Daniel 2 — Chinese TTVR (現代台語譯本羅馬字版)

1Nî-pò͘-kah-nî-sat chē-ūi tē-jī nî, i bāng-tio̍h chi̍t ê bāng. Chit-ê bāng hō͘ i sim chin hoân, khùn bōe khì.

2Ông chiū hā-lēng tiàu-chi̍p su̍t-sū, kiâⁿ hoat-su̍t--ê, kiâⁿ siâ-su̍t--ê, kap seng-siōng-ka lâi, ài in chiong ông ê bāng kā i kóng. In lóng lâi khiā tī ông ê bīn-chêng.

3Ông kā in kóng, “Góa bāng-tio̍h chi̍t ê bāng, sim chin hoân, ài-beh chai chit-ê bāng sī sím-mi̍h ì-sù.”

4Hiah-ê seng-siōng-ka ēng A-lân-gú tùi ông kóng, “Hông-siōng bān-sòe! Chhiáⁿ chiong hit-ê bāng kā lí chiah-ê po̍k-jîn kóng, hō͘ goán thang kóe-seh hit-ê bāng ê ì-sù.”

5Ông kā in kóng, “Góa í-keng koat-tēng, ài lín chiong góa ê bāng kā góa kóng. Lín nā bô chiong góa ê bāng kā góa kóng, koh kóe-seh hō͘ góa thiaⁿ, góa chiū beh chām-tn̄g lín ê kha-chhiú, lín ê chhù mā ōe pìⁿ-chòe pùn-sò-tui.

6M̄-kú lín nā kā góa kóng hit-ê bāng kap bāng ê ì-sù, lín chiū ū siúⁿ, ōe tit-tio̍h lé-mi̍h, koh tit-tio̍h ke̍k-tōa ê êng-ū. Hiān-chāi, tio̍h chiong hit-ê bāng kā góa kóng, koh kā góa kóe-seh.”

7In koh chi̍t piàn kā ông kóng, “Chhiáⁿ hông-siōng chiong lí ê bāng kā lí ê po̍k-jîn kóng, goán chiū ōe kā ông kóe-seh.”

8Ông chiū kóng, “Góa chá chiū chai, lín teh thoa sî-kan, in-ūi lín chai, góa kóng ōe kàu chòe ōe kàu.

9Lín nā bô beh kā góa kóng chit-ê bāng, góa ōe kā lín phòaⁿ-hêng, in-ūi lín kiōng-bô͘ beh phiàn góa, thèng-hāu sî-sè kái-piàn. Taⁿ lín tio̍h chiong chit-ê bāng kā góa kóng, góa chiū chai lín chin-chiàⁿ ōe-hiáu kóe-seh chit-ê bāng.”

10Hiah-ê seng-siōng-ka koh tùi ông kóng, “Sè-kan bô lâng ōe-tàng chiong ông ài chai ê sū kóng--chhut-lâi. Iáu m̄-bat ū kun-ông, tāi-sîn, thóng-tī-chiá iau-kiû su̍t-sū, kiâⁿ hoat-su̍t--ê, seng-siōng-ka chòe chit-khoán tāi-chì.

11Hông-siōng mn̄g ê būn-tôe si̍t-chāi chin khùn-lân; tû-liáu sîn-bêng í-gōa, bô lâng ōe-tàng hôe-tap hông-siōng ê būn-tôe.”

12In-ūi án-ni, ông hui-siông siū-khì, hā-lēng beh thâi-sí Pa-pí-lûn só͘-ū ū tì-hūi ê lâng.

13Chit-ê bēng-lēng chi̍t-ē hoat-chhut, lâng chiū khì chhē Tān-í-lí kap i ê tâng-phōaⁿ, mā beh kā in thâi-sí.

14Ông ê sī-ōe-tiúⁿ A-lio̍k chhut-khì beh thâi Pa-pí-lûn ū tì-hūi ê lâng ê sî, Tān-í-lí ēng oán-choán, tì-hūi ê ōe

15tùi ông ê sī-ōe-tiúⁿ A-lio̍k kóng, “Ông sī-án-chóaⁿ hoat-chhut hiah-ni̍h kín-kip ê bēng-lēng?” A-lio̍k chiū chiong tāi-chì ê keng-kè kā Tān-í-lí kóng.

16Tān-í-lí chiū ji̍p-khì kìⁿ ông, chhéng-kiû ông iân-tn̂g kî-hān, thang hō͘ i kā ông kóe-seh bāng ê ì-sù.

17Tān-í-lí tò-khì i ê chhù, chiong chit-ê tāi-chì kā i ê tâng-phōaⁿ Hap-ná-nî-ngá, Bí-sa-lī, kap A-sat-lī-ngá kóng,

18ài in kî-tó, kiû thiⁿ-téng ê Siōng-tè lîn-bín, chiong chit-ê bāng ê ò-pì chí-bêng, hō͘ in m̄-bián kap Pa-pí-lûn ū tì-hūi ê lâng chòe-hé siū thâi.

