Ezra 1

Chinese TTVH 2021 (現代台語譯本漢字版)

Jump to: Chapter 2 →

1波斯皇帝塞魯士元年，上主為著欲實現伊通過耶利米的嘴所講的話，感動波斯皇帝塞魯士，互伊對全國頒布講：

2「波斯皇帝塞魯士按呢講：『上主 — 天頂的上帝將天下萬國賞賜我，閣指派我佇猶大的耶路撒冷為著伊起聖殿。

3恁中間所有做伊子民的，通轉去猶大的耶路撒冷，起上主 — 以色列上帝的聖殿；伊是佇耶路撒冷受敬拜的上帝。願上帝及𪜶同在。

4所有賰落來的人，無論住佇什麼所在，彼所在的人著用金、銀、財物、牲生幫贊𪜶；嘛著為耶路撒冷上帝的聖殿，甘心奉獻。』」

5對按呢，猶大及便雅憫的族長、祭司、利未人，所有受上帝感動的人攏準備好勢，欲上去耶路撒冷起造上主的殿。

6𪜶的厝邊就用銀器、金、財物、牲生、寶貝，幫贊𪜶；另外閣為聖殿甘心奉獻。

7塞魯士王嘛將以前尼布甲尼撒對耶路撒冷搶來，下佇伊的神廟許個上主殿內的器具，提出來還𪜶。

8波斯皇帝塞魯士指派管理府庫的米提利達將諸個器具提出來，點算，交互猶大的首領設巴薩。

9𪜶的數目記佇下面：金盤三十塊銀盤一千塊刀二十九支

10金碗三十塊銀碗兩千四百十塊其他的器具一千件

11金銀的器具共五千四百件。受掠的人對巴比倫上來耶路撒冷的時，設巴薩將諸個器具攏做夥帶來。

Jump to: Chapter 2 →