Lamentations 3

Chinese TTVR (現代台語譯本羅馬字版)

← Chapter 2 Jump to: Chapter 4 →

1Góa hō͘ Siōng Chú siū-khì ê koáiⁿ hêng-hoa̍t, siū-chīn khó͘-thàng.

2I kóaⁿ góa ji̍p-khì o͘-àm, sì-bīn bô kng.

3I it-chài hē-chhiú phah góa, kui-ji̍t bô-thêng.

4I hō͘ góa siau-sán-lo̍h-bah; I at-chi̍h góa ê kut-thâu.

5I ēng pi-chhám pau-ûi góa, ēng khó͘-chhó͘ kong-kek góa.

6I hō͘ góa tòa tī o͘-àm tiong, chhin-chhiūⁿ í-keng sí chin kú ê lâng.

7I ēng chhiûⁿ ûi-khùn góa, hō͘ góa bōe-tàng tô-thoat; I ēng chin tāng ê tâng-liān kā góa pa̍k--teh.

8Góa ai-kiû ho͘-kiò, I m̄ thiaⁿ góa ê kî-tó.

9I ēng phah--kè ê tōa chio̍h tòng góa ê lō͘, hō͘ góa ê lō͘ khâm-khia̍t oan-khiau.

10I chhin-chhiūⁿ bâi-ho̍k ê hîm, mā chhin-chhiūⁿ bih--teh ê sai, thèng-hāu beh kong-kek góa.

11I pek góa lī-khui tōa-lō͘, kā góa thiah-chhùi, pàng tī piⁿ--á.

12I khui keng, kā góa tòng-chòe âng-sim siā.

13I ēng chìⁿ-tē lāi ê chìⁿ, siā-ji̍p góa ê sim.

14Góa chiâⁿ-chòe bān-bîn ê chhiò-pìⁿ; in kui-mî kui-ji̍t choh-koa thí-chhiò góa.

15I ēng khó͘-chhài kiông-pek góa chia̍h, ēng khó͘-chiú kiông-pek góa lim.

16I ēng chhùi-chio̍h-á bôa-tn̄g góa ê chhùi-khí, ēng thô͘-soa-hún khàm góa.

17Góa ê seng-oa̍h sit-khì pêng-an; góa í-keng bōe-kì-tit hēng-hok sī sím-mi̍h.

18Só͘-í góa kóng: Góa ê goân-khì siau-sit, m̄-káⁿ koh kî-thāi Siōng Chú kái-kiù góa.

19Hôe-sióng góa ê thòng-khó͘ kap liû-lōng, chhin-chhiūⁿ teh chia̍h khó͘-chhài, lim khó͘-chiú.

20Siūⁿ-khí chiah-ê sū, góa ê sim tîm-tāng ut-chut.

21M̄-kú tng góa siūⁿ-khí chit-kiāⁿ sū, góa chiū koh ū ǹg-bāng:

22Siōng Chú ê chû-ài éng-oán chûn-chāi, I ê lîn-bín éng bōe toān-choa̍t,

23ta̍k chá-khí ōaⁿ-sin; lí ê sìn-si̍t kóng-tāi.

24Góa ê sim kóng: Siōng Chú sī góa it-chhè hok-khì ê goân-thâu, só͘-í góa beh ǹg-bāng thèng-hāu I.

25Sìn-khò I, chhē-kiû I ê lâng, Siōng Chú si-un hō͘ in.

26Lâng tio̍h thun-lún thèng-hāu Siōng Chú ê kiù-un, in-ūi che sī hó.

27Lâng eng-kai tī siàu-liân ê sî pē i ê taⁿ, in-ūi che sī hó.

28Lâng tio̍h ka-kī chi̍t ê tiām-tiām chē--teh, che sī Siōng Chú hō͘ i ê taⁿ.

29Lâng eng-kai bīn phak tī thô͘-kha, án-ni khó-lêng iáu ū ǹg-bāng.

30Tio̍h kù-chāi lâng pa chhùi-phóe, jím-siū it-chhè ê lêng-jio̍k.

31Chú bōe éng-oán khì-sak lâng.

32I sui-jiân hō͘ lâng iu-chhiû, iû-goân ōe chiàu I hong-sēng ê chû-ài lîn-bín lâng.

33I m̄-kam hō͘ lâng siū-khó͘, hō͘ lâng iu-siong.

34Só͘-ū siū-lia̍h--ê hō͘ lâng thún-ta̍h ap-chè, Chú it-tēng koan-hoâi!