19Hit-àm, Siōng-tè chiū tī īⁿ-siōng tiong chiong hit-ê bāng ê ì-sù kā Tān-í-lí khé-sī. Tān-í-lí chiū siōng-chàn thiⁿ-téng ê Siōng-tè,

20kóng: Goān Siōng-tè ê miâ tit-tio̍h chheng-chàn, sè-sè-tāi-tāi bû-kiông-chīn! I choân-tì, choân-lêng.

21I kái-piàn sî-kan, piàn-ōaⁿ kùi-choeh; I hòe-tû ông, soán-li̍p ông; I hō͘ tì-hūi ê lâng ū tì-hūi, hō͘ chhong-bêng ê lâng ū tì-sek.

22I khé-sī ò-pì ún-ba̍t ê sū, I chai àm-tiong ê it-chhè; kng kap I tông-chāi.

23Góa ê lia̍t-chó͘ ê Siōng-tè ah, góa kám-siā lí, chheng-chàn lí! In-ūi lí sù góa tì-hūi kap châi-lêng, goán kiû-mn̄g lí--ê, lí í-keng khé-sī góa, chiong ông ài-beh chai--ê chí-sī goán.

24Tān-í-lí chiū khì kìⁿ ông phài-khì beh thâi choân-kok ū tì-hūi ê lâng ê A-lio̍k, tùi i kóng, “Kiû lí m̄-thang thâi-sí choân-kok só͘-ū ū tì-hūi ê lâng! Chhiáⁿ lí kā góa ín-chìn khì kìⁿ ông, góa ōe-tàng kā i kái-bāng.”

25A-lio̍k sûi-sî chhōa Tān-í-lí khì kìⁿ ông. A-lio̍k tùi ông kóng, “Góa tī siū-lia̍h ê Iû-thài -lâng tiong-kan chhē-tio̍h chi̍t ê lâng; i ōe-tàng kā ông kái-bāng.”

26Ông tùi kiò-chòe Pek-thê-sa-sat ê Tān-í-lí kóng, “Lí chin-chiàⁿ ōe-tàng chiong góa ê bāng kā góa kóng, koh kóe-seh hō͘ góa chai o͘h?”

27Tān-í-lí ìn ông kóng, “Ông só͘ ài chai hit-ê ò-pì ê sū, ū tì-hūi--ê, kiâⁿ hoat-su̍t--ê, su̍t-sū, chiam-pok--ê bô chi̍t ê ōe-tàng kā ông kóe-seh,

28chí-ū thiⁿ-téng hit-ūi Siōng-tè chiah ōe-tàng chiong hit-ê pì-bi̍t khé-sī--chhut-lâi. I í-keng chiong bī-lâi teh-beh hoat-seng ê sū kā hông-siōng chí-sī lah. Lí bāng--tio̍h-ê kap teh su-khó ê īⁿ-siōng sī án-ni:

29“Hông-siōng, lí tī bîn-chhn̂g teh siūⁿ iú-koan chiong-lâi ê sū, hit-ūi khé-sī ò-pì ê Chú í-keng chiong bī-lâi beh hoat-seng ê sū thong-kè chit-ê bāng kā lí chí-sī lah.

30Put-kò, góa ōe-tàng bêng-pe̍k chit-ê ò-pì ê khé-sī, m̄-sī in-ūi góa pí só͘-ū ê lâng khah ū tì-hūi, sī Siōng-tè beh hō͘ ông chai-iáⁿ chit-ê bāng ê ì-sù, hō͘ lí chai lí sim-lāi teh siūⁿ sím-mi̍h.

31“Hông-siōng, lí tī bāng-tiong ū khòaⁿ-tio̍h chi̍t chō hui-siông tōa-sian ê siōng. Chit-chō siōng chin koân, koh hui-siông chhàn-lān hiáⁿ-ba̍k; khiā tī lí ê bīn-chêng, hêng-chōng hui-siông khó-phàⁿ.

32I ê thâu-khak sī sûn-kim--ê, heng-khám kap chhiú sī gûn--ê, pak-tó͘ kap io sī tâng--ê,

33tōa-thúi sī thih--ê, ē-bīn ê kha sī thih kap thô͘ lām--ê.

34Lí teh khòaⁿ ê sî, hut-jiân ū chi̍t tè m̄-sī lâng ê chhiú phah ê chio̍h-thâu, phah-tio̍h hit-chō tōa-siōng thih kap thô͘ lām-teh chō ê kha, kā kha phah-chhùi.

35Chit-ê tōa-siōng, thih kap thô͘, tâng, gûn, kim ta̍k pō͘-hūn soah lóng chòe-chi̍t-ē chhùi-kô͘-kô͘, chhùi kah chhin-chhiūⁿ joa̍h-thiⁿ ê ngó͘-kok-tiûⁿ ê chho͘-khng hō͘ hong chhe-sòaⁿ, liân chi̍t-sut-á to chhē bô. Hit-tè phah-tio̍h tōa-siōng ê chio̍h-thâu pìⁿ-chòe chi̍t chō soaⁿ, tōa kah kā choân-tōe khàm--khí-lâi.

