Habakkuk 1

Chinese TTVH 2021 (現代台語譯本漢字版)

Jump to: Chapter 2 →

1下面是先知哈巴谷所宣告對上主來的信息。

2上主啊，我對你喉叫，你無聽，欲偌久啊？我喝「有強暴」，你哪無來解救？

3你是按怎欲互我看見邪惡？災難即多，你哪無欲插？佇我面前有毀滅及強暴；衝突及鬥爭不時啲發生。

4因為按呢，律法失去效力，正義𣍐當施行；歹人欺壓義人，致到正義受歪曲。

5上主講：「注意觀察恁周圍的國家，恁會真著驚。佇恁活啲的日，我欲做一項代誌，給恁講，恁嘛𣍐相信。

6恁看，我欲互殘忍兇暴的巴比倫強盛起來；𪜶欲進軍全世界，霸佔別人的土地；

7𪜶可怕恐怖，眼中無人，用家己的意志定法律。

8「𪜶的戰馬比豹走較緊，比黃昏的豺狼較猛。馬兵對遠遠的所在來，奔跑直闖，親像鷹鳥衝落來欲吞食。

9𪜶來欲行強暴；𪜶堅決向前進攻，掠著的俘虜親像沙赫多。

10𪜶藐視君王，譏刺執政者；𪜶恥笑所有的堡壘，造土堆給𪜶攻取。

11𪜶親像風掃過了後，閣繼續向前；𪜶是有罪的人，拜家己的氣力做神明。」

12上主啊，你豈毋是對古早就存在？你是至聖，是阮的上帝，你永遠𣍐死。上主啊，你竟然揀選巴比倫來審判阮。阮的石磐啊，你竟然指派伊來刑罰阮。

13你的目睭清氣甲𣍐看邪惡，𣍐看歹代。是按怎你容忍詭詐的人？邪惡的人吞滅比𪜶較正直的人，是按怎你佯恬恬？

14你互人親像海裡的魚，親像啲趖的蟲，無領袖給𪜶管理。

15巴比倫用魚鉤給𪜶鉤，用網給𪜶拋，用魚網給𪜶網，給𪜶掠了了。巴比倫就歡喜快樂，

16對網獻祭，對魚網燒香，因為𪜶靠網得著豐富的食物，生活奢侈。

17𪜶豈通按呢繼續拋網掠魚，無情殘殺列國的人民？

Jump to: Chapter 2 →