1 Corinthians 3

Chinese TTVR (現代台語譯本羅馬字版)

← Chapter 2 Jump to: Chapter 4 →

1Hiaⁿ-tī chí-bē, góa kàu taⁿ tùi lín kóng-ōe, bōe-tàng khòaⁿ lín chòe sio̍k Sèng Sîn ê, sī sio̍k-sè--ê, sī Ki-tok sìn-gióng ê eⁿ-á.

2Góa ēng lin chhī lín, bô ēng pn̄g, in-ūi lín iáu bōe-tàng chia̍h-pn̄g, kàu hiān-chāi mā iáu bōe-tàng,

3in-ūi lín iáu-kú sī sio̍k-sè ê lâng. Lín tiong-kan ū oàn-tò͘, ū hun-cheng; án-ni kiám m̄-sī chèng-bêng lín sī sio̍k-sè--ê, sī chiàu sè-kan-lâng ê hong-sek teh seng-oa̍h?

4Lín tiong-kan ū lâng kóng “Góa sio̍k Pó-lô ”; mā ū lâng kóng “Góa sio̍k A-pho-lô ”. Án-ni lín kap sè-kan-lâng ū sím-mi̍h bô kâng-khoán?

5A-pho-lô sǹg siáⁿ? Pó-lô sǹg siáⁿ? Goán put-kò sī Siōng-tè ê chhe-ēng, ín-chhōa lín siong-sìn; ta̍k-ê lâng chiàu Chú só͘ hō͘ goán ê chit-hūn teh chòe.

6Góa iā-chéng, A-pho-lô ak-chúi, m̄-kú Siōng-tè hō͘ i tōa-châng.

7Iā-chéng--ê kap ak-chúi--ê lóng bô tiōng-iàu, chí-ū hō͘ i tōa-châng ê Siōng-tè chiah tiōng-iàu.

8Iā-chéng--ê kap ak-chúi--ê lóng kâng-khoán, Siōng-tè ōe chiàu ta̍k-lâng ê kang-chok kā in pò-siúⁿ.

9Goán sī Siōng-tè ê tâng-kang; lín sī Siōng-tè ê chhân-hn̂g. Lín mā-sī Siōng-tè ê kiàn-tio̍k-bu̍t.

10Chiàu Siōng-tè hō͘ góa ê un-sù, góa choh chi̍t ê gâu ê kiàn-tio̍k-su hē tōe-ki, pa̍t-lâng tī hit téng-bīn khí-chō. M̄-kú ta̍k-ê lâng tio̍h khòaⁿ ka-kī án-chóaⁿ teh khí-chō.

11In-ūi Siōng-tè í-keng ū hē Iâ-so͘ Ki-tok chòe î-it ê tōe-ki, I í-gōa bô pa̍t-ê tōe-ki.

12Tī chit-ê tōe-ki téng, lâng nā ēng kim, gûn, pó-chio̍h, bo̍k-châi, chháu, á-sī tiū-kó khí-chō,

13ta̍k-ê lâng kang-thêng ê hó-bái, tī Ki-tok lâi-lîm ê Ji̍t, ōe hō͘ hé kā i lō͘-hiān chhut--lâi, in-ūi hé ōe chhì-giām ta̍k-ê lâng kang-thêng ê phín-chit.

14Lâng só͘ khí-chō--ê nā hō͘ hé sio bōe khì, i chiū ōe tit-tio̍h pò-siúⁿ.

15Lâng só͘ khí-chō--ê nā hō͘ hé sio--khì, i chiū ōe sún-sit; put-kò i pún-sin ōe tit-tio̍h kiù, chhin-chhiūⁿ tùi hé-tiong tô-miā cháu--chhut-lâi.

16Kiám m̄ chai, lín sī Siōng-tè ê tiān, Siōng-tè ê Sîn tiàm tī lín lāi-bīn?

17Nā ū lâng húi-hoāi Siōng-tè ê tiān, Siōng-tè ōe kā i húi-bia̍t; in-ūi Siōng-tè ê tiān sī sîn-sèng--ê, lín chiū-sī hit-ê tiān.

18M̄-thang phiàn ka-kī. Lín tiong-kan nā ū lâng ēng sè-kan ê phiau-chún khòaⁿ ka-kī chòe ū tì-hūi, ūi-tio̍h beh chiâⁿ-chòe chin-chiàⁿ ū tì-hūi, i tian-tò tio̍h chòe gû-gōng--ê.

19In-ūi chit sè-kan ê tì-hūi, tùi Siōng-tè lâi khòaⁿ sī gû-gōng. Sèng-keng ū kì-chài, “Siōng-tè hō͘ tì-hūi ê lâng tiòng-tio̍h ka-kī ê khúi-kè.”

20Pa̍t-ê só͘-chāi koh kóng, “Chú chai tì-hūi ê lâng ê sim-su bô lō͘-ēng.”

21Só͘-í, bô-lūn sím-mi̍h-lâng lóng m̄-thang ēng lâng chòe khoa-kháu. Kî-si̍t it-chhè lóng sī lín ê:

22bô-lūn Pó-lô, A-pho-lô, Pí-tek, chit sè-kài, siⁿ á-sī sí, hiān-chāi á-sī chiong-lâi, che it-chhè lóng sī lín ê;

23lín sī Ki-tok ê, Ki-tok sī Siōng-tè ê.

← Chapter 2 Jump to: Chapter 4 →