼日，上主互𪜶大勝利；軍兵倒轉來以利亞撒的後面，干焦啲搶戰利品。

11第三個是哈拉人亞基的子沙瑪。有一日，非利士人佇一坵紅豆園集合排陣；以色列軍兵逃走。

12沙瑪徛佇園中防守彼坵園，拍非利士人；上主互伊大勝利。

13收割的時，三十個首領中有三個落去亞杜蘭洞見大闢。非利士的軍隊佇利乏音山谷紮營。

14彼時，大闢佇要塞；非利士的軍隊駐在佇伯利恆。

15大闢用真渴慕的口氣講：「若有人會當去提伯利恆城門邊的井水互我飲，毋知偌仔呢好！」

16此三個勇士就衝過非利士人的營地，對伯利恆城門邊的井汲水，捾來互大闢。毋拘大闢毋飲，倒出來獻互上主，

17講：「上主啊，我哪通飲此個水？這豈毋是諸個用性命去換來的人的血？」所以大闢毋飲。這是此三個勇士做的代誌。

18洗璐雅的子，約押的小弟亞比篩是另外三個勇士的首領；伊曾攑槍刣死三百個人，就佇三個勇士中有名。

19伊是三個勇士中第一出名的，所以做𪜶的領袖；毋拘伊猶不及前彼三個勇士。

20閣有甲薛人耶何耶大的子比拿雅；伊是勇士，有做真多大事：伊曾刣死摩押兩個強猛的勇士；閣佇落雪的時，落去坑內刣死一隻獅；

21閣刣死一個高大的埃及人。彼個埃及人手攑槍，比拿雅只有攑棍落去伊遐，搶伊的槍，用彼支槍給伊刣死。

22這是耶何耶大的子比拿雅所做的事，就佇三個勇士中有名。

23伊比三十個勇士較有名望，毋拘不及前彼三個勇士。大闢有設立伊做侍衛長。

24三十個勇士中有：約押的小弟亞撒黑伯利恆人朵多的子伊勒哈難

25哈律人沙瑪及以利加

26帕勒提人希利斯提哥亞人益吉的子以拉

27亞拿突人亞比以謝戶沙人米本乃

28亞何亞人撒們尼陀法人瑪哈萊

29尼陀法人巴拿的子希立便雅憫支族基比亞人利拜的子以太

30比拉頓人比拿雅迦實溪人希太

31亞拉巴人亞比‧亞本巴魯米人亞斯瑪威

32沙本人以利雅哈巴雅善的一個子約拿單

33哈拉人沙瑪及沙拉的子亞希暗

34瑪迦人亞哈拜的子以利法列基羅人亞希多弗的子以連

35迦密人希斯羅亞巴人帕萊

36瑣巴人拿單的子以甲迦得人巴尼

37亞捫人洗勒給洗璐雅的子約押攑軍器的比錄人拿哈萊

38以帖人以拉及迦立

39赫人烏利亞共三十七人。

← Chapter 22 Jump to: Chapter 24 →