Matthew 5

Chinese TTVH 2021 (現代台語譯本漢字版)

← Chapter 4 Jump to: Chapter 6 →

1耶穌看著一大陣人，就𬦰上山。伊坐落去，門徒倚來，

2就開始教示𪜶，講：

3「心靈散赤的人真有福氣，因為天國是此款人的。

4憂傷的人真有福氣，因為上帝會給𪜶安慰。

5溫柔的人真有福氣，因為上帝會互𪜶承受應允的土地。

6枵嘴焦欣慕上帝旨意實現的人真有福氣，因為上帝會互𪜶飽足。

7𠢕憐憫的人真有福氣，因為上帝會給𪜶憐憫。

8心清氣的人真有福氣，因為𪜶會見著上帝。

9促進和平的人真有福氣，因為𪜶會成做上帝的子兒。

10為著實踐上帝的旨意受迫害的人真有福氣，因為天國是此款人的。

11「為著我的緣故，人給恁侮辱，迫害，講逐款歹話誹謗，恁真有福氣。

12著歡喜快樂，因為恁佇天頂的報賞真大；恁以前的先知嘛曾按呢受迫害。」

13「恁是地上的鹽；鹽若失味，欲按怎互伊閣鹹？鹽失味就無路用，只有挕拺，互人踐踏。

14「恁是世間的光。起佇山頂的城蓋𣍐牢。

15人點燈了後𣍐用斗給伊蓋起來，一定會給伊𫞼佇燈台頂，通給厝內所有的人照光。

16親像按呢，恁的光著照佇人的面前，通互𪜶看見恁的好行為來榮光恁的天父。」

17「毋通想講我來是欲廢除摩西的律法抑是先知的教示。我來毋是欲廢除，是欲實現。

18我實在給恁講，天及地會消失，律法的一點一劃絕對𣍐消失，攏會實現。

19所以，無論什麼人犯著諸個誡命上細的一條，閣教人按呢去犯，佇天國伊算做是上細的。無論什麼人家己遵守，嘛教人遵守，佇天國此個人算做是上大的。

20我給恁講，恁若無比經學教師及法利賽派的人閣較忠實遵守上帝的旨意，絕對𣍐當入天國。」

21「恁有聽著律法按呢教示古早人，講：『毋通害死人；害死人的著受審判。』

22毋拘我給恁講，對兄弟抑是姊妹發受氣，攏著受審判。無論什麼人罵兄弟抑是姊妹『廢人』，著上法庭；罵兄弟抑是姊妹『倲戇』，著受地獄的火燒。

23所以，你佇祭壇欲獻禮物的時，若想著你的兄弟抑是姊妹對你有不滿，

24著將禮物放下佇祭壇前，先去及伊和好，然後才來獻禮物。

25「人給你控告，欲拖你去法庭，猶佇路中的時著趕緊及伊和解，才免互控告你的人給你交互判官，判官給你交互法警去關監。我實在給你講，最後的一仙五釐無還清楚，你絕對𣍐當出監。」

27「恁有聽著律法按呢教示講：『毋通姦淫。』

28毋拘我給恁講，人若用邪念看婦女，已經佇心內犯姦淫。

29你的正目若引起你犯罪，著給伊挖㧒确，寧可失去身軀的一部份，比歸身軀好好㧒落地獄較好。

30你的正手若引起你犯罪，著給伊斬㧒确，寧可失去身軀的一部份，比歸身軀好好㧒落地獄較好。」

31「閣有律法按呢講：『人若欲離伊的某，著互伊離婚書。』

32毋拘我給恁講，若毋是因為某不貞，毋通給伊離，因為伊若閣去嫁就是害伊犯姦淫；娶此個離婚的婦女的人嘛是犯姦淫。」

33「恁閣有聽著律法按呢教示古早人，講：『毋通違背所下的願，佇主面前下願著實行。』

34毋拘我給恁講，攏毋通咒誓。毋通指天咒誓，因為天是上帝的寶座；

35嘛毋通指地咒誓，因為地是上帝的腳砧；嘛毋通指耶路撒冷咒誓，因為耶路撒冷是大君王的城。

36嘛毋通指你的頭殼咒誓，因為你𣍐當互一支頭毛變烏抑是變白。

37恁講話，是，就講是，毋是，就講毋是；其他加講的是對邪惡者出來的。」

38「恁有聽著律法按呢教示講：『目睭賠目睭；嘴齒賠嘴齒。』

39毋拘我給恁講，毋通抵抗作惡的人。人若搧你正旁的嘴䩃，連倒旁嘛越互伊搧。

40人若告你，欲提你的內衫，連外衫嘛互伊。

41佔領軍的軍人若強迫你行一里路，著及伊行兩里。

42人若對你求，著互伊；給你借，毋通拒絕。」

43「恁有聽著此款教示：『著疼你的厝邊，怨恨你的對敵。』

44毋拘我給恁講，著疼恁的對敵，替迫害恁的人祈禱。

45按呢，恁才會當成做恁天父的子兒，因為伊互日頭出來照歹人及好人，嘛落雨互義人及不義的人。

46因為恁若干焦疼許個疼恁的人，有什麼報賞？豈毋是連許個貿稅的嘛按呢做？

47恁若只有對家己的兄弟抑是姊妹請安，有什麼比別人較特別？豈毋是連外邦人嘛按呢做？

48既然恁的天父是完全，恁嘛著完全。」

← Chapter 4 Jump to: Chapter 6 →