2 Timothy 3

Chinese TTVH 2021 (現代台語譯本漢字版)

← Chapter 2 Jump to: Chapter 4 →

1著知，世界的末期到的時會有種種的苦難。

2彼時，人會自私，貪財，誇口，驕傲，誹謗，忤逆父母，忘恩背義，無聖潔，

3無親情，殘忍，中傷，橫逆，兇暴，怨恨好，

4奸鬼，濫糝做，自高自大，愛享樂贏過疼上帝，

5有敬虔的外貌卻無敬虔的實質。你著閃避此款人。

6𪜶中間有人侵入人的厝，控制意志薄弱的婦女。諸個婦女受罪惡壓制，互逐款的情慾支配；

7𪜶不時都啲學，卻無法度明白真理。

8親像早前雅尼及洋布雷反對摩西，現在諸個人嘛按呢反對真理，致到心志敗壞，信仰無純真。

9毋拘諸個人，親像彼兩個人，𣍐有什麼影響，因為𪜶的愚戇會佇眾人的面前暴露。

10你有學我所教示的、我的作人、生活的目標、信心、寬容、疼心、堅忍，

11以及所受的迫害及苦難，諸個你攏知，就是我佇安提阿、以哥念、路司得所抵著的迫害，我按怎啲忍受；毋拘主有救我脫離諸個。

12所有愛欲及基督耶穌結連過敬虔生活的人，一定會抵著迫害。

13不過歹人及欺騙人的會愈來愈歹，𪜶給人騙，家己嘛互人騙。

14總是你著持守所學習所深信的道理，因為你知諸個是對什麼人學習的。

15你嘛知你對細漢就明白聖經，此個聖經會當互你有智慧通通過信基督耶穌得著拯救。

16全部聖經是上帝的神感動寫的，對教導，對督責，對糾正，對訓練人行正路，攏有利益，

17互服事上帝的人裝備好勢，通做逐項好事。

← Chapter 2 Jump to: Chapter 4 →