36“Í-siōng sī ông chòe ê bāng. Taⁿ, góa beh chiong chit-ê bāng ê ì-sù kā ông soat-bêng.

37Hông-siōng, lí sī lia̍t-ông tiong siōng úi-tāi ê ông, thiⁿ-téng ê Siōng-tè í-keng chiong kok-ka, koân-pèng, ui-le̍k, chun-êng lóng sù hō͘ lí,

38mā chiong tòa tī ta̍k só͘-chāi ê lâng, iá-tōe ê cháu-siù, khong-tiong ê pe-chiáu lóng kau hō͘ lí koán-lí. Lí chiū-sī hit-ê kim ê thâu-khak.

39Lí í-āu, ōe ū chi̍t ê pí lí khah jio̍k ê kok-ka heng-khí, jiân-āu ū tē-saⁿ ê chhin-chhiūⁿ tâng ê kok-ka, beh chiáng-koán thian-hā.

40Āu-lâi ōe ū tē-sì ê kok-ka, i ōe chhin-chhiūⁿ thih hiah-ni̍h tēng, hiah-ni̍h kiông. Thih ōe chiong ta̍k-hāng mi̍h-kiāⁿ phah-chhùi; hit-ê kok mā ōe chhin-chhiūⁿ án-ni kā só͘-ū ê kok-ka phah-tó.

41Tú-tú chiàu lí khòaⁿ--tio̍h-ê, ēng thih kap sio-hûi sai-hū ê thô͘ lām chòe-hé chō ê kha kap kha-chńg-thâu-á, sī chí chi̍t ê ōe hun-lia̍t ê kok-ka, m̄-kú i iáu-sī ū chhin-chhiūⁿ thih ê khùi-la̍t.

42Hiah-ê ēng thih kap thô͘ lām chòe-hé chō ê kha-chńg-thâu-á, piáu-sī chit-ê kok-ka chi̍t-pō͘-hūn kiông chi̍t-pō͘-hūn jio̍k.

43Tú-tú chiàu lí khòaⁿ--tio̍h-ê, i sī thih kap thô͘ lām chòe-hé--ê, sī chí chit-ê kok-ka ê lâng ōe kap pa̍t-ê chióng-cho̍k thong-hun siⁿ-kiáⁿ, m̄-kú in bōe thoân-kiat, chhin-chhiūⁿ thih kap thô͘ bōe-tàng kiat-ha̍p chòe chi̍t-ê.

44Hiah-ê ông chāi-ūi ê sî, thiⁿ-téng ê Siōng-tè ōe kiàn-li̍p chi̍t ê éng-oán bōe bia̍t-bông ê kok. Chit-ê kok ê chú-koân bōe hō͘ lia̍t-kok chhiúⁿ--khì, tian-tò ōe phah-tó húi-bia̍t só͘-ū ê kok-ka; i beh éng-oán khiā-chāi.

45Chiàu lí khòaⁿ--tio̍h-ê, hit-lia̍p tùi soaⁿ-téng kō--lo̍h-lâi, m̄-sī lâng ê chhiú phah ê chio̍h-thâu, chiong thih, tâng, thô͘, gûn, kim lóng phah-chhùi. Chì-tōa ê Siōng-tè hō͘ hông-siōng chòe chit-ê bāng, chiū-sī beh hō͘ lí chai chiong-lâi beh hoat-seng ê tāi-chì. Lí ê bāng sī chin--ê, bāng ê kóe-seh sī khak-si̍t--ê.”

46Nî-pò͘-kah-nî-sat -ông chiū phak tī thô͘-kha pài Tān-í-lí, koh bēng-lēng lâng sàng lé-mi̍h kap phang-liāu hō͘ i.

47Ông tùi Tān-í-lí kóng, “Lín ê Siōng-tè chin-chiàⁿ sī bān-sîn ê Sîn, bān-chú ê Chú, sī ò-pì ê khé-sī-chiá! I hō͘ lí ōe-hiáu chiong chit-ê ò-pì kóe-seh hō͘ góa chai.”

48Ông chiū ko-seng Tān-í-lí, sù i chin chōe siōng-téng ê lé-mi̍h, phài i koán-lí Pa-pí-lûn choân-séng, koh siat-li̍p i koán-lí choân-kok ū tì-hūi ê lâng.

49Ông koh chiap-siū Tān-í-lí ê chhéng-kiû, phài Sa-tek-la, Bí-sa, A-pek-nî-ko koán-lí Pa-pí-lûn -séng ê sū-bū; m̄-kú Tān-í-lí lâu tī ông-kiong sū-hōng ông.