Philemon 1

Zande

Jump to:

1Pauro, ga Kristo Yesu kisikisi boro, na Timoteo nga wirinarani, Fu Firemona boromangapai na ani du nyemuko ti rani,

2na fu Afia dawirani, na fu Arukipo nga banzengere na ani, na fu gu kanisa du kpuro yo:

3Undahe fu roni na zereda be Mbori Barani na Gbia Yesu Kristo.

4Mi natambua gi Mbori dedede, niyambu rimoro rogo gimi akpe,

5wa gi mi pa ga nyemuse na gu idapase du ti ro koyo du Gbia Yesu ni, na koyo du ga Mbori aboro ni dunduko;

6ya gu ngbanya nga ga ga idapase ndu sa manga pai, rogo gu ina pa wene ahe yo dunduko du ti roni, fu Kristo.

7Bambiko bakere ngbarago nadu ti re na wasa mbiko ga nyemuse, bambiko ngbadu ga Mbori aboro yo angarã mbiko ro, wirina.

8Wa du he were, mi vura du na tandu rogo Kristo yo ka ruga ro tipa gu pai ru aru,

9ngbatika mi nazungadi he mbiko nyemuse, wa du mi nga Pauro nga gbinza boro, du awere ni ga Kristo Yesu kisikisi boro a.

10Mi zúngadi ro tipa wire, nga gu ko vungu mi ko ni vodivodi re, Onesima,

11nadu mbata ni mumungo boro foro, ono ko ngba awere foro na fere.

12Ko karaga mi ko foro ni boroko, si nga, boro kpotore yo.

13Ko mi akpi nyemu ka kuti ko, ya ko mangi pa re ku ba ro wa du mi ni vodivodi re tipa wene pangbanga.

14Ono mi akpi nga nyemu ka manga ha gii bangiro wa sa te; ya ka ga weneringise du nga ni dingisaro ya, ono ni nyemuhe zaza.

15Mbiko ka ngia si du ko akpara na mo ti ni ngbutuko, ya ko ye ka du be ro nye anye kindi;

16ni kina kanga fuo gere te, ono ni bahe ti kanga, ni wirina nyemuse, du nyemuko ti re gbe, ono ngbatika mo, rogo borose na rogo Gbia yo.

17Si ngia mo naya ti re badia, mo dí ko ku gume wa ka mo adi re tigimi.

18Ono si ngia ko amangi ro ti pai, watadu ko agbe bape ti ro, mo moi he k uti rimore;

19mi Pauro mi nake he ni boro bere, mi agása ha. Ono mi atingida nga ha foro ya gi boro bape nga mo wa mo aidi pase mbiko re, te.

20Ii, wirina, mo fú ngbarago fere mbiko ro rogo Gbia yo. Mo ngárasi ngbadure rogo Kristo yo.

21Mi nake he foro zaza mbiko ga giasangba, niini he ya mo amánga ha susi gu mi agumba ha.

22Ono gbia kuti gi dunduko re mo mbákadi ba tipa re a, mbiko mi namaa bangire ya i afú re fu roni mbiko gaoni kpe.

23Epafura nga kisikisi boro na mi rogo Kristo Yesu yo, ko nasanango ro;

24aMarako a wo na Arisitaruko, aDema a na Ruka, nga aboromangapai na mi.

25Gu undahe nga ga gaani Gbia Yesu Kristo dú na tororoni. Amina.

Jump to:

Recommended Reading

Commentary Philemon Commentaries → Devotional Philemon Devotional Guide → Get This Bible Zande Study Bible →