Song of Solomon 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Góa sī Sa-lûn ê mûi-kùi-hoe, sī soaⁿ-kok ê pek-ha̍p-hoe.

2Góa ê ài-jîn tī cha-bó͘ gín-á tiong, chhin-chhiūⁿ chhì-phè lāi ê pek-ha̍p-hoe.

3Góa chhin-ài--ê tī ta-po͘ gín-á tiong, chhin-chhiūⁿ chhiū-nâ lāi ê phōng-kó-chhiū; góa chin ài chē tī i ê ìm-ńg-ē, i ê ké-chí góa chia̍h--khí-lâi chin tiⁿ.

4I chhōa góa ji̍p iàn-se̍k-thiaⁿ, ēng ài-chêng ê kî khàm tī góa ê téng-bīn,

5ēng phû-tô-koaⁿ-oân pó͘ góa ê la̍t, ēng phōng-kó chān góa ê goân-khì; góa ài i ài kah phòa-pīⁿ.

6I ēng tò-chhiú hû góa ê thâu-khak, ēng chiàⁿ-chhiú lám góa.

7Iâ-lō͘-sat-léng ê cha-bó͘ gín-á ah, góa kí lêng-iûⁿ kap chhân-iá ê lo̍k-bú, khún-chhiat kā lín hoan-hù, m̄-thang phah-chhíⁿ, m̄-thang kiáu-jiáu goán ê ài-chêng, kàu goán hoaⁿ-hí boán-chiok.

8Khòaⁿ leh, góa chhin-ài--ê lâi lah; i pôaⁿ-soaⁿ-kè-niá tiô-tiô-thiàu-thiàu teh lâi.

9Góa chhin-ài--ê chhin-chhiūⁿ lêng-iûⁿ, chhin-chhiūⁿ lo̍k-á; lí khòaⁿ, i khiā tī chhiûⁿ-á gōa, tùi thang-á teh khòaⁿ, tùi thang-á-chí teh thàm.

10Góa chhin-ài--ê chhut-siaⁿ tùi góa kóng: Góa ê ài-jîn, góa ê bí-jîn, khí--lâi, lán lâi-khì.

11Tang-thiⁿ í-keng kè, hō͘ í-keng soah.

12Hoe khui móa piàn-tōe, chiáu-á chhiùⁿ-koa ê sî kàu lah, tī chhân-iá ū thiaⁿ-kìⁿ pan-kah ê siaⁿ.

13Bû-hoa-kó chiām-chiām sêng-se̍k, phû-tô-chhiū khui-hoe hoat-chhut phang-bī; góa ê ài-jîn, góa ê bí-jîn, khí--lâi, lán lâi-khì.

14Góa ê hún-chiáu ah, lí bih tī chio̍h-phāng lāi, tī soaⁿ-giâm ún-ba̍t ê só͘-chāi; kiû lí hō͘ góa khòaⁿ lí ê bīn, thiaⁿ lí ê siaⁿ; in-ūi lí ê siaⁿ un-hô, lí ê bīn chin súi.

15Kā goán lia̍h hô͘-lî, hiah-ê sún-hoāi phû-tô-hn̂g ê sòe-chiah hô͘-lî; in-ūi goán ê phû-tô tú-á teh khui-hoe.

16Góa chhin-ài--ê sī góa ê, góa mā-sī i ê; i tī pek-ha̍p-hoe tiong teh chhī iûⁿ.

17Góa chhin-ài--ê ah, lí tio̍h tī ji̍t liâng-léng, iáⁿ chhun-tn̂g ê sî tńg--lâi, chhin-chhiūⁿ lêng-iûⁿ, chhin-chhiūⁿ lo̍k-á, tùi khâm-khia̍t ê soaⁿ-niá tò-tńg--lâi.

← Chapter 1 Jump to: Chapter 3 →