Micah 2

Chinese TTVH 2021 (現代台語譯本漢字版)

← Chapter 1 Jump to: Chapter 3 →

1佇眠床圖謀不義，計劃歹代的人，慘啊！𪜶天一下光就去做歹，因為𪜶掌握權力。

2𪜶貪人的園，就給搶；愛人的厝，就給佔；𪜶欺壓人及𪜶的家庭，搶奪人及𪜶的產業。

3所以上主講：看咧，我計劃欲降災禍互恁諸個人；恁𣍐當脫離此個災禍，行路頭殼攑𣍐高，因為這是災難的時。

4佇彼日，人會對恁講諷刺的話，唱悲慘的哀歌，講：阮害了了啦！阮同胞的產業變做別人的；阮的田地互人搶去，交互阮的對敵！

5所以，佇上主的大會中，恁絕對𣍐當閣抽籤分土地。

6𪜶講：「恁毋通說教，毋通對阮宣講諸個代誌；上帝𣍐互阮見笑。」

7雅各的後代豈通講：「上主的心胸哪赫狹？伊豈會做此款代誌？」我的話對行為正直的人一定有利益。

8上帝講：恁諸個計劃歹代的人，親像對敵起來攻擊我的子民，搶奪對戰場轉來，期待平安過日的人的外衫。

9恁將我子民的婦仁人對溫暖的家庭趕出，將我對𪜶細子的祝福永遠搶去。

10起來，逃走！遮毋是恁安全徛起的所在；因為恁不義的行為，此個地一定受毀壞，徹底毀壞。

11若有人四界行，傳無影跡騙人的話，講：「我預言，將來恁薄酒厚酒飲𣍐了。」此款是恁合意的先知。

12以色列所賰的子民啊，我一定欲給恁攏聚集起來。我欲給恁安置佇一個所在，親像羊佇羊椆，親像羊群佇草場，人真多，聲真旺。

13有一位導頭衝出去，導𪜶對城門衝出去；𪜶的王作前行，上主佇頭前引導𪜶。

← Chapter 1 Jump to: Chapter 3 →