Habakkuk 1

Chinese TTVR (現代台語譯本羅馬字版)

Jump to: Chapter 2 →

1Ē-bīn sī sian-ti Hap-pa-kok só͘ soan-kò tùi Siōng Chú lâi ê sìn-sit.

2Siōng Chú ah, góa tùi lí âu-kiò, lí bô thiaⁿ, beh jōa kú ah? Góa hoah “Ū kiông-pō”, lí ná bô lâi kái-kiù?

3Lí sī-án-chóaⁿ beh hō͘ góa khòaⁿ-kìⁿ siâ-ok? Chai-lān chiah chōe, lí ná bô beh chhap? Tī góa bīn-chêng ū húi-bia̍t kap kiông-pō; chhiong-tu̍t kap tò͘-cheng put-sî teh hoat-seng.

4In-ūi án-ni, lu̍t-hoat sit-khì hāu-le̍k, chèng-gī bōe-tàng si-hêng; pháiⁿ-lâng khi-ap gī-lâng, tì-kàu chèng-gī siū oai-khiok.

5Siōng Chú kóng, “Chù-ì koan-chhat lín chiu-ûi ê kok-ka, lín ōe chin tio̍h-kiaⁿ. Tī lín oa̍h--teh ê ji̍t, góa beh chòe chi̍t hāng tāi-chì, kā lín kóng, lín mā bōe siong-sìn.

6Lín khòaⁿ, góa beh hō͘ chân-jím hiong-pō ê Pa-pí-lûn kiông-sēng khí--lâi; in beh chìn-kun choân sè-kài, pà-chiàm pa̍t-lâng ê thó͘-tōe;

7in khó-phàⁿ khióng-pò͘, gán-tiong-bû-jîn, ēng ka-kī ê ì-chì tēng hoat-lu̍t.

8“In ê chiàn-bé pí pà cháu khah kín, pí hông-hun ê chhâi-lông khah béng. Bé-peng tùi hn̄g-hn̄g ê só͘-chāi lâi, phun-pháu ti̍t-chông, chhin-chhiūⁿ eng-chiáu chhiong lo̍h-lâi beh thun-chia̍h.

9In lâi beh kiâⁿ kiông-pō; in kian-koat hiòng-chêng chìn-kong, lia̍h--tio̍h ê hu-ló͘ chhin-chhiūⁿ soa hiah chōe.

10In biáu-sī kun-ông, ki-chhì chip-chèng-chiá; in thí-chhiò só͘-ū ê pó-lúi, chō thô͘-tui kā in kong-chhú.

11In chhin-chhiūⁿ hong sàu--kè liáu-āu, koh kè-sio̍k hiòng-chêng; in sī ū-chōe ê lâng, pài ka-kī ê khùi-la̍t chòe sîn-bêng.”

12Siōng Chú ah, lí kiám m̄-sī tùi kó͘-chá chiū chûn-chāi? Lí sī Chì-sèng, sī goán ê Siōng-tè, lí éng-oán bōe sí. Siōng Chú ah, lí kèng-jiân kéng-soán Pa-pí-lûn lâi sím-phòaⁿ goán. Goán ê Chio̍h-pôaⁿ ah, lí kèng-jiân chí-phài i lâi hêng-hoa̍t goán.

13Lí ê ba̍k-chiu chheng-khì kah bōe khòaⁿ siâ-ok, bōe khòaⁿ pháiⁿ-tāi. Sī-án-chóaⁿ lí iông-jím khúi-chà ê lâng? Siâ-ok ê lâng thun-bia̍t pí in khah chèng-ti̍t ê lâng, sī-án-chóaⁿ lí tìⁿ-tiām-tiām?

14Lí hō͘ lâng chhin-chhiūⁿ hái--ni̍h ê hî, chhin-chhiūⁿ teh sô ê thâng, bô léng-siù kā in koán-lí.

15Pa-pí-lûn ēng hî-kau kā in kau, ēng bāng kā in pha, ēng hî-bāng kā in bāng, kā in lia̍h-liáu-liáu. Pa-pí-lûn chiū hoaⁿ-hí khoài-lo̍k,

16tùi bāng hiàn-chè, tùi hî-bāng sio-hiuⁿ, in-ūi in khò bāng tit-tio̍h hong-hù ê chia̍h-mi̍h, seng-oa̍h chhia-chhí.

17In kiám thang án-ni kè-sio̍k pha-bāng lia̍h-hî, bô-chêng chân-sat lia̍t-kok ê jîn-bîn?

Jump to: Chapter 2 →