Revelation 10

Chinese TTVR (現代台語譯本羅馬字版)

← Chapter 9 Jump to: Chapter 11 →

1Góa khòaⁿ-kìⁿ lēng-gōa chi̍t ê tōa khùi-la̍t ê thiⁿ-sài tùi thiⁿ-téng lo̍h--lâi; i ēng hûn choh saⁿ chhēng, thâu-khak téng ū khēng, i ê bīn chhin-chhiūⁿ ji̍t-thâu, kha chhin-chhiūⁿ hé-thiāu.

2I ê chhiú ū the̍h chi̍t kńg thí-khui ê sòe-kńg-chheh. I chiàⁿ-kha ta̍h hái, tò-kha ta̍h tōe.

3I tōa-siaⁿ hoah, chhin-chhiūⁿ sai teh háu, hit chhit ê lûi chiū chhut-siaⁿ ìn.

4Chhit ê lûi chhut-siaⁿ liáu-āu, góa tú-beh siá, thiaⁿ-kìⁿ tùi thiⁿ ū siaⁿ kóng, “Chhit ê lûi só͘ kóng--ê, lí tio̍h hong--khí-lâi, m̄-thang kì-lio̍k.”

5Āu-lâi, góa só͘ khòaⁿ--kìⁿ kha ta̍h hái kap tōe hit-ê thiⁿ-sài gia̍h chiàⁿ-chhiú kí thiⁿ,

6kí hit-ūi éng-éng-oán-oán oa̍h--teh ê Siōng-tè, chiū-sī chhòng-chō thiⁿ kap thiⁿ-téng ê mi̍h, tōe kap tōe-chiūⁿ ê mi̍h, hái kap hái--ni̍h ê mi̍h--ê, soan-pò͘ kóng, “Bōe koh iân-tî lah!

7Put-kò tē-chhit ê thiⁿ-sài teh-beh pûn i ê lat-pah, lat-pah ê siaⁿ tân ê ji̍t, Siōng-tè tùi I ê po̍k-jîn chèng sian-ti só͘ soan-kò ê ò-biāu ōe si̍t-hiān.”

8Āu-lâi, góa chêng só͘ thiaⁿ--kìⁿ tùi thiⁿ lâi hit-ê siaⁿ koh chi̍t piàn tùi góa kóng, “Lí khì, khì the̍h kha ta̍h hái kap tōe hit-ê thiⁿ-sài chhiú-tiong hit-kńg thí-khui ê chheh.”

9Góa chiū khì thiⁿ-sài hia, chhiáⁿ i chiong hit-kńg sòe-kńg-chheh hō͘ góa; i kā góa kóng, “Lí the̍h--khì, chia̍h--lo̍h-khì, tī pak-tó͘ lāi ōe khó͘, m̄-kú tī chhùi-lāi ōe chhin-chhiūⁿ bi̍t hiah-ni̍h tiⁿ.”

10Góa chiū tùi thiⁿ-sài ê chhiú the̍h hit-kńg sòe-kńg-chheh lâi chia̍h; chhùi-lāi kó-jiân chhin-chhiūⁿ bi̍t hiah-ni̍h tiⁿ, m̄-kú thun lo̍h-khì pak-tó͘ lāi chiū pìⁿ-chòe khó͘.

11Thiⁿ-sài koh kā góa kóng, “Lí tio̍h koh soan-pò͘ Siōng-tè koan-hē chin chōe bîn-cho̍k, pang-kok, gú-giân, kap kun-ông ê ū-giân.”

← Chapter 9 Jump to: Chapter 11 →