35Chì-koân-chiá só͘ sù ê jîn-koân siū pak-siah, Chú it-tēng koan-hoâi!

36Lâng tī hoat-têng siū oan-óng, Chú it-tēng koan-hoâi!

37Nā m̄-sī Chú ê chí-ì, lâng kiám ōe-tàng ū sím-mi̍h sêng-chiū?

38Chai-hō á-sī chiok-hok, kiám m̄-sī lóng chhut tī Chì-koân-chiá ê bēng-lēng?

39Lâng in-ūi ka-kī ê chōe siū hêng-hoa̍t, ū sím-mi̍h thang bâi-oàn?

40Lán tio̍h hoán-séng kiám-thó ka-kī ê hêng-ûi, oa̍t-tńg kui-ǹg Siōng Chú.

41Lán tio̍h ǹg thiⁿ-téng ê Siōng-tè, sêng-sim gia̍h-chhiú kî-tó.

42Goán hoān-chōe pōe-ge̍k, lí bô sià-bián goán.

43Lí hoat tōa siū-khì, tui-jip goán; lí hē-chhiú châu-bia̍t goán, lóng bô liû-chêng.

44Lí bih tī ba̍t-hûn lāi-tóe, goán ê kî-tó bōe-tàng thàu kàu lí hia.

45Lí hō͘ goán chiâⁿ-chòe che-tái pùn-sò, tī bān-bîn tiong siū khì-sak.

46Goán só͘-ū ê tùi-te̍k lóng tōa-siaⁿ kong-kek goán.

47Goán tú-tio̍h kiaⁿ-hiâⁿ kap hām-chíⁿ, keng-le̍k sí-bông kap húi-bia̍t.

48Ūi-tio̍h tông-pau siū húi-bia̍t, góa ê ba̍k-sái chhin-chhiūⁿ kang-hô ti̍t-ti̍t lâu.

49Góa ê ba̍k-sái ti̍t-ti̍t lâu, lâu bōe thêng,

50ti̍t-kàu Siōng Chú khòaⁿ-kò͘, tùi thiⁿ lîn-bín.

51Khòaⁿ-kìⁿ siâⁿ-lāi hū-lú ê cho-gū, góa ê sim hui-siông thòng-khó͘.

52Te̍k-jîn bô-iân-bô-kò͘ tui-jip góa, chhin-chhiūⁿ teh lia̍h chhek-chiáu-á.

53In beh hō͘ góa sí, oa̍h-oa̍h hiat-lo̍h Chhim-khiⁿ, koh ēng chio̍h-thâu that-tiâu khiⁿ-kháu.

54Chúi im-kè góa ê thâu-khak; góa siūⁿ: Góa bô-miā lah!

55Siōng Chú ah, góa tùi chhim-khiⁿ-tóe kiû-kiò lí ê miâ.

56Lí bat thiaⁿ góa ê kî-kiû; kiû lí m̄-thang that-ba̍t hī-khang, m̄ thiaⁿ góa hoah-kiù ê siaⁿ.

57Góa ho͘-kiû ê sî, lí ū óa-kūn góa, kā góa kóng: M̄-bián kiaⁿ!

58Chú ah, lí bat thòe góa sin-oan, sio̍k-hôe góa ê sìⁿ-miā.

59Siōng Chú ah, lí ū khòaⁿ-kìⁿ góa siū úi-khut; kiû lí soan-phòaⁿ góa chèng-ti̍t bô-chōe.

60Lí chai tùi-te̍k án-chóaⁿ oàn-hūn góa, tô͘-bô͘ beh hāi góa.

61Siōng Chú ah, lí ū thiaⁿ-kìⁿ in lóe-mē góa; chai-iáⁿ in hāi góa ê kè-bô͘.

62Lí thiaⁿ-kìⁿ góa ê tùi-te̍k kui-ji̍t kong-kek góa ê ōe, kap in beh hām-hāi góa ê im-bô͘.

63Lí khòaⁿ, tùi chá-khí kàu àm-mî, in put-sî chhiùⁿ-koa phì-siùⁿ góa.

64Siōng Chú ah, kiû lí chiàu in ê hêng-ûi pò-èng in.

65Kiû lí hō͘ in sim ngī, kā in chiù-chó͘.

66Kiû lí hoat tōa siū-khì tui-jip in, kā in tùi Siōng Chú lí ê tōe siau-bia̍t.

← Chapter 2 Jump to: Chapter 4 →