Zephaniah 1

Chinese TTVR (現代台語譯本羅馬字版)

Jump to: Chapter 2 →

1A-bûn ê kiáⁿ Iok-se-a choh Iû-tāi -ông ê sî, Siōng Chú tùi Hi-se-ka ê goân-sun, A-má-lī-ngá ê cheng-sun, Ki-tāi-lī ê sun, Kó͘-sī ê kiáⁿ Se-hoan-ngá kóng chiah-ê ōe.

2Siōng Chú kóng: Góa beh tùi tōe-chiūⁿ thiat-tóe tû-bia̍t bān-mi̍h.

3Góa beh tû-bia̍t lâng kap cheng-siⁿ, tû-bia̍t khong-tiong ê chiáu kap hái--ni̍h ê hî. Góa beh hō͘ pháiⁿ-lâng poa̍h-tó bōe koh khí--lâi, beh tùi tōe-chiūⁿ húi-bia̍t choân jîn-lūi. Siōng Chú án-ni soan-kò.

4Góa beh chhun-chhiú kong-kek Iû-tāi, kong-kek Iâ-lō͘-sat-léng só͘-ū ê chū-bîn. Góa mā beh tùi chit-ê só͘-chāi húi-bia̍t iáu-teh pài Pa-le̍k ê lâng, í-ki̍p ho̍k-sāi ngó͘-siōng ê chè-si.

5Só͘-ū tī chhù-téng pài thiⁿ-téng bān-siōng--ê, kap hiah-ê kèng-pài Siōng Chú kí góa chiù-chōa, siâng-sî koh kí sîn-bêng Bí-le̍k-kong chiù-chōa--ê,

6í-ki̍p pōe-poān Siōng Chú, bô chhē-kiû góa, bô kiû góa pang-chān ê lâng, góa lóng beh kā in húi-bia̍t.

7Lí tio̍h tī Chì-koân Siōng Chú ê bīn-chêng siok-chēng, in-ūi Siōng Chú ê ji̍t teh-beh kàu lah. Siōng Chú í-keng chún-pī beh hi-seng I ê chú-bîn, beh kiò tùi-te̍k lâi thun-chia̍h Iû-tāi.

8Siōng Chú kóng, “Tī hiàn-chè ê ji̍t, góa beh hêng-hoa̍t kùi-cho̍k kap ông ê chèng-kiáⁿ, í-ki̍p lóng-chóng chhēng gōa-pang-lâng ê saⁿ--ê.

9Hit-ji̍t, góa beh hêng-hoa̍t it-chhè hāⁿ-kè hō͘-tēng, hō͘ chú-lâng ê chhù chhiong-móa kiông-pō kap khúi-chà ê lâng.”

10Siōng Chú kóng, “Hit-ji̍t, tī Hî-mn̂g ū hoah-hiu, tī sin ê siâⁿ-khu ū ai-khàu, tùi soaⁿ-téng ū soaⁿ-pang ê siaⁿ hoat-chhut.

11Tòa tī kē ê siâⁿ-khu ê lâng ah, tio̍h ai-kiò, in-ūi seng-lí-lâng lóng ōe siau-bia̍t, ēng gûn bóe-bōe ê ū-chîⁿ-lâng lóng ōe siū châu-bia̍t.

12Hit-sî góa beh tī Iâ-lō͘-sat-léng gia̍h teng chhiau-chhē; góa beh hêng-hoa̍t hiah-ê chū-boán chū-tāi ê lâng, in siūⁿ-kóng ‘Siōng Chú bōe sù-hok, mā bōe kàng-chai’.

13In ê châi-bu̍t ōe hō͘ lâng chhiúⁿ--khì, in ê chhù-the̍h ōe hong-hòe; in khí-chhù, bōe-tàng tòa; chai-chèng phû-tô, mā bô chiú thang lim.”

14Siōng Chú ê tōa Ji̍t-chí kūn lah, chin kūn, liâm-piⁿ chiū kàu. Thiaⁿ leh, Siōng Chú ê ji̍t sī thòng-khó͘ ê ji̍t, ióng-sū to ōe kan-khó͘ ai-kiò.

15Hit-ji̍t sī Siōng Chú tōa siū-khì ê ji̍t, hoān-lān khùn-khó͘ ê ji̍t, tōa chai-lān chhiⁿ-chhìn ê ji̍t, o͘-o͘-àm-àm ê ji̍t, o͘-hûn khàm-ba̍t ê ji̍t,

16pûn sàu-kak háng-hoah ê ji̍t; tùi-te̍k beh kong-kek kian-kò͘ ê siâⁿ, kong-kek siâⁿ-kak ê koân-thah.

17Góa beh hō͘ lâng tú-tio̍h khùn-khó͘, hō͘ in chhin-chhiūⁿ sit-bêng ê lâng kiâⁿ-lō͘, in-ūi in tek-chōe Siōng Chú; in ê huih ōe siū piàⁿ-chhut chhin-chhiūⁿ teh piàⁿ thô͘-hún, tn̂g-á-tn̂g-tō͘ hō͘ lâng hiat-ka̍k chhin-chhiūⁿ teh hiat pùn-sò.

18Siōng Chú tōa siū-khì ê ji̍t, lâng ê kim gûn bōe-tàng kiù in. Choân-tōe ōe hō͘ Siōng Chú béng-lia̍t siū-khì ê hé thun-bia̍t, in-ūi I ōe chin kín châu-bia̍t tōe-chiūⁿ só͘-ū ê chū-bîn.

Jump to: Chapter 2 →