Haggai 2

Zande

← Chapter 1 Jump to:

1ti saba diwi, ti rameru 21, sangba Yekova ki ye ngba Agai nangia nebi,

2“Mo gúmba pai awere fu Zerubabera wiri Saratiere, baira abazogo Yuda, na fu Yosua wiri Yosadaka nangia gbiamotumo, na fu gu yangara aboro dunduko, ki ya,

3Da i ambu ni dagba roni naabi gi bambu re ti rago gaha bambata taarimo? Oni nabi he war awere? A nga si bangironi wa kungba he te?

4Ako Zerubabera, ono mo dú nyanyaki awere, wo poi Yekova; Ako Yosua wiri Yosadaka nga gbiamotumo mo dú nyanyaki; oni aboro ringara dunduko, oni dú nyanyaki, wo poi Yekova; oni mángi sunge, bambiko mi du na oni, wo poi Yekova nga ga arimbasa ko,

5ku sangba gi kidohe nga gu mi akido fu roni ho oni aye ni ringara Ezipeta yo. Gi Toro nanye dagba roni, ka oni gúnde nga ya.

6Bambiko ya Yekova nga ga arimbasa ko wẽ: Mi azígizo angbangbaturũ na kpotosende na baime, na ugu sende bara sa berewe ti rago ngbutuko;

7mi ki zigizo arikaaboro dunduko, si du agu ahe ngba bangiri arikaaboro dunduko aye kono, mi ki hisi gi bambu re na baweneahe, wo poi Yekova nga ga arimbasa ko.

8Feda si nga gimi he, dahabu ki ngia gimi a, wo poi Yekova nga ga arimbasa ko

9Gu taarimo nikadu fu gi bambu re giza, si adú ni babakere he ti gu naadu mbata, wo poi Yekova nga ga arimbasa ko; mi ki fu zereda ku rogo gi ba re, wo poi Yekova nga ga arimbasa ko!”

10Ti rame diwi 24 nga ga ribua diwi, rogo ue garã zogarago nangia ga Darayawesa, sangba Yekova ki ye ngba Agai nangia nebi,

11“Ya Yekova nga ga rimbasa ko wẽ: Mo sána aboromotumo i wisigi gi sanahe re nga,

12‘Ka boro tindi kparakpara pasio rogo gani gbanga baukadi, gani baukadi ki kpe tihe ti kpokuta, watadu ti kpepasio, watadu ti imekakue, watadu ti nzeme, watadu kuti gini ngbatunga riahe, gu he adú ni kparakpara he ziazia mbiko ho?’ ” Aboromotumo ki karaga ha ki ya, “Oó”

13Agai ki ya, “Ka gu boro du ni birikosibirikosi ni mbiko ni zadi kangba, ni ki zadi gu dagba agi ahe re, si asá tihe ni birikosibirikosi he?” Aboromotumo ki karaga ha ki ya, “Si asá tihe ni birikosibirikosi he.”

14Agai ki ya, “Kina wo du he na agi aboro re, na gi rikaaboro re ku bara bangire, wo poi Yekova; wo du he a na gu mangaapai d unduko nga ga beyo; gu he i aye na ni yo si ni birikobiriko he a.

15Mi zungadi roni awere, oni bérẽ nga pa gu pai nikaye tona ti gi uru re ki da ku mbata yo. Mbata i amoi mbia ri kura mbia rogo ga Yekova yekaru yo,

16gaoni apai adu waĩ? Ho boro ada ni ti guguda ringbisi 20, si adu yo ono kina bawe; ho boro nida ni bapira imekakue yo ka dia 50 ringbisi, si adu yo ono wa kina 20.

17Mi amangi roni na morogumba na zuzu gaoni sunge si ki ngbiimi ki kuko; ono oni akaraga nga tironi kono du mi ni te, wo poi Yekova.

18Oni bérẽ nga pa ha tona ti gi uru re ki da ku mbata yo, tona ti 24 uru nga ga ribua diwi. Tona ti gu uru nga gu i amoi mburu ga Yekova yekaru ti ni, oni bérẽ nga pa ha:

19Tunga ahe gbamu yo kindi? Bakakue nazu nga zuzu he wa sa te? na vurumo, na ngua wa ndavu, na eraya a te? Mi afú maku fu roni tona ti gi uru re ki da ku mbata yo.”

20Sangba Yekova ki ye ni ue he koyo du Agai ni ti rame diwi 24 nga ga gu diwi re, niya,

21“Mo gúmba pai fu Zerubabera, baira abazogo Yuda, niya, Mi wa mi nikazigizo angbangbaturũ na kpotosende,

22ka sisika ambataabakindo nga ga angbi; mi wa mi nikagbarasa ome angbi nga ga arikaaboro, ki sisika angbagidavura na abandurihe; afarasi na abandurira atíwa ku sande, gu ni be ga kurani basape.

23Ti gu uru re, wo poi Yekova nga ga arimbasa ko, mi adía ro, Ako Zerubabera nga gi moyambu, nga wiri Saratiere, wo poi Yekova, mi ki sa ro wa tongo ido; bambiko mi sia ro, wo poi Yekova nga ga arimbasa ko.”

← Chapter 1 Jump to:

Recommended Reading

Commentary Haggai Commentaries → Devotional Haggai Devotional Guide → Get This Bible Zande Study Bible →