Nehemiah 1

Chinese TTVH 2021 (現代台語譯本漢字版)

Jump to: Chapter 2 →

1下面是哈迦利亞的子尼希米的話：亞達薛西作波斯皇帝第二十年基斯流月，我佇波斯的京城書珊。

2有一日，我一個兄弟哈拿尼，及幾若個對猶大來的人來尋我；我對𪜶探聽許個流放巴比倫倒轉去的猶太人，及耶路撒冷的情形。

3𪜶給我講：「許個流放倒轉去的人，佇猶大省遐抵著大災難，受凌辱，閣耶路撒冷的城牆受拆毀，城門互火燒去。」

4我聽著諸個話就坐落來，啼哭，哀傷幾若日；佇天頂的上帝面前禁食祈禱，講：

5「上主，佇天頂至大通驚畏的上帝啊，你對許個疼你，遵守你誡命的人守約施仁愛。

6懇求你俯耳孔聽，開目睭看，聽你的僕人此陣為著以色列人暝日佇你面前的祈禱，認阮以色列人背叛你的罪；我及我的祖先攏有罪。

7阮惡意反抗你，無遵守你通過你的僕人摩西所頒布的誡命、規例、命令。

8求你會記得你對你的僕人摩西應允的話，講：『恁若對我無忠實，我就欲將恁分散去列國；

9毋拘恁若歸向我，遵行我的誡命，恁就是受趕散去天邊海角，我嘛欲對遐給恁聚集倚來，導恁到我所揀選互人來敬拜我的所在。』

10「𪜶是你的僕人，你的子民，是你用大氣力、大權能的手救贖的。

11主啊，求你俯耳孔聽你的僕人及許個意愛敬畏你的名的僕人的祈禱；閣求你互你的僕人今仔日亨通，對王得著恩典。」彼時，我做王的酒政。

Jump to: Chapter 2 →