Nahum 3

Chinese TTVR (現代台語譯本羅馬字版)

← Chapter 2 Jump to:

1Chhám ah, thâi-lâng lâu-huih ê siâⁿ, khúi-chà kiông-pō móa-móa, put-sî ū chhiúⁿ-kiap.

2Bé-piⁿ phi̍t-phia̍k-kiò, chhia-lián lōng-lōng-háu, chiàn-bé phun-pháu, chiàn-chhia khōng-khōng-kiò;

3bé-peng chhiong chìn-chêng, to-kiàm kng-nà-nà, chhiuⁿ iām-iām-sih; siū-thâi--ê chin chōe, sin-si thia̍p kui-tui, si-thé sǹg bōe liáu, lâng hō͘ si-thé khê-tó,

4in-ūi chit-ê siâⁿ sī iau-kiau ê chhiong-ki, bê-he̍k lâng ê ang-î; i ēng îm-hēng ín-iú lia̍t-kok, ēng siâ-su̍t bê-he̍k bān-cho̍k.

5Siōng Chú — Bān-kun ê Thóng-sòe kóng, “Lí khòaⁿ, góa beh kong-kek lí; góa beh hian lí ê kûn, hian kàu khàm-tio̍h lí ê bīn, hō͘ lia̍t-kok khòaⁿ-tio̍h lí ê hā-thé, hō͘ lia̍t-pang khòaⁿ-kìⁿ lí ê kiàn-siàu.

6Góa beh chiong khó-ò͘ⁿ ù-òe ê mi̍h hiat tī lí ê sin-chiūⁿ, kā lí bú-jio̍k, kong-khai sī-chiòng.

7Khòaⁿ-kìⁿ lí--ê, lóng ōe cháu-siám, kóng, ‘ Nî-nî-bî hong-hòe lah! Siáⁿ-lâng ōe ūi i ai-siong?’ Góa beh khì tó-ūi chhē-tio̍h an-ùi lí ê lâng?”

8Lí kiám ū pí Tí-pí-su khah kian-kò͘? I tī Nî-lô-hô ê hô-piⁿ, ū hô chòe i ê pó-lúi, chúi chòe i ê siâⁿ-chhiûⁿ.

9Kó͘-si̍t kap Ai-ki̍p chòe i bô hān-liōng ê khùi-la̍t; Hut kap Lī-pí-a kap i liân-bêng.

10Iáu-kú i hō͘ lâng lia̍h--khì, liû-hòng khì gōa-kok; i ê eⁿ-á hō͘ lâng siak-sí tī ta̍k-ê koe-lō͘-thâu. I ê kùi-cho̍k hō͘ lâng thiu-chhiam, pun--khì; koaⁿ-oân hō͘ lâng ēng thih-liān pa̍k--teh, lia̍h--khì.

11Nî-nî-bî ah, lí mā ōe chiú-chùi, tian-lâi-tian-khì, beh chhē só͘-chāi pī-lān, siám-pī tùi-te̍k.

12Lí ê iàu-sài lóng chhin-chhiūⁿ bû-hoa-kó-chhiū, chhiū-téng kiat-móa chho͘-se̍k ê ké-chí; chi̍t-ē iô, ké-chí chiū lak lo̍h-khì beh chia̍h ê lâng ê chhùi-lāi.

13Lí khòaⁿ, lín ê chiàn-sū lóng chhin-chhiūⁿ nńg-chiáⁿ ê cha-bó͘-lâng; mn̂g-chhòaⁿ hō͘ hé sio--khì; siâⁿ-mn̂g khui-khui, chhut-chāi tùi-te̍k kong-kek.

14Lí tio̍h chhiūⁿ-chúi, chún-pī siū ûi-khùn; tio̍h ka-kiông hông-ōe; tio̍h khì thô͘-khut ta̍h liâm-thô͘, siu-lí chng-á-iô.

15M̄-kú, tī hia lí ōe hō͘ hé sio-bia̍t, hō͘ to thâi-sí; lí ōe siū húi-bia̍t, chhin-chhiūⁿ lông-chok-bu̍t hō͘ chháu-meh-á-kiáⁿ chia̍h-liáu-liáu. Chhut-chāi lí ke-thiⁿ jîn-sò͘ chhin-chhiūⁿ chháu-meh-á-kiáⁿ, chhut-chāi lí ke-thiⁿ jîn-sò͘ chhin-chhiūⁿ chháu-meh hiah chōe.

16Lí ke-thiⁿ lí ê seng-lí-lâng, chōe kah chhin-chhiūⁿ thiⁿ-téng ê chhiⁿ; m̄-kú in chhin-chhiūⁿ chháu-meh-á-kiáⁿ thí-si̍t pe-cháu.

17Lí ê kùi-cho̍k chhin-chhiūⁿ chháu-meh, lí ê koaⁿ-oân chhin-chhiūⁿ kui-tīn ê chháu-meh-kong, thiⁿ-khì léng, hioh tī lî-pa, ji̍t chhut chiū pe--khì, lâng m̄ chai in khì tó-ūi.

18A-su̍t -ông ah, lí ê koaⁿ-oân teh tuh-ku, lí ê kùi-cho̍k teh khùn; lí ê jîn-bîn sì-sòaⁿ tī soaⁿ-téng, bô lâng kā in chio-chi̍p.

19Lí ê siong bōe-i--tit; lí siū phah chin siong-tiōng; thiaⁿ-tio̍h lí ê siau-sit--ê, lóng ōe phah-pho̍k-á. Siáⁿ-lâng m̄-bat in-ūi lí ê chân-jím siū-hāi?

← Chapter 2 Jump to: