Habakkuk 3

Zande

← Chapter 2 Jump to:

1Ga Abakuka kpetambuahe nangia nebi, ku ti woro Siginoto.

2Ako Yekova, mi gi pa tingida pa ro, na pa ga mangaapai, Ako Yekova, mi ki gunde. Mo niúngasi ga mangapai berewe na agarã; mo nimangi he i ini pa ha na agarã; rago zinga mo tíngidi pa inapai.

3Mbori aye Temana yo, na gu Kparakpara Ziazia Ko Bagangara Parana yo. Gako taarimo adadi angbangbaturũ, kpotosende ahi be tambua ko.

4Pa kĩko adu wa imarago, imahe ki niikpira be ko yo; ko ki oko gako tandu koyo.

5Gberãngbi ki nindu ku mbata yo fu ko, mirãwe ki nikĩ pati nduko.

6Ko aru ki ringbisi pa kia kpotosende; ko ki ngere ki nizigizo arikaaboro; gu nyenye abaagangara ki gbandaka, gu nyenye ago ki rinda. Gako asino adu wa gu naadu bakuru yo.

7Mi ki bi irairapai rogo ga Kusana abamburoko yo; agu aroko dadahe nangia ga ringara Midiana ki niwo.

8Ako Yekova, ga rungudirungudi zinga adu kuti adi? Ga zinga adu kuti adi, watadu ga dingidingi ngbaduse kuti baime, ho mo aoro ni ri gamo afarasi, ri ga ngbagidavura diabese?

9Mo adarĩ ga mboto tipa no ahe na ni, ki gbe guanza. Mo asapu kpotosende na adi.

10Abaagangara abi ro, ki nisaki tihe; rikita aime ki nifu afu; dudungura aime ki kusi woro ho, si ki tumba tihe ku ari yo gbe.

11Uru na diwi ki ru kindi kina ku rogo gu baha kuti nzere gamo aguanza wa ami asusi, kuti ikpira ga imaima baso.

12Mo adarĩ nduro ri kpotosende ni nzengerenzengere zinga, mo asimbi arikaaboro rogo zinga.

13Mo andu ku mbata yo tipa batasa gamo aboro, tipa batasa ga mbedimbedi aboro. Mo agbingbida ri barukuri kporo gbegberẽ aboro, ki sa mburu kporo ni kungba he ki da ti ngapaha.

14Mo akofo ri gani barukuri abasovura na kina gamo apara baso, wa ni aye wa gugugu yuge ka gbandaka re, ningi wa ni nikarita rungorungo boro ni gbuko.

15Mo asadiga baime na gamo afarasi, nangia sungburasungbura aime du na bakere ome.

16Mi agi he, kpotore ki nikio, kpotongbare ki nikio be woro ho; zirã ki rimi ku rogo amemere yo, ndure ki niwo awo tii re yo. Mi asúnguda rago fudifudipai zezeredi si ye ku ri agu aboro naye ka manga rani.

17Ka vurumo avura nga mbumbo ya, ka zuzu bakakue adu nga ti ni ya, zuzu aeraya ki kpa, ka aati azu nga riahe ya, rimbasa akandoro ki du ni bafu-bafu ra ku sa yo ti ndugu ra ka zogozogo anya adu nga rogo bambu ra yo a ya,

18ono mi tigimi, mi angí rogo Yekova yo, mi adú na ngbarago rogo Mbori yo nga gi bata.

19MBORI nga Gbia, ko nga gi ome; ko namanga andure wa andu nzungba, ko nagasa re mi ndu ri gimi tumbatumba aba. Fu bagasi abibia: na gu ũworo ahe du na agirihe.

← Chapter 2 Jump to: