Numbers 24

Chinese TTVH 2021 (現代台語譯本漢字版)

← Chapter 23 Jump to: Chapter 25 →

1巴蘭知上主歡喜賜福互以色列，就無親像頂兩遍去看兆頭。巴蘭面向曠野，

2看著以色列人照支族紮營，上帝的神臨到伊。

3伊就唸詩，講：比珥的子巴蘭的預言，目睭看清楚的人的預言；

4有聽見上帝的話，看見全能者的異象，仆啲，目睭金金的人的預言：

5雅各啊，你的布棚哪會赫媠！以色列啊，你的帳幕哪赫好看！

6𪜶親像相連續的棕樹，親像溪邊的花園，親像上主栽種的沉香樹，親像水邊的柏香樹。

7水欲對𪜶的水桶滿出；𪜶的種籽欲撒佇水源充足的土地。𪜶的王欲比歌革較偉大；伊的國欲興起。

8上帝導伊出埃及；為著伊，伊發出親像野牛的氣力。伊欲消滅對敵的國，摃斷𪜶的骨頭，用箭射迵𪜶。

9伊親像仆啲的獅公，親像倒啲的獅母，啥人敢惹伊？祝福恁的，願𪜶受祝福；咒詛恁的，願𪜶受咒詛。

10巴勒氣沸沸，拳頭母掟緊緊對巴蘭講：「我叫你來給我的對敵咒詛，你竟然連續三遍攏給𪜶祝福。

11你隨時給我轉去！我本來想欲互你夠額的報賞，毋拘上主阻擋，互你得𣍐著。」

12巴蘭對巴勒講：「我豈無對你派去我遐的使者講：

13『巴勒就是歸厝間的金銀互我，我嘛毋敢違背上主的命令，照家己的意思做代誌。上主愛我講什麼，我就按呢講。』」

14巴蘭閣對巴勒講：「今我欲轉去我的故鄉。來，我給你講，將來以色列人會按怎對待你的人民。」

15伊就唸詩，講：比珥的子巴蘭的預言，目睭看清楚的人的預言；

16有聽見上帝的話，得著至高者的智識，看見全能者的異象，仆啲，目睭金金的人的預言：

17我看見的，毋是現今的事；我觀察的，是將來的代誌。有一粒星對雅各出來；有一個統治者對以色列興起。伊會侵入摩押的邊界，會佔領塞特的領土。

18伊欲征服對敵以東，互𪜶成做伊的產業。以色列會愈來愈強。

19有一個統治者會對雅各出來；伊欲剿滅城內所賰的。

20巴蘭閣看見亞瑪力人，就唸詩，講：亞瑪力是列國的頭，毋拘伊最後會滅亡。

21巴蘭閣看見基尼人，就唸詩，講：恁徛起的所在堅固，恁作巢佇山巖。

22毋拘基尼會衰微，最後互亞述掠去。

23巴蘭閣唸詩，講：唉啊，上帝做諸個代誌，啥人會當活落去？

24有戰船對基提來，侵犯亞述，攻擊希伯；𪜶嘛會永遠滅亡。

25巴蘭就起身，倒去伊的故鄉；巴勒嘛轉去。

← Chapter 23 Jump to: Chapter 25